Xarici turistləri ictimai nəqliyyatda narazı salan nələrdir?..
Elxan Əliyev: “Turistlər ictimai nəqliyyatın digər növləri olan metro və avtobuslardan da narazıdır, səbəb isə daşıyıcıların sayının az olmasıdır”
Ölkənin gözəlliyi, tarixi abidələri, zəngin mədəniyyəti və s. turistlərin ölkə seçimində önəmli faktorlardandır. Amma davamlı turist axını üçün ölkələrdə turistlərə göstərilən xidmət də onları qane etməlidir. Günü-gündən ölkəmizə gələn turistlərin sayı artmaqdadır, ölkə olaraq bu sahə bizdə prioritetdir.
Gələn turistlər razı getməlidir ki, digərlərinə də məsləhət görsün. Turistlərin narazı qaldığı məqamlar açıqlanıb. Dövlət Statistika Komitəsinin məlumatına əsasən, turistlərin ən çox narazı qadığı xidmət növü ictimai nəqliyyat olub. Avtobusla sərnişin daşınmasından 9,2 min nəfər, taksi xidmətindən 5 min 517 nəfər, metropolitendən isə cəmi 2 min 374 nəfər narazı qalıb. Metrodan ən çox narazılıq edənlər Rusiya, Hindistan və Türkiyə vətəndaşları olub. Eyni nisbət restoran xidmətlərindən narazı qalanlara da aiddir. Turistlərin bir çoxu xidməti və daimi taksilər arasındakı qiymət fərqinin çox olduğunu əsas gətirib.
“Gediş haqqının baha olması, avtomobilin şəraitsiz, sürücünün yolu tam tanımaması turistlərin narazılığına səbəb olur”
Sosial sahə üzrə ekspert Elxan Əliyev “Bakı-Xəbər”ə açıqlamasında bildirdi ki, turistləri narazı salan əsas məqam taksi xidmətidir: “Gediş haqqının baha olması, avtomobilin şəraitsiz, sürücünün yolu tam tanımaması turistlərin narazılığına səbəb olur. Taksi sürücüsü turist müştəri görən kimi 3-4 dəfə baha qiymət deyir. Ərəb turistlər ilk vaxtlar gələndə bu kimi problemlər yaşanmırdı, çünki onlar qiymətdən xəbərsiz idilər və hansı məbləğ təklif olunsa, razılaşırdılar. Amma müəyyən kütlə gəlib-getdikdən sonra məlumatlı oldular. Qiymət və keyfiyyətdə fərq olanda, narazılıq edirlər.
Turistlər ictimai nəqliyyatın digər növləri olan metro və avtobuslardan da narazıdır. Bunun səbəbləri göz qabağındadır. Çünki ölkədə avtobus sayı azdır. Yerli sərnişinlər artıq avtobus gözləməyə öyrəşib. Metrodakı sıxlıqdan isə danışmağa dəyməz. İctimai nəqliyyat sahəsində yaşanan problemləri həll etmək üçün daşıyıcıların sayı artmalıdır. Avtobus sayı çox olarsa metroda insan izdihamları yaşanmaz”.
Günel CƏLİLOVA
