5 gündən sonra minlərlə müəllimin həyəcanı başlayacaq…
Elşən Qafarov: “MİQ-in müsahibə mərhələsində bir neçə çatışmayan cəhət var”
Məlum olduğu kimi, müəllimlərin işə qəbulu (MİQ) üzrə müsabiqənin müsahibə mərhələsinə start verilir. Təhsil İnstitunun yaydığı məlumatda qeyd edilir ki, avqustun 14-dən etibarən müəllimlərin işə qəbulu üzrə müsabiqənin müsahibə mərhələsinə başlanılır.
Qeyd edək ki, təhsil işçiləri çox zaman test imtahanına daha yaxşı hazırlaşmaq barədə düşünürlər. Əlbəttə ki, işə qəbul prosesində test mərhələsi əsas mərhələdir və buna yaxşı hazırlaşmaq vacibdir. Lakin test mərhələsi ilə yanaşı, müsahibə mərhələsinə də hazırlaşmaq tələb olunur. Onu da bildirək ki, ümumilikdə 5740 namizədin dəvət olunduğu müsahibələr avqust ayının 22-dək davam edəcək. Müsahibə zamanı namizədlərin peşəkar kompetensiyaları, psixoloji hazırlığı və ümumi dünyagörüşü müsahibə proqramına uyğun olaraq müvafiq komissiya tərəfindən yoxlanılacaq.
Maraqlıdır, ekspertlərin müəllimlərin işə qəbulü üzrə müsabiqənin müsahibə mərhələsindən gözləntiləri nədir?
“Müəllimlər işə qəbul zamanı namizədlərin müəllim peşəsinə uyğunluğu ilə bağlı psixoloji testdən keçirilməlidir”
Təhsil eksperti Elşən Qafarov hesab edir ki, MİQ-in müsahibə mərhələsində bir neçə çatışmayan cəhət var: “Yaxşı olar ki, namizədlər müsahibə mərhələsinə çağırılanda ASAN xidmətdən məhkumluğu olub-olmaması barədə arayış təqdim etsin. Əvvəllər bu qaydalar çox sərt şəkildə gözlənilirdi, amma çox təəssüflər olsun ki, son illərdə bu məhkumluq məsələsi gözlənilmir. Ən əsası, müəllim olmaq istəyən namizədlərin psixoloji vəziyyəti yoxlanılmalıdır. Həmin insan müəllim olmağa nə dərəcədə hazırdır? Hətta deyərdim ki, günümüzdə sistemdə ən böyük problemimiz psixoloji cəhətdən müəllim olmağa hazır olmayanların bu sahədə faəliyyət göstərməsidir. Hələ bilik və bacarıqları bir tərəfə qoyuram. Ona görə də düşünürəm ki, müəllimlər işə qəbul zamanı namizədlərin müəllim peşəsinə uyğunluğu ilə bağlı psixoloji testdən keçirilməlidir.
Bununla yanaşı, müsahibədə nə üçün müəllim olmaq istəyir sualı ünvanlanmalıdır. Bu istiqamətdə namizədlərin cavabları maraqlıdır. Onların motivasiyası yoxlanılmalıdır. Müəllim seçmək məsələsində çox ciddi boşluqlarımız var. Hesab edirəm ki, müəllimlik sahəsinə canını, həyatını qoyan insanlar gəlməlidir”.
Günel CƏLİLOVA
