Brüssel görüşü rusyönümlü erməni müxalifətini hərəkətə gətirdi...
Şakir Ağayev: “Bu hələ Rusiyayönümlü qüvvələrin ilkin bəyanatlarıdır”
Brüsseldə ABŞ Dövlət katibi Entoni Blinken, Avropa Komissiyasının Prezidenti Ursula fon der Lyayen və Ermənistanın baş naziri Paşinyan arasında keçirilən görüş İrəvandakı Rusiyayönümlü müxalifət tərəfindən də birmənalı qarşılanmayıb.
Belə ki, Ermənistanın üçüncü prezidenti, Ermənistan Respublika Partiyasının (RPA) lideri Serj Sarkisyan mətbuata bildirib ki, Paşinyanın Blinken və Avropa Komissiyasının rəhbəri ilə görüşü regionda Rusiya Federasiyası ilə Qərb arasında qarşıdurmanı gücləndirəcək. “Digər geosiyasi şəraitdə belə bir görüş Ermənistan Respublikası üçün faydalı ola bilər. Amma indi, Qərblə Rusiya arasında bu cür qarşıdurma olduğu halda belə bir görüş, əminəm ki, regionumuzda bu qarşıdurmanın güclənməsinə gətirib çıxaracaq”.
Sarkisyanın açıqlamasından da aydın olur ki, ölkədəki Rusiyayönümlü siyasi kəsim Paşinyanın 5 aprel tarixində Brüsseldə keçirdiyi üçtərəfli görüşdən narazıdır.
Ekspertlərə görə, Rusiya Paşinyanın bu davranışına qarşı mütləq yerli müxalifətin dəstəyi və Ermənistandakı hərbi kontingenti vasitəsilə addım atacaq. Ekspertlər deyir ki, Sarkisyan desə də, deməsə də, Paşinyanın Blinken və Avropa Komissiyasının rəhbəri ilə görüşü regionda Rusiya-Qərb qarşıdurmasına çevriləcək və bundan ən çox Ermənistan əziyyət çəkəcək. Qərbin Brüssel görüşü ilə artıq Ermənistanın açarını ələ keçirdiyini deyən ekspertlər hesab edirlər ki, bu da Cənubi Qafqaz bölgəsi üçün yaxşı heç nə vəd etmir. Əlbəttə, bunun Rusiya-Ermənistan münasibətlərini daha da kəskinləşdirəcəyini deyənlər də, Rusiyanın Ermənistna siyasi, iqtisadi təzyiqlər göstərəcəyini istisna etməyənlər də var.
“Əvvəlcədən proqnoz verilirdi ki, Rusiya bunu sakit qarşılamayacaq və müxtəlif vasitələrlə buna mane olmağa çalışacaq”
Məsələyə şərh verən “Novoye vremya” qəzetinin baş redaktoru Şakir Ağayev “Bakı-Xəbər”ə bildirdi ki, Paşinyanın bu addımı Cənubi Qafqazda böyük problem yaradacaq. “Sözsüz ki, aprelin 5-də keçirilən görüşdə Ermənistana verilən vədlər, ayrılan yardımlar və sair məsələnin görünən tərəfidir. Amma onun görünməyən tərəflərinin olduğunu da istisna etmirəm və əminəm ki, elan olunmayan tərəflər hərbi yardımlarla, Ermənistnın hərbi strukturunun yenilənməsi və sairlə bağlıdır. Bunların hamısı, təbii ki, bir məqsədə xidmət edir. Brüssel görüşünün məqsədi heç kəsə sirr deyil və Rusiya da dəfələrlə bu barədə bəyanat verib, Paşinyanı bu görüşdən çəkindirməyə çalışıb.
Ermənistanın indiki rəhbərliyi isə dəfələrlə deyib ki, məqsəd bu ölkənin Qərbə inteqrasiyasından, Amerika və Avropa ilə əlaqələrin gücləndirilməsindən ibarətdir. Qərb tərəfindən Paşinyanın hakimiyyətə gətirilməsində də məqsəd elə bundan ibarət idi ki, Ermənistanı tamamilə ələ keçirsinlər. Bu məqsədə çatmaq üçün Paşinyan real addımlar atmalı idi və artıq atır da. Bu proseslərdə əvvəlcədən proqnoz verilirdi ki, Rusiya bunu sakit qarşılamayacaq və müxtəlif vasitələrlə buna mane olmağa çalışacaq. Mane olmaq yollarından biri, dediyimiz kimi, Ermənistanda olan Rusiyayönümlü qüvvələrin aktivliyinin artırılması idi. Bu qüvvələr də Sarkisyan, Köçəryan və onların ətrafında olanlardır. Sarkisyanın öz müsahibəsində Paşinyanı ittiham etməsi, bununla Paşinyanın Ermənistanı ağır duruma salmasını ifadə etməsi buna yönəlmiş addımlardır. Sarkisyan bu müsahibədə həm demək istəyib ki, Brüssel görüşləri Ermənistanı daha ağır duruma salacaq, həm də özünün Paşinyana qarşı olan kəskin münasibətini ifadə edib”-deyə Ş. Ağayev bildirdi.
Ş.Ağayev qeyd etdi ki, müxalifətdə olan Sarkisyan və Paşinyanı istəməyən digər qüvvələr Brüssel görüşündən istifadə edib ona qarşı kəskin münasibətlərini açıqlayırlar, eyni zamanda öz iddialarını həyata keçirmək niyyəti güdürlər. “Bu hələ Rusiyayönümlü qüvvələrin ilkin bəyanatlarıdır. Yəqin ki, məsələlər dərinləşdikcə, Paşinyan vasitəsilə Qərbin Ermənistana müdaxiləsi gücləndikcə, maraqları daha çox təmin olunduqca daha ciddi addımların şahidi olacağıq. Bu istər iqtisadi, istər sosial, istər humanitar sahədə özünü göstərəcək. Hətta ola bilsin ki, məsələ hərbi müdaxiləyə qədər gedib çıxsın. Təbii, hərbi müdaxilə son anın məsələsidir. Əgər mövcud problem həll olunmazsa, bu istisna olunmur. Amma gözlənilən addımdır”-deyə Ş.Ağayev bildirdi.
İradə SARIYEVA
