Ermənistan Qərbin fitnəsi ilə Qafqazı yenidən qana bulamaq istəyir...
Məlum olduğu kimi, Azərbaycan Müdafiə Nazirliyi bildirir ki, Ermənistan Azərbaycanla sərhədə canlı qüvvə, texnika və artilleriya toplayır və Bakı istənilən təxribata qətiyyətlə cavab verəcək. Qurumun mətbuat xidmətindən daha sonra qeyd olunub:
“Son vaxtlar Ermənistan silahlı qüvvələrinin canlı qüvvəsinin, zirehli texnikasının, artilleriya qurğularının və digər ağır atəş gücünün cəmləşməsi və qoşunlarının Ermənistan-Azərbaycan şərti dövlət sərhədinin müxtəlif istiqamətlərində intensiv hərəkəti müşahidə olunur”. Nazirlik Ermənistan hakimiyyətinə xəbərdarlıq edib ki, Azərbaycana qarşı istənilən hərbi təxribat cəhdinin qarşısı qətiyyətlə alınacaq. Ermənistan tərəfindən Azərbaycana qarşı aqressiv ritorikanın artdığı qeyd edilib və əlavə edilib ki, Ermənistan və onun himayədarları vəziyyətin gərginləşməsinə və istənilən təxribata görə bütün məsuliyyəti daşıyacaqlar. Baş verənlərə nəzərə salan “Vestnik Kavkaza” nəşri yazır ki, ABŞ dövlət katibi Entoni Blinken və Avropa Komissiyasının rəhbəri Ursula fon der Lyayenin iştirakı ilə Ermənistanın baş naziri Nikol Paşinyanla Brüssel görüşü yaxınlaşdıqca, Ermənistan-Azərbaycan sərhədlərində gərginlik artır: “Xarakterikdir ki, sərhəddə hərbi mövcudluğun artması faktlarını təkcə Ermənistan Müdafiə Nazirliyi deyil, həm də sərhəddəki vəziyyətə nəzarət etməyə rəsmən çağırılan avropalı “müşahidəçilər” təkzib edir. Moskva Dövlət Universitetinin Dünya Siyasəti fakültəsinin beynəlxalq təhlükəsizlik kafedrasının professoru, siyasi elmlər doktoru Aleksey Fenenko əmin olduğunu bildirib ki, Ermənistan Azərbaycana qarşı hərbi təxribat hazırlayır və onun məqsədi İrəvanın revanşist planlarına Qərbin real köməyinə nail olmaqdır: “Ermənistanın məqsədi bəllidir: Qərbə İrəvanın anti-Rusiya siyasətinin əvəzini ödəmək məcburiyyətində olduğunu göstərmək. Nikol Paşinyan da Blinken və fon der Lyayenlə görüşdə deməyə oxşar fikir hazırlayır. O deyəcək ki, ABŞ və Aİ-yə Ermənistanın qismində Rusiyanın əleyhdarı lazımdırsa, Azərbaycanla qarşıdurmada İrəvanı praktiki olaraq dəstəkləməlidirlər. Bundan başqa, Azərbaycana qarşı düşmənçilik törədilsə belə, istənilən halda üstünlük Azərbaycan tərəfində olacaq. Amma yenə də İrəvan özünü Qərbin maksimum dəstəyinə ehtiyacı olan qurban kimi təqdim etməyə can atacaq. Bu, gözlənilən təxribatın ikinci məqamıdır - kasıb, kiçik Ermənistanın Qərbdən hərbi yardıma ehtiyacı olduğunu göstərmək üçün lazımdır”. Aleksey Fenenko vurğulayıb ki, İrəvanın belə siyasəti Rusiya üçün böyük təhlükələr yaradır. “Nikol Paşinyan ümid edir ki, Qərb onu yenidən silahlandıracaq, bunun sayəsində gec-tez Qarabağın qisasını almağa başlayacaq. Bu, özlüyündə region üçün çox təhlükəlidir. Rusiya üçün bu, həm də daha təhlükəlidir. Çünki bu, Ermənistanda Rusiyanın mövqelərini itirməsi demək olacaq. Cənubi Qafqazda yeni müharibə Rusiyaya müstəsna ziyan vuracaq”, - deyə politoloq yekunlaşdırıb.
