ABŞ 47-ci prezidentini seçir... Tramp, yoxsa Harris? - Əsas mübarizə 7 ştatda gedir...
ABŞ-da prezident seçkiləri üçün səsvermə başlayıb. Ölkənin 47-ci prezidenti Respublikaçılar Partiyasının namizədi və keçmiş prezident Donald Tramp və ya hazırkı vitse-prezident və Demokratlar Partiyasının namizədi Kamala Harris olacaq.
Təxminən 240 milyon seçicisi olan ölkədə 81 milyondan çox amerikalı vaxtından əvvəl səs verib. Tramp da artıq Floridada səs verib və öndə olduqlarını iddia edib.
Bildirilir ki, ABŞ-ın bəzi ştatlarında namizədlər arasında səs fərqinin çox az olması və poçtla verilən səslərin hesablanmasının uzun müddət çəkməsi, seçkilərin nəticələrinin açıqlanmasını gecikdirə bilər.
ABŞ-da 2020-ci il seçkilərində nəticələrin açıqlanmasının təqribən 4 gün çəkdiyinə diqqət çəkən müşahidəçilər hesab edir ki, Respublikaçılar Partiyasının namizədi Trampla Demokrat namizəd Harris arasında anket nəticələrinin bir-birinə çox yaxın olması səbəbindən bu il də seçki nəticələri səsvermədən dərhal sonra açıqlanmaya bilər.
Pensilvaniya və Viskonsin ştatlarda poçtla verilən səslərin sayılması prosesi ləngidə biləcəyi, səslərin hesablanmasındakı axsamaların, etirazların və ya bülletenlərlə bağlı problemlərin səslərin hesablanmasının uzun sürməsinə səbəb ola biləcəyi ifadə edilir. Digər tərəfdən, hər bir ştatın səslərin təkrar hesablanması ilə bağlı öz qanunları var. Məsələn, Pensilvaniya və Arizona ştatlarında iki namizəd arasında fərq ümumi səslərin 0,5 faizindən az olarsa, səslər avtomatik olaraq yenidən hesablanır. Eynilə, Şimali Karolina və Corciyada namizədlər arasında səs fərqi 0,5 faizdən az olarsa, namizədlərdən hər hansı biri səslərin yenidən sayılmasını tələb edə bilər. Yenidən hesablamalar namizədlər, məhkəmələr və ya seçici qrupları tərəfindən də tələb oluna bilər, lakin bu qaydalar ştatlar arasında əhəmiyyətli dərəcədə fərqlənə bilər. Digər tərəfdən, poçtla səslərin hesablanması prosesi digərlərinə nisbətən daha uzun sürdüyündən, xüsusilə Nevada və Arizona kimi ştatlarda nəticələrin gecikməsi ehtimalı var.
ABŞ seçki sistemində 538 nümayəndə var, prezidentlik yarışında qalib gəlmək üçün namizədlər ən azı 270 nümayəndə qazanmalıdır. Pensilvaniya, Corciya, Arizona, Nevada, Şimali Karolina, Miçiqan və Viskonsin ştatlarında verilən səslər seçkidə həlledici olacaq. Tramp və Harrisin seçki kampaniyalarını xüsusilə cəmlədiyi və adıçəkilən 7 ştat arasında ən çox əhalisi olan Pensilvaniya yeni prezidentin müəyyənləşməsi ehtimalının ən yüksək olduğu ştat kimi önə çıxır.
TAHİR
