Qərbin Ermənistana 20 bəndlik gizli “Hərbi dəstək paktı” inkar edilə bilməz...
Ramil Məmmədli: “Vaşinqton nə qədər inkar etsə də, Ermənistana hərbi dəstək ortadadır”
Aprelin 5-də Brüsseldə Ermənistan baş naziri Nikol Paşinyan, Avropa Komissiyasının prezidenti Ursula Fon der Lyayen və ABŞ Dövlət katibi Entoni Blinken arasında keçirilən görüşün üzərindən sirr pərdəsi qalxır. Məlum olur ki, görüş zamanı Ermənistana hərbi dəstəyin göstərilməsi məsələsi də müzakirə olunub.
O da məlumdur ki, Brüsseldə keçirilmiş ABŞ-Avropa İttifaqı-Ermənistan üçtərəfli görüşü ilə bağlı sənədlərdən birinin fotosu yayılıb. Azərbaycan ictimaiyyətində geniş narahatlıq doğuran həmin fotodan da göründüyü kimi, üçtərəfli görüşlə bağlı daha əvvəldən verilən açıqlamaların əksinə, həmin sənəddə həm ABŞ-ın, həm də Avropa İttifaqının Ermənistana geniş hərbi dəstək göstərməsi əks olunub. Məlum olub ki, Brüsseldə Ermənistana 20 maddəlik hərbi dəstək paketi öz əksini tapıb. Həmin sənəddə ABŞ bütün Ermənistan ərazisində GPS texnologiyasının geniş tətbiqindən tutmuş, digər sahələrə hərbi yardım və digər məsələlər öz əksini tapıb. ABŞ Dövlət Departamentinin Mətbuat Xidməti Brüsseldə keçirilmiş üçtərəfli görüşdə Ermənistana geniş hərbi dəstəyin göstərilməsi məsələlərini inkar etsə də, buna dezinformasiya deyib təhlükəsizlik məsələlərinin gündəmdə olmadığını bildirsə də, bu inandırıcı görünmür. Bu ciddi sənəddir. Necə deyərlər, fakt qarşısında qalanda ən asan yol bunu “dezinformasiya” kimi qələmə verməkdir.
“Qarabağda antiterror əməliyyatlarından sonra ABŞ-ın bu ölkəyə hərbi himayadarlığı yeni müstəviyə keçib”
Sözügedən məsələni “Bakı-Xəbər”ə şərh edən hərbi ekspert Ramil Məmmədli hesab edir ki, Dövlət Departamentinin bununla bağlı izahatı və sənədlə bağlı təkziblə çıxış etməsi Ermənistana dəstəyin müzakirə olunmaması anlamına gəlmir: “Son vaxtlar Fransanın timsalında müşahidə olunan fəallıq, Ermənistana hərbi dəstəklə bağlı qəbul olunan qərarlar təkcə Parisin siyasi iradəsi deyil. Bu, həm də Birləşmiş Ştatlarla razılaşdırılmış bir plandır. Məhz Vaşinqton buna müsbət yanaşdığı üçün sözügedən proseslər sürətlənib. 5 aprel Brüssel görüşündə Fransa iştirak etməsə də, Avropa İttifaqı tərəflərdən biri idi. Fransanın da Aİ-də necə aparıcı gücə malik olduğunu izah etməyə ehtiyac yoxdur. Bu həmin Birləşmiş Ştatlardır ki, 2016-cı ildə aprel döyüşlərindən sonra Ermənistan ordusunu müasir gecəgörmə vasitələri ilə təchiz edib. Ermənistan silahlı qüvvələri işğal etdikləri ərazilərimizdə həmin texniki vasitələrdən istifadə etməklə mövqeləri möhkəmləndirdilər. Vaşinqton nə qədər inkar etsə də, Ermənistana hərbi dəstək ortadadır. Ötən il Ermənistanda ABŞ əsgərləri ilə birlikdə hərbi təlimlər keçirildi. Qarabağda antiterror əməliyyatlarından sonra ABŞ-ın Ermənistana hərbi himayadarlığı yeni müstəviyə keçib. Üstəlik, Avropa İttifaqını da buna cəlb edirlər. Ermənistan nümayəndə heyəti ABŞ-da səfərdə olanda Pentaqonda, digər görüşlərdə də hərbi yardım konkret müzakirə obyekti olub. Hansı KTMT üzvünə Ermənistandakı qədər belə şans verilir? Düzdür, burada əsas məqsədlərdən biri Rusiyanı Ermənistandan çıxarmaqdır. Ancaq istənilən halda Ermənistanın silahlandırılması region üçün sabitlik vəd etmir. Bu, Ermənistanı həm revanşizmə, həm də danışıqlarda destruktiv mövqe sərgiləməyə kökləyəcək”.
Vidadi ORDAHALLI