Digər politoloq Aleksandr Perinciyev isə qeyd edir ki, Ermənistan hökuməti Azərbaycana qarşı öz təşəbbüsü ilə deyil, Qərbin sifarişi ilə hərbi təxribat hazırlayır. "Görünür, Paşinyan Qərb liderləri ilə görüşdən əvvəl regionda iğtişaşların olması barədə göstəriş verib. Blinken və fon der Lyayen Ermənistanın müdafiəyə ehtiyacı olduğunun şahidi olmalıdırlar. Mahiyyət etibarı ilə bunlar eyni köhnə nümunələrdir, onlardan təkcə Rusiyaya qarşı yox, həm də Azərbaycana qarşı istifadə olunur. Görünən odur ki, Azərbaycan həmişə Qərb dövlətləri ilə münaqişəyə girməməyə çalışıb”, - deyə o bildirib. Hərbi politoloq burada Qərbin Azərbaycana təzyiqlərini artırmaq istəyini görür: “Azərbaycan NATO-nun hərbi bazalarının öz ərazisində yerləşdirilməsinə razılıq vermədi. Birincisi, bu bazalar Bakının suverenliyinin azaldılması faktoruna çevrilərdi ki, bunu prezident İlham Əliyev də yaxşı başa düşür. İkincisi, onların yerləşdirilməsindən sonra Azərbaycan sadəcə olaraq düşmənə çevriləcəkdi. Ermənistan Cənubi Qafqazda zəif halqa olduğu üçün Qərb bundan Azərbaycana qarşı istifadə edəcək, sonra da deyəcək: “Biz sülh istəyirik və Ermənistanın müdafiəsi üçün tədbirlərimizi görəcəyik”. Eyni zamanda, Ermənistan qoşunlarının əvvəlcədən hesablanmış məğlubiyyəti ilə Ermənistanın Azərbaycana hücumu Rusiyanın ünvanına yeni tənqidlərə səbəb olacaq. “İstənilən silahlı təxribat sualı gündəmə gətirmək üçün istifadə olunur: Bəs Rusiya, Ermənistanı niyə qorumur və Gümridəki 102-ci baza nəyə lazımdır? Bu, o qədər primitiv və yöndəmsizdir ki, Qərb Ermənistan vasitəsilə indi sabitliyi pozacaq. Cənubi Qafqazda Rusiya hərbçilərinin Ermənistanda olması üçün problemlər yaradır. Perspektivlər elədir ki, Ermənistan nəinki ikinci Ukrayna, həm də ikinci Liviya kimi çıxış edə bilər”, deyə ekspert bildirir. Regionda sabitliyin pozulması həm də Cənubi Qafqazda iqtisadi fəaliyyətə maneələr yaratmaq məqsədi daşıya bilər: “Şimal-Cənub nəqliyyat dəhlizi güclü, qlobal layihədir - Rusiya, Azərbaycan, İran və Hindistana öz iqtisadi maraqlarını reallaşdırmaq və yüksək gəlir əldə etmək imkanı verir. Beləliklə, Azərbaycana qarşı təxribatların həm də geoiqtisadi aspekti var. Qərb Şimal-Cənubun məhv edilməsində maraqlıdır, necə ki, bir vaxtlar “Şimal axını” partladılıb. Layihənin itirilməsi həm Rusiyanı, həm də İranı qazancdan məhrum edəcək və Azərbaycan mərkəzdə yerləşdiyi üçün zərər görəcək. Bütün bu motivlər birlikdə götürüldükdə ona gətirib çıxarır ki, Qərb indi Ermənistanla Azərbaycan arasında münaqişənin təzələnməsi üçün bütün səylərini göstərir”.
Tahir TAĞIYEV
