İşləməyənlərə dəfn müavinətlərinin verilməsi təklif edildi - nazir də müsbət yanaşdı...
İşləməyən vətəndaşlara dəfn müavinətlərinin verilməsi təklif olunub. Bu təkliflə Milli Məclisin Əmək və sosial siyasət komitəsinin sədri Musa Quliyev komitənin iclasında çıxış edib.
Bəzi kateqoriyadan olan vətəndaşlara dəfn müavinətlərinin verilməsini təklif edən deputat deyib: “Azərbaycanda vətəndaşlara yüksək səviyyədə qayğı göstərilir. Pensiya, sosial müavinət alanlar, işləyənlər, işsizlikdən sığorta alanlar dəfn müavinəti ilə təmin olunurlar. Təxminən 10-12 milyon vəsait lazımdır ki, işləməyən və ya sığorta məbləği az olan vətəndaşlara dəfn müavinəti verilsin”.
M.Quliyev vurğulayıb ki, bununla bağlı Maliyyə Nazirliyinə və Əmək və Əhalinin Sosial Müdafiəsi Nazirliyinə məktub göndəriləcək.
Əmək və əhalinin sosial müdafiəsi naziri Sahil Babayev təklifə münasibətdə bildirib: “Hazırda pensiyaçılara, işləyən və digər şəxslərə dəfn müavinəti nazirlik tərəfindən verilir. Yalnız işləyəməyən, hər hansı fərdi hesabda ödənişi olmayan şəxslərə bu vəsait bizim nazirlik tərəfindən ödənilmir. Bu məsələni dəfələrlə Milli Məclisdə gündəmə gətiriblər. Sırf maliyyə təminatı baxımından Maliyyə Nazirliyi ilə növbəti mərhələdə müzakirələrimiz olacaq. Maliyyə təminatı olacağı təqdirdə biz bunu sürətli şəkildə təmin edə biləcəyik”.
ZÜMRÜD
