Xarici spirtli içkilərin keyfiyyətinə kim nəzarət etməlidir?..
Eyyub Hüseynov: “Rusiya arağı adı altında gizli sexlərdə hazılanmış saxta məhsullar satılır”
Son vaxtlar Azərbaycanda saxta içkilərin çoxalması narahatlıq yaradır. Az qala hər gün spirtli içkidən zəhərlənmə halı baş verir. Xüsusən də xaricdən idxal olunan spirtli içkilərdə bu hal baş verir. Məlumdur ki, Azərbaycan bazarına yerli araqlarla yanaşı, xaricdən də spirtli içkilər gətirilir.
Gözəl şüşələrdə olan bu cür içkilərin keyfiyyəti isə sualdır. Çünki xarici istehsal olan spirtli içkidən istifadə edənlər arasında zəhərlənmə halı artır.
Bir neçə gün öncə Bakıda, Səbail rayonu ərazisində yerləşən məşhur hotellərin birində 4 kişi zəhərlənmə diaqnozu ilə 1 saylı Şəhər Klinik Xəstəxanasına çatdırılıb. Onlardan ikisinin həyatını xilas etmək mümkün olmayıb. Məlumata görə, onlar hotelin restoranında özləri ilə gətirdikləri “Black Jack” viskisini içiblər, həmçinin orada aldıqları yemək və meyvələrlə qidalanıblar. Bir qədər sonra dostlar özlərini pis hiss etməyə başlayıblar və vəziyyətləri ağırlaşıb.
Məlumat üçün bildirək ki, iki ilə əvvəl Bakıdakı şadlıq saraylarından birində də viskidən kütləvi zəhərlənmə oldu.
Onu da qeyd edək ki, Milli Məclisin iclasında millət vəkili, xalq şairi Sabir Rüstəmxanlı sensasiya sayıla biləcək açıqlama ilə çıxış etdi. Millət vəkili bildirdi ki, onun gənc dostları İrandan gətirilən spirtdən hazırlanan araqdan zəhərlənərək ölüblər. O, İrandan gətirilən spirtdən arağın necə - sexdəmi, özbaşınamı, yaxud zavodlardamı hazırlandığına aydınlıq gətirməyib və yaxud bu barədə məlumatsız olması da mümkündür.
Satışa buraxılan rəngli və bahalı içkilərin saxta olması ilə bağlı bir çox faktlar mövcuddur. Nəticədə insanlar həyatını itirir. Xaricdən idxal olunan bahalı içkilərin keyfiyyətinə hansı qurum və necə nəzarət etməlidir ki, belə hallar yaşanmasın?
“Kustar üsulla hazırlanan keyfiyyətsiz və təhlükəli araqların və yaxud digər spirtli içkilərin üzərinə məşhur markaların vurularaq baha qiymətə satılması faktları da var”
Azad İstehlakçılar Birliyinin (AİB) sədri Eyyub Hüseynov bildirdi ki, zəhərlənməyə əsasən saxta içkilər səbəb olur: “Dəfələrlə sakinlər tərəfindən gecə saatlarında zəng vurularaq saxta araqların verildiyinə dair xəbər ötürülür. Müxtəlif iaşə obyektlərində Rusiya arağı adı altında gizli sexlərdə hazılanmış saxta məhsullar satılır. Hətta kustar üsulla hazırlanan keyfiyyətsiz və təhlükəli araqların və yaxud digər spirtli içkilərin üzərinə məşhur markaların vurularaq baha qiymətə satılması faktları da var”.
Birlik sədrinin sözlərinə görə, spirtli içkinin yararlılıq müddəti bitdikdən sonra onun tərkibindəki sivuş yağlarının miqdarı getdikcə artır və insanlar da bundan zəhərlənə bilir. Beləliklə, insanların sağlamlığının qorunması üçün bu sahədə daha ciddi işlər görülməlidir. Ekspert qeyd etdi ki, saxta içkilər xarici ölkələrdən də Azərbaycana gətirilir: “Belə içkiləri qəbul edənlər ölümlə üz-üzə qalır, bəzi hallarda isə insanların həyatında sağalmaz izlər qoyur. Normal şəraitdə spirtli içkilər etil spirti ilə hazırlanır. Ancaq bəzi işbazlar daha çox qazanmaq məqsədilə içkiləri metil spirti ilə hazırlayırlar. Metil spirti isə zəhərlənməyə səbəb olur. Çünki metil spirti antifriz, şüşə təmizləyən məhlullar, boyanı durultmaq üçün nəzərdə tutulmuş vasitələr və bu kimi maddələrin hazırlanmasında istifadə edilir. Yəni metil spirti daxilə qəbul etmək üçün nəzərdə tutulmayıb. Metil spirtinin daxilə qəbul edilməsi zəhərlənməyə səbəb olur. Metil spirti bədəndə metobolizma nəticəsində formaldehid və formik turşuya çevrilir. Zəhərlənmə isə formik turşusunun yaratdığı asidozla əlaqəlidir. Asidoz nəticəsində sinirlər zədə görür və bununla əlaqəli korluq və yaxud ölüm baş verir. Zəhərlənmənin ilkin əlamətləri bunlardır: halsızlıq, ürəkbulanma, mədə-bağırsaq pozuntusu, temperaturun qalxması. Bu kimi şikayətlər olarsa zəhərlənmə əlaməti kimi şübhələnmək olar. Vətəndaşlara tövsiyə olunur ki, güvənmədikləri içkini, yeməyi qəbul etməsinlər”.
Günel CƏLİLOVA
