Əliyev islam dünyasını birləşdirmək səylərini daha konkretləşdirdi...
Məhərrəm Zülfüqarlı: “Dövlətimiz səylərini islam birliyinin, islam həmrəyliyinin gücləndirilməsinə yönəldib”
“Biz İslam həmrəyliyi istiqamətində ardıcıl fəaliyyət göstəririk. Azərbaycan İslam dünyasının birləşməsi, İslam həmrəyliyinin gücləndirilməsi üçün böyük səylər göstərir”. Bu fikirləri Prezident İlham Əliyev “Xarıbülbül” VII Beynəlxalq Musiqi Festivalında çıxışında səsləndirib.
Prezident Əliyev qeyd edib: “Şuşa şəhərinin İslam dünyasının mədəniyyət paytaxtı olması bizə əlavə imkan verəcək ki, öz mədəniyyətimizi həm müsəlman ölkələrinin ictimaiyyətinə, həm də dünya ictimaiyyətinə çatdıraq”.
“Azərbaycan dövləti bu yöndə konkret mövqeyini bəyan edib və hesab edirəm ki, bu, islam həmrəyliyinin möhkəmlənməsinə gedən yolda bir nümunədir”
AVCİYA-nın vitse-prezidenti, tarixçi alim, professor Məhərrəm Zülfüqarlı “Bakı-Xəbər”ə şərhində bildirdi ki, Azərbaycan XX əsrdə ikinci dəfə dövlət müstəqilliyi qazandıqdan sonra islam həmrəyliyi məsələsini, islam dünyasının birləşdirilməsi ideyasını irəli sürüb və bu istiqamətdə səylərini davam etdirib. “Azərbaycan dövləti islam dünyasının həmrəyliyi istiqamətində mühüm töhfələr verib. Bakıda İslam Həmrəyliyi Oyunları keçirilib, konfranslar, tədbirlər düzənlənib. Biz mütəmadi olaraq bu sahədə işləri davam etdiririk.
Şuşa 2024-cü ildə “İslam dünyasının mədəniyyət paytaxtı” elan edilib. Bu, Azərbaycan dövlətinin islam həmrəyliyinin güclənməsinə, islam birliyinin daha da möhkəmlənməsinə, qırılmaz tellərlə bir-birinə bağlanmasına verdiyi böyük töhfələrdən biridir. Şuşanın da belə bir status daşımasının ən böyük əhəmiyyəti odur ki, digər islam xalqları bizim, biz də onların mədəniyyəti, musiqisi, incəsənəti, ədəbiyyatı, tarixi ilə daha yaxından tanış olmaq imkanı əldə edəcəyik. Bu həm də islam xalqlarının mədəni inteqrasiyası üçün çox münbit şərait yaradır. Dövlətimiz səylərini islam birliyinin, islam həmrəyliyinin gücləndirilməsinə yönəldib və biz bunun uğurlu nəticələrinin şahidi oluruq.
Azərbaycan dövləti bu yöndə konkret mövqeyini bəyan edib və hesab edirəm ki, bu islam həmrəyliyinin möhkəmlənməsinə gedən yolda bir nümunədir”-deyə M.Zülfüqarlı qeyd etdi.
M.Zülfüqarlının sözlərinə görə, hələ Azərbaycan Xalq Cumhuriyyəti yaranmazdan əvvəl Azərbaycan xalqının ideoloji baxışlarını, ideoloji dünya görüşlərini işləyib hazırlayan qurucu babalarımız olub, bunlardan biri də Əli bəy Hüseynzadədir. O vurğuladı ki, Əli bəy Hüseynzadə türkləşmək, islamlaşmaq, müasirləşmək ideyasını ortaya qoyub, Məhəmməd Əmin Rəsulzadə isə bir qədər dəyişiklik edərək, islamlaşmaqla müasirləşmənin yerini dəyişərək türkləşmək, müasirləşmək və islamlaşmaq ideyasını irəli sürüb. M.Zülfüqarlının qeyd etdiyinə görə, bu onu göstərir ki, bizim Şərqdə yaranmış Demokratik Respublikamızın bayrağında da, ideologiyasında da islam hümməti məsələsi var, xalqımız da VIII əsrin əvvəlindən başlayaraq islamlaşmağa başlayıb. Professor qeyd etdi ki, 705-ci ildə Şimali Azərbaycan tam olaraq ərəblər tərəfindən tutulduqdan sonra islam qəbul olunub. “Bilirsiz ki, müasir dövr dünyaya inteqrasiya etmək, dövlət maraqlarından çıxış edərək tərəfdaşlar, müttəfiqlər toplamaq vacib bir məsələ olub. Bu da ondan irəli gəlib ki, müxtəlif beynəlxalq təşkilatlarda bizim haqq işimizi müdafiə edənlər olsun. Bu baxımdan biz həm Qərb ölkələri, həm islam dünyası, həm də qardaş türk respublikaları ilə əməkdaşlığı inkişaf etdiririk. Yadda saxlamaq lazımdır ki, Ermənistan Azərbaycan-Dağlıq Qarabağ münaqişəsinin başlandığı ilk dövrdən İslam Konfransı Təşkilatı ölkələri Azərbaycanın haqq işinə dəstək verib, Ermənistanı işğalçı dövlət kimi tanıyıblar. Halbuki, Qərb ölkələri bunu etməyiblər. Bu baxımdan da, Qafqazda ən güclü dövlət olan Azərbaycanın çoxşaxəli siyasətinin bir istiqaməti islam ölkələri ilə əlaqələri genişləndirməkdir. Həm mədəni, həm iqtisadi, həm siyasi, həm də digər sahələrdə əlaqələri möhkəmləndirməklə Azərbaycan daha güclü olur. Yəni Azərbaycanın zəif vaxtlarında İslam Konfransı Təşkilatına daxil olan ölkələr ölkəmizin haqq işinə dəstək verirdisə, indi güclü bir dövlətə çevrildikdən sonra, əlbəttə, bu əməkdaşlıq daha da inkişaf etdirilir. “Xarıbülbül” VII Beynəlxalq Musiqi Festivalınının Qarabağda, Şuşada keçirilməsi müsbət əhəmiyyət daşıyır. Çünki Azərbaycana qardaş münasibəti bəsləyən dövlətlər, xalqlar gəlib öz gözləri ilə Qarabağı görürlər, bir daha erməni vandalizminin şahidi olurlar. İslam ölkələri bir daha əmin olurlar ki, əvvəldən düzgün mövqe tutaraq Azərbaycanın haqq işini müdafiə ediblər. Bütün bunlar Azərbaycanın inkişafı üçündür, dövlət maraqlarına uyğundur, hər bir vətəndaş da buna dəstək verməyə borcludur”.
İradə SARIYEVA
