Beynəlxalq muğam müsabiqələrinin qalibi tələbə Həzrət Əzizlinin uğur hekayəsi... - FOTO
“Hədəflərimdən biri qəlbimin və ruhumun bir parçası olan muğamı dünyanın hər bir guşəsində təmsil etməkdir”
Beynəlxalq müsabiqələr laureatı olan gənc musiqiçilərimiz, ifaçılarımız barədə “Bakı-Xəbər” olaraq müxtəlif yazılar hazırlayırıq. Ümumiyyətlə, musiqi, idman, təhsil və sair sahələrdə uğur qazanan uşaq, yeniyetmə və gənclərin fəaliyyəti, onları uğura aparan yolun başlanğıcı uğurlu həyat hekayəsinin yaranmasına səbəb olur.
Belə gənclərdən biri də istedadlı muğam ifaçısı, xanəndə, yerli və beynəlxalq müsabiqələr laureatı Həzrət Əzizlidir. H.Əzizli Milli Konservatoriyanın birinci kurs tələbəsidir. “Bu uşaq muğamı böyüklər kimi oxuyur” fikri çoxlarının yadındadır. Həzrət Əzizlini əksəriyyətiniz VIII Muğam Televizya Müsabiqəsindən tanıyırsınız. Həzrət Əzizli VIII muğam müsabiqəsində birinci yeri tutmuşdu.
Muğamlarımızı özünəməxsus şirinliklə oxuyan Həzrətə çoxları “möcüzə uşaq” deyirdi, çünki o, səhnədə elə gözəl ifalar göstərirdi ki, bunu yalnız və yalnız qeyri-adi istedadı olan bir uşaq bacarardı. Həzrət doğrudan da yaşıdlarından seçilən, fərqlənən bir uşaq kimi həm münsiflərin, həm də tamaşaçıların sevgisini qazanmışdı. Uşaqlıdan böyük səhnələrdə oxuyan H.Əzizli artıq gənc bir oğlandır.
1 sentyabr 2007-ci ildə doğulan Həzrət uşaqlıqdan muğamla qidalanıb.
“VIII Muğam Televizya Müsabiqəsi mənimçün böyük bir məktəb oldu”-deyən Həzrət hər zaman ustad sənətkarların onun çıxışı ilə bağlı bildirdiyi fikirlərə çox böyük əhəmiyyət verirdi.
Həzrətin uğur hekayəsi olduqca zəngin və maraqlıdır. O, yalnız yerli və beynəlxalq müsabiqələrdə iştirak etməyib, eyni zamanda beynəlxalq tədbirlərdə də iştirak edib, öz gözəl ifalarını təqdim edib. H.Əzizli 2018-ci ildə “WORLD HARMONY” Beynəlxalq Müsabiqəsində III yer tutsa da, 2019-cu ildə sözügedən müsabiqəyə yenidən qatılır və bu dəfə I yerin qalibi olub. Öz üzərində daim işləyən və müəllimlərinin tövsiyələrinə əməl edən Həzrət 2022-ci ildə “Pöhrə” Beynəlxalq Müsabiqəsində I yer tutaraq qalib olub.
“Muğama sevgim yarandığı andan onun yaranma tarixini araşdırmağa başladım. Muğamı dərindən öyrəndikcə anlayıram ki, seçimimi düz etmişəm. Məni ən çox həvəsləndirən isə muğamın qorunub saxlanmasında və inkişaf etdirilməsində çox böyük xidmətləri olan Birinci vitse-prezident, Heydər Əliyev Fondunun prezidenti Mehriban xanım Əliyevanın “Biz muğamı gələcək nəsillərə qəlbimizin və ruhumuzun bir hissəsi kimi miras qoyuruq” sözləri oldu. Gənc muğam ifaçısı olaraq, ən böyük hədəflərimdən biri qəlbimin və ruhumun bir parçası olan muğamı dünyanın hər bir guşəsində təmsil etməkdir. Bu yolda artıq addım atmağa başlamışam”, - deyə Həzrət bizimlə söhbətində bildirdi.
Bilirik ki, Heydər Əliyev Fondunun dəstəyi, Mədəniyyət Nazirliyi və Azərbaycan Televiziyasının təşkilatçılığı ilə keçirilən VIII muğam müsabiqəsinin final mərhələsi musiqi beşiyi olan Şuşada keçirildi.
O zaman azyaşlı ifaçılar arasında birinci yerə Həzrət Əzizli layiq görülmüşdü. Müsabiqənin ilkin mərhələlərində Həzrət Əzizli öz ecazkar səsilə münsiflərin diqqətini xüsusilə cəlb etmişdi. Həzrət uşaqlıqdan birinci olmağı, seçilməyi bacarıb. Bu gün Milli Konservatoriyanın tələbəsi kimi daha peşəkar səviyyədə muğamın sirlərinə yiyələnir. Necə böyük bir dəryadan su içdiyinin fərqində olan Həzrətin ən böyük arzularından biri Şuşada konsert vermək olub.
Həzrət Əzizli 2021-ci ildə VIII “Global Bakı” Formunda, 2022-ci ildə Şuşada keçirilən “Vaqif” Poezya Günlərində, 2022-ci ildə Diaspor məsləhətlərinə məsul dövlət qurumları rəhbərlərinin beynəlxalq Bakı/Şuşa forumunda, 2024-cü ildə Özbəkistan mədəniyyət günlərində, Şuşa Global Media Forumunda, Türk Dövləri Təşkilatının dövlət başçılarının qeyri-rəsmi zirvə görüşündə, “Şuşa Türk Dövlətləri Birliyinin Mədəniyyət İncisidir” adlı Beynəlxalq Yaradıcılıq Festivalında, VI Ümumdünya Mədəniyətlərarası Dialoq Forumunda da çıxış edib.
Gənc xanəndənin repertuarında xalq mahnıları və muğamların zəngin qalereyası yaranıb. Həzrət deyir ki, muğamı öyrənikcə onun möhtəşəmliyinə heyran qalır və qəlbindəki muğam sevgisi daha da əzəmətli olur.
Həzrət Əzizli muğam sənətində yeni bir səsdir və əminik ki, o səsi növbəti beynəlxalq müsabiqələrdən eşidəcəyik, onun uğur hekayəsinə yeni və parlaq səhifələr əlavə olunacaq.
Həzrət kimi gənclər bizi muğamın sabahına nikbin baxmağa sövq edir. Biz inanırıq ki, sabah da, yüz il sonra da istedadlı xanəndələrin sayəsində muğamımız bütün dünyada öz varlığını qoruyacaq.
VIII Muğam Televiziya Müsabiqəsinə qatılanda Həzrət özünə bir söz vermişdi, mütləq qalib olacağını demişdi, vədini yerinə yetirdi, “demişdim qalib olacağam, oldum da” deyirdi o. Bu gün o, muğam yolundadır və bu unikal sənəti neçə-neçə yeni beynəlxalq müsabiqələrdə təbliğ etməyə hazırlaşır…
İradə SARIYEVA
