Trampın ilk dövründə Azərbaycan-ABŞ əlaqələrini Əliyev aylar öncə belə dəyərləndirib...
Ramil Hüseynov: “Onun yenidən seçilməsi ölkəmizin maraqlarına uyğundur”
Məlum olduğu kimi, Prezident İlham Əliyev Birləşmiş Ştatların Prezidenti Donald Trampa zəng edib. Telefon danışığı əsnasında dövlət başçısı Donald Trampı ABŞ-ın Prezidenti vəzifəsinə yenidən seçilməsi münasibətilə təbrik edib.
Birinci prezidentlik dövründə Azərbaycan ilə Birləşmiş Ştatlar arasında dostluq və əməkdaşlığın möhkəmlənməsinə Donald Trampın xüsusi diqqət ayırdığını deyən Prezident Əliyev ikitərəfli əlaqələrimizin irəli aparılması üçün birgə səylər göstəriləcəyinə ümidvar olduğunu bildirib.
Yeri gəlmişkən, Prezident İlham Əliyev 2-ci Şuşa Qlobal Media Forumunda çıxış edərkən Trampın birinci prezidentliyi dövründə əlaqələri yüksək qiymətləndirmişdi: “Əlbəttə ki, Azərbaycan-ABŞ əlaqələri, onun görünən tərəfi haqqında danışdıqda, bizim Respublikaçılar hakimiyyəti ilə daha nəzərəçarpacaq dərəcədə uğurlu və nəticəyönümlü əlaqələrimiz olubdur. Mənim Amerika liderləri ilə əlaqələrimə, təmaslarıma nəzər salsanız, bu, aydın olar. Eyni zamanda, Prezident Trampın prezidentliyi dövründə bizim çox səmərəli əməkdaşlığımız olub. Bu əməkdaşlıq qarşılıqlı hörmət üzərində qurulmuşdur və qarşılıqlı dəstəyin yüksək qiymətləndirilməsindən ibarət idi”.
“İki ölkə arasında həmin müsbət münasibətlər Trampın növbəti prezidentliyi dövründə yenidən qurulacaq”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynov hesab edir ki, Trampın birinci prezidentliyi dövründə Azərbaycan-ABŞ əlaqələri yüksək səviyyədə olub: “Tramp birinci prezidentliyi dövründə Azərbaycanla əlaqələrə xüsusi önəm verib. Əlaqələrdə praqmatizmə söykənib. Biz unutmamalıyıq ki, İkinci Qarabağ müharibəsi dövründə ABŞ prezidenti Tramp idi. Həmin dövrdə həm də qızğın seçki kampaniyası gedirdi. Erməni seçicilərin səsini qazanmaq üçün Tramp müharibəyə maneə törədə bilərdi. Ancaq o buna getmədi. Çünki yaxşı bilirdi ki, Azərbaycan beynəlxalq hüquqa dayanaraq öz ərazi bütövlüyünü təmin edir. Tramp prezident olduğu dövrdə Azərbaycana dövlət yardımını qadağan edən 907-ci düzəlişi hər il dondurdu. İki ölkə münasibətlərində hansısa anlaşılmamazlıq yaşanmadı. O baxımdan hesab edirəm ki, iki ölkə arasında həmin müsbət münasibətlər Trampın növbəti prezidentliyi dövründə yenidən qurulacaq. Digər tərəfdən, Trampın enerji təhlükəsizliyinə dair yanaşması, tədarük mənbələrinin diversifikasiyasını dəstəkləməyə yönəlib. Bu baxımdan o, Azərbaycanın enerji layihələrini dəstəkləyəcək. Azərbaycanın İranla qonşuluğu regional təhlükəsizlik baxımından mühüm əhəmiyyət kəsb edir. Trampın İranla sərt xətt tərəfdarı olması səbəbindən, Azərbaycan onun üçün Tehranın təsirini məhdudlaşdırmaq baxımından vacib müttəfiq ola bilər. Trampın administrasiyası hərbi əməkdaşlığı genişləndirmək, müasir texnologiya və silah satışı vasitəsilə Azərbaycanın mövqelərini gücləndirmək istiqamətində addımlar ata bilər. Bir sözlə, Trampın yenidən seçilməsi Azərbaycanın maraqlarına uyğundur”.
Vidadi ORDAHALLI
