Xankəndi separatçılarının "Dövlət Dram Teatrları" da var imiş - ABŞ qastrolu...
Zülfiyyə Eldarqızı: “Məqsədləri də odur ki, özlərini “qaçqın teatrı” kimi qələmə versinlər və Azərbaycana qarşı çirkin kampaniyalarını davam etdirsinlər”
Separatçıların yerli əhali olan azərbaycanlıları Xankəndidən minbir zülm verərək qovduğu, evlərinə, mülklərinə sahib çıxdığı məlum faktdır. Azərbaycanlılar doğma şəhərlərini məcburən tərk etdikdən sonra separatçılar bütün varidatımıza əl uzadıblar.
Sovet dövründə yaradılan M. Qorki adına Xankəndi Dövlət Dram Teatrının özünü də, Azərbaycanın puluna inşa edilən binasını da mənimsədilər. M. Qorki adına Xankəndi Dövlət Dram Teatrının adını saxtalaşdıraraq “Vaqram Papazyan adına Stepanakert Dövlət Dram Teatrı” adı veriblər. Xatırladaq ki, 3 dekabr 1982-ci ildə M.Qorki adına "Şərəf nişanı" ordenli bu Dövlət Dram Teatrının yaradılmasının 50 illiyi ilə əlaqədar olaraq teatrın artistlərinə fəxri adlar verilib. Onu da qeyd edək ki, M.Qorki adına Xankəndi Dövlət Dram Teatrının binası XX əsr abidəsi kimi Azərbaycan Respublikası Nazirlər Kabinetinin 2 avqust 2001-ci il tarixli, 132 nömrəli qərarı ilə "Yerli əhəmiyyətli daşınmaz tarix və mədəniyyət abidələrinin siyahısı"na daxil edilib, həmin siyahıda abidənin inventar №-si 5015-dir.
İndi keçək, “Vaqram Papazyan adına Stepanakert Dövlət Dram Teatrı”nın sərgilədiyi şoulara. Erməni mediası yazır ki, bu teatrın truppası (?) Nyu-Yorkda yaşayan aktrisa və rejissor Karine Koçaryanın təşəbbüsü ilə ABŞ-a qastol səfərinə gedib. Onların Nyu-York, Nyu-Cersi, Filadelfiya, Vaşinqton, Los-Anceles şəhərlərində "Göydən üç alma düşdü" adlı tamaşası göstərdikəri yazılır. “Arsax” adlı nəsnənin mövcud olmadığını unudan ermənilər “Arsax teatrının” təqdim etdiyi tamaşanı tərifləyirlər. Deyirlər ki, bu teatrın “markası” qorunmalıdır. Yəni bu sözdə teatrın separatizm maraqlarına xidmət etdiyi aydındır.
“Onlar M.Qorki adına Xankəndi Dövlət Dram Teatrının binasını zəbt etmişdilər və 30 il o binada qanunsuz fəaliyyət göstərdilər”
Sənətşünaslıq üzrə fəlsəfə doktoru, bədii qiraət ustası, tanınmış aktrisa Zülfiyyə Eldarqızı “Bakı-Xəbər”ə açıqlamasında bildirdi ki, qondarma teatrın ABŞ-a “qastrol” səfərinin təşkil edilməsində daha çox siyasi maraq güdülür: “Hesab edirəm ki, onların “qasrolu” ABŞ-dakı erməni diasporu və oradakı erməniyönlü şəxslər tərəfindən təşkil edilib. Məqsədləri də odur ki, özlərini “qaçqın teatrı” kimi qələmə versinlər və Azərbaycana qarşı çirkin kampaniyalarını davam etdirsinlər. Demək istəyirlər ki, “hələ Arsax var, biz varıq”. Bütün bunlar öz məkrli niyyətlərini reklam etmək kimi böyük prosesin tərkib hissəsidir. Bu “teatrın” ABŞ-a “qastrolunu” təşkil edənlərin niyyəti odur ki, Xankəndidə “əmlaklarının qaldığını” , “teatr binalarının olduğunu” “sübut etsinlər”. Halbuki, onlar M.Qorki adına Xankəndi Dövlət Dram Teatrının binasını zəbt etmişdilər və 30 il o binada qanunsuz fəaliyyət göstərmişdilər, həmin o bina Azərbaycanın sərvətidir. İndi də belə rəy yaratmaq istəyirlər ki, guya Xankəndidə onların əmlakı və sair qalıb. Sabah bu iddiaları qaldırmaq niyyətləri ola bilər”-deyə Z.Eldarqızı qeyd etdi.
Aktrisa bildirdi ki, Prezident İlham Əliyevin Xankəndidə Azərbaycanın Dövlət Bayrağını qaldırması, himnimizin orada səslənməsi, dövlət gerbimizin məlum binada öz yerini tutması erməniləri və onların havadarlarını möhkəm narahat edir. “Bütün bunlarla yanaşı, 8 noyabrda Xankəndidə möhtəşəm Zəfər paradı keçiriləcək. Onlar bu dəfə paylarını bir daha alacaqlar. Hesab edirəm ki, onlar pis niyyətlərindən, bölücülükdən əl çəkməyincə, bu problem qiyamət gününədək bizimlə olacaq”-deyə Z.Eldarqızı əlavə etdi.
O, həmçinin dedi ki, erməni “teatrı” “qaçqın teatrı” ola bilməz, çünki zorla çıxarılmayıblar, özləri könüllü gediblər. “Əgər ABŞ və başqa ölkələr həqiqi qaçqın teatrı görmək istəyirdilərsə, gəlib Ağdamdan, Şuşadan, Füzulidən, İrəvandan didərgin salınan teatlara baxaydılar. Gerçək qaçqın teartlar Azərbaycan teatrları olub”-deyə Z.Eldarqızı qeyd etdi.
İradə SARIYEVA
