Ermənistan Rusiya ilə diplomatik münasibətləri son nöqtəyə gətirdi...

“Ermənistanda şüurun yenidən qurulmasına başlanılıb, mədəni vektorun dəyişməsindən danışılır, milli kimliyin əsaslarına yenidən baxılır, sonra Rusiyaya münasibət yenidən nəzərdən keçirilir”. Belə bir açıqlama ilə rusiyalı politoloq Sergey Panteleyev çıxış edib. 

O iddia edir ki, sözügedən prosesi dayandırmaq mümkündür: “Bu, Ukraynanın 2004-2014cü illərdə qət etdiyi yolun yarısıdır. Bunu dayandırmaq üçün hələ şansımız var”.
 Panteleyev qeyd edib ki, Ermənistan və Rusiya iqtisadiyyatlarının güclənməsini inkişaf etdirmək, bir-birini dəstəkləmək, xarici vədlərin risqlərini dərk etmək lazımdır: “Ermənistanın qərarının suveren olacağı və erməni xalqının qərar verəcəyi tezisinə gəlincə, deyə bilərəm ki, çətinlik ondan ibarətdir ki, istifadə olunan texnologiyalar suveren qərarın qəbuluna imkan vermir. Ruslarla ermənilərin düşmən olmasını istəmiriksə, şirnikləndirici yola getməyə ehtiyac yoxdur”. Amma digər rusiyalı politoloq İqor Korotçenko  bildirir ki, Ermənistanı dayandırmaq artıq mümkün deyil: “Son günlər Moskva müxtəlif kanallar vasitəsilə, o cümlədən açıq şəkildə İrəvana 5 apreldə Brüsseldə keçiriləcək Ermənistan-Aİ-ABŞ görüşündən sonra de-fakto (sonra de-yure) siyasi və hərbi ittifaqın yaradılmasının həddən artıq arzuolunmazlığı barədə xəbərdarlıq edib - bu, Rusiyanı siyasi və iqtisadi baxımdan cavab verməyə məcbur edəcək. Ən azı belə bir xəbərdarlıq Ermənistana çox əvvəldən, bir neçə il öncədən edilməli idi, indi yox. Görünür, qatar artıq yola düşüb və Nikol Paşinyan, deyəsən, bütün siyasi seçimini edib. Xəbərdarlıq əvəzinə biz büdcənin məşhur personajlarının Rusiya media məkanında və televiziyalarında “əsrlik dostluq” və “erməni xalqının müdrikliyi” ilə bağlı çoxsaylı rituallarını, Paşinyanın ünvanına küsmələr, ictimai söyüşlər eşitdik. Eləcə də Paşinyanı “devirmək” niyyətində olan, lakin reallıqda yalnız öz müxalif fəaliyyətlərinin şəxsi monetizasiyası (məlum sxemlərə görə) ilə məşğul olan erməni siyasi çılğınların İrəvanda küçə rəqslərini gördük. İndi hadisələr həddindən artıq sürətlənir və yalnız gələcəkdə necə və nə olacağını təxmin etmək olar. Proqnoz mənfidir”. Elə “armenianreport” portalı da yazır ki, Rusiya-Ermənistan siyasi münasibətləri qırılma nöqtəsindədir. Bu fonda da Rusiya Ermənistana qarşı açıq hədə siyasətinə keçib: “Məhz bu üzdən Rusiyanın Ermənistandakı səfiri Sergey Kopırkin ölkəmizin Xarici İşlər Nazirliyinə çağırılmalıdır. Çünki o, rus imperializminin ənənəsinə tam uyğun gəlsə də, diplomat statusu ilə açıq-aşkar bir araya sığmayan bəyanatlar səsləndirir. Bu mənada Kopırkinlə, məsələn, Rusiyanın BMT-dəki daimi nümayəndəsi Vasili Nebenzya arasında heç bir fərq yoxdur. Yeri gəlmişkən, o, artıq Ukraynada xüsusi hərbi əməliyyatın məqsədlərindən birinə - demilitarizasiyaya nail olunduğunu bəyan edib. O, Rusiyanın Ukrayna ərazisində törətdiyi cinayətləri açıq və həyasızcasına belə qiymətləndirir. Nə üçün bu ölkə hələ də BMT Təhlükəsizlik Şurasından çıxarılmayıb, bu, nəvələrimizin bugünün tarixi ilə tanış olduqdan sonra bizə verəcəyi sualdır.
