Lavrovla Patruşev Paşinyanın Qərblə sövdələşmələrini açdı...
Təbriz Musayev: “Qərbin himayəsi, birbaşa dəstəyi olmasa, Ermənistan hakimiyyəti buna cəsarət etməz”
Ermənistanın Qərb siyasəti rəsmi Moskvanı əməlli-başlı özündən çıxarıb. İrəvanın hərəkətlərinə indiyə qədər Peskov və Zaxarova səviyyəsində münasibət bildirilsə də, Paşinyanın Rusiyanın əleyhinə apardığı siyasətə artıq ən yüksək səviyyədə reaksiya verilir.
Rusiya xarici işlər naziri Sergey Lavrov bildirib ki, Qərb dövlətləri Ermənistana elə-belə qucaq açmırlar. Onlar Ermənistanı Rusiyaya qarşı qoymağa çalışırlar: “Hazırda Qərb aktiv şəkildə Ermənistana arvadbazlıq edir və Rusiyaya qarşı onunla dostluq etmək istəyir. Biz Ermənistanın KTMT-nin üzvü, yaxın müttəfiqimiz, strateji tərəfdaş kimi xarici partnyorlarla münasibətləri necə quracağına təkbaşına qərar verməsinin tərəfdarıyıq. Onun xarici tərəfdaşlarının dairəsi ilə bağlı heç bir qərəzimiz yoxdur. Amma həmin əlaqələr Rusiyaya qarşıdırsa, onda bu, bizim maraqlarımıza uyğun deyil”.
Rusiya Təhlükəsizlik Şurasının katibi Nikolay Patruşev də bənzər mövqe sərgiləyib: “Azərbaycanla Ermənistan arasında nizamlanma o zaman mümkündür ki, kənar qüvvələr regional məsələlərə müdaxiləni dayandırsın. Qərbin addımları vəziyyəti daha da dərinləşdirir”.
Məsələ ilə bağlı baki-xeber.com-a açıqlama verən İrəvan Azadlıq Təşkilatının sədri Təbriz Musayevin fikrincə, bütün bunlar Moskva-İrəvan münasibətlərinin nə qədər gərgin olmasının göstəricisidir: “Əvvəllər Rusiyanın ən ali rəsmiləri buna belə kəskin münasibət bildirmirdilər. Bir sıra hallarda Paşinyanın Rusiyaya qarşı demarşlarını görməzdən gəlirdilər. Yaxud da ən aşağı ranqda buna münasibət bildirirdilər. Görəndə ki, Paşinyan bunda qərarlıdır, artıq qərb dövlətlərindən Ermənistana silah tədarükü rəsmiləşir, Avropa İttifaqı Müşahidə Missiyasının tərkibi genişlənir, o zaman Lavrov və digər Rusiya rəsmiləri sərt açıqlamalarla çıxış etdilər. Nəticədə birbaşa Qərbi hədəf göstərdilər. Həqiqətən də Qərbin himayəsi, birbaşa dəstəyi olmasa, Ermənistan hakimiyyəti buna cəsarət etməz. O üzdən, Rusiya hakimiyyəti birnöv rəsmi İrəvanla açıq konfrantasiyaya gedir. Nəzərə alsaq ki, Rusiyanın Ermənistanda təsir imkanları böyük və çoxşaxəlidir. O zaman bunun Paşinyan üçün ağır nəticələri ola bilər”.
Vidadi ORDAHALLI
