COP-dan sonra Paşinyanın bu davranışları təsadüfdür?..
Əli Orucov: "Elə COP29-un birinci günü məlum oldu ki, Paşinyanın gözləntiləri suya düşüb"
Ermənistan və Azərbaycanın bir-birini SSRİ-də mövcud olan sərhədləri daxilində qarşılıqlı tanıması, ardınca isə ehtiyatla iqtisadi əlaqələrin qurulması zəruridir.
Bunu Ermənistanın baş naziri Nikol Paşinyan ölkənin İctimai televiziyasına müsahibəsində deyib.
Paşinyan qeyd edib ki, iqtisadi əlaqələri qurmağa başlmalıyıq: "Ermənistan və Azərbaycan bütün səviyyələrdə tanımalıdır ki, Sovet Azərbaycanı öz ərazisi ilə müstəqil Azərbaycandır, Sovet Ermənistanı öz ərazisi ilə müstəqil Ermənistandır. Biz bu reallığı qeyd etməli, bir-birimizi siyasi və bizə məlum olan bir sıra aspektlərdə rahat buraxmalı, nə isə axtarmamalıyıq. Kommunikasiyaları açmaqla, sonradan təbii olaraq çox yüksək sürətlə inkişaf edəcək iqtisadi əlaqələri yavaş-yavaş qurmağa başlamalıyıq".
İlin sonuna qədər Azərbaycanla sülh müqaviləsinin imzalanması ehtimalına gəlincə, Paşinyan "bunun üçün 100% və hətta bundan da artıq əlindən gələni edəcəyi" vədini verib.
Göründüyü kimi, Paşinyan daha konkret və açıq danışmağa başlayıb. Ancaq onun guya səmimi, açıq olması, konkret mövqe nümayiş etdirməsi onunla bağlı ola bilərmi ki, COP29-un iflasa uğrayacağı ilə bağlı bəslədikləri ümidlər hamısı puç olub getdi? Erməni tərəfi gözləyirdi ki, COP29 alınmayacaq, Azərbaycan məğlub, biabır olacaq və s. Sonda onlar COP29-dan məğlub çıxmış Azərbaycanı başqa şərtlərlə sülhə məcbur edəcəklər. Ancaq onların gözləntiləri uğursuzluğa düçar oldu. COP29 iflasa uğramadı. Bu baxımdan Paşinyan görür ki, Azərbaycan tədbirdən daha da güclənmiş şəkildə çıxdığı üçün indi ritorikanı dəyişir və sülhlə bağlı mesajlar verir.
"Bu səbəbdən tələsir və çalışır ki, Bayden getməmiş Azərbaycanla tez-tələsik sülh sazişi imzalasın"
Sözügedən məsələni "Bakı-Xəbər"ə şərh edən AMİP funksioneri Əli Orucov, prinsipcə, bu versiyanı istisna etmədi: "Əvvəla, Paşinyan ilk baxışdan qeyri-ciddi siyasi fiqur təəssüratı yaratsa da, o çox hiyləgər siyasi oyunlar oynayan bir fiqurdur. Bəli, onun müəyyən gözləntiləri var idi. Paşinyan hesab edirdi ki, bir sıra Avropa İttifaqı ölkələri Fransanın təziqlərinə uyaraq COP29-u boykot edəcəklər. Çünki Qərb mediasında Azərbaycanı etibarsızlaşdırmaq, gözdən salmaq üçün bəlli və sistemli təbliğat gedirdi. Sanki bütün ekoloji problemlərin baiskarı neft ölkəsi olan Azərbaycandır. Ancaq gözləntilər doğrilmadı. Dünyada 200 müstəqil dövlətin 196-sı tədbirə qatıldı. Böyük Britaniya, İtaliya, İspaniya kimi Avropanın aparıcı ölkələrindən birinci şəxslər COP29-a qatıldılar. Elə COP29-un birinci günü məlum oldu ki, Paşinyanın gözləntiləri suya düşüb. Bu, həm də Qarabağda antiterror əməliyyatlarından bir il sonra baş verdi. Üstəlik, antiterror əməliyyatlarından 2 ay sonra Dubayda COP29-un Bakıda keçirilməsinə yekdilliklə qərar verildi. Paşinyanın azacıq uzaqgörənliyi olsaydı, elə o zaman bunu fərq edərdi. Ancaq o, Parisdən gələn təlimatlara uyaraq sülh prosesini uzatdı. Sadəlövhcəsinə ona qapıldı ki, Azərbaycana qarşı Qərb mediasında aparılan qaralama kampaniyası, təzyiq siyasəti COP29-u uğursuzluğa düçar edəcək. Ancaq bunun tam əksi baş verdi və Azərbaycan güclənərək COP29-dan çıxdı. Ona görə də Paşinyan 180 dərəcə valı fırladaraq sülh mesajları verir, ilin sonuna qədər sülh sazişinin imzalanması üçün dəridən-qabıqdan çıxır. Üstəlik, Tramp dövründə ABŞ-ın əvvəlki kimi onu dəstəkləməyəcəyinin fərqindədir. Bu səbəbdən tələsir və çalışır ki, Bayden getməmiş Azərbaycanla tez-tələsik sülh sazişi imzalasın. Çünki sülh sazişi həm də onun hakimiyyətini qoruyub-saxlamaq üçün bir zəmanət rolunda çıxış edəcək. Bu səbəblərdən Paşinyan sülhlə bağlı tələsir".
Vidadi ORDAHALLI