 Bizim nəvələrimiz Rusiya işğalından azad edilmiş Ermənistanda yaşamağa layiqdirlər. Təəssüf ki, işğal hələ də davam edir. Və onun əsas amili Gümrüdə 102-ci Rusiya hərbi bazasının olmasıdır. Ona görə də Ermənistanın milli təhlükəsizliyinin təmin edilməsi və ölkəmizin real müstəqillik əldə etməsi baxımından ən vacibi onun çıxarılması məsələsidir. Kopırkinin açıqlamaları isə bu prosesi sürətləndirməyin vacibliyini sübut edir. Axı o, rusiyalı diplomat üçün adiləşmiş absurd tərzdə Ermənistan parlamentinin sədri Alen Simonyana qarşı ittihamlar məsələsinə münasibət bildirib. Simonyan  Ermənistanı müdafiə etmək vaxtı gələndə Rusiyanın bunu etmədiyini bəyan edib. “Sonra biz bir daha ümid etdik ki, bizi müdafiə edəcəklər, sonra yenə aldatdılar və sonda gəlib Ermənistanı “xilas etmək” üçün bizi artıq Ermənistan ərazisində yeni müharibəyə sürükləməyə çalışdılar”, - Simonyan deyib. Amma həqiqəti etiraf etmək Rusiya diplomatiyasının öyrəşdiyi iş deyil. O, dayanmadan yalan danışır, hər hansı cinayətinə haqq qazandırmağa çalışır. O, Ukraynaya qarşı müharibənin əsl səbəbləri barədə yalan danışıb, yalan danışır və yalan danışmağa davam edəcək. O, həmçinin “Crocus City Hall”da terror aktını sifariş edənlər haqqında yalan danışır. Aydındır ki, Kopırkinə yalan danışmaq da tapşırılıb. Və bu məsuliyyətin öhdəsindən çox uğurla gəlir. O, aşkar olanı inkar etməyə çalışır. Və bütün bunlardan sonra biz səfir Kopırkinin Alen Simonyanın ittihamlarına cavab olaraq necə kobudluğa yol verdiyini görürük. Burada qeyd edək ki, Ermənistanın Rusiyadakı heç bir səfiri heç vaxt özünə Dövlət Dumasının rəhbərliyinin ünvanına belə çıxışlar etmək icazəsi verməyib. Beləliklə, Kopırkini Xarici İşlər Nazirliyinə çağırmaq və ona nota vermək vaxtıdır. Düzdür, Polşada olduğu kimi burada da baş verə bilər. Məlum olduğu kimi, Ukraynanı hədəf alan Rusiya raketləri Polşanın hava məkanını dəfələrlə pozub. Amma Rusiyanın bu dövlətdəki səfiri hadisəyə cavab verməkdən boyun qaçıraraq ölkəni tamamilə tərk edib... Baxmayaraq ki, Varşavadan qaçıb demək daha düzgün olardı. Rəsmi olaraq Rusiyanın Polşadakı səfiri Sergey Andreyev 9 günlük ölkəni tərk edib. Bu, martın 26-da, o, Polşa Xarici İşlər Nazirliyində görünməkdən imtina etdikdən bir gün sonra baş verib. Amma Rusiya səfirinin departamentə çağırıldıqdan sonra ölkəni tərk etməsini artıq Polşa Xarici İşlər Nazirliyinin rəhbəri Radoslav Tsikorski şərh edib. “Cənab səfir Andreyev özü mədəniyyətini və peşəkarlığını sübut etdi. Eşitdiyimə görə, o artıq ərazimizi tərk edib”. Ümid edirəm ki, səfir Kopırkin ölkəmizdən gedəndən sonra Ermənistanın xarici işlər naziri Ararat Mirzoyan da eyni şeyi deyəcək”.

Nahid SALAYEV