Əliyev alternativ enerji stansiyaları quranda dövlətlərin bir çoxunun siyasəti başqa idi - dünya COP-u müzakirə edir...
Aydın Mirzəzadə: "Gələcəkdə keçiriləcək COP konfranslarında da Azərbaycanın təcrübəsindən yararlanılacaq"
Bakıda noyabrın 11-də öz işinə başlayan BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) uğurla başa çatdı. Bu mötəbər tədbir dünya ictimaiyyətinin nəzərlərini iqlim dəyişikliklərinin yaratdığı fəsad və problemlərə yönəltməklə yanaşı, Azərbaycanın beynəlxaq uğuru kimi tarixə düşdü. Eyni zamanda bu tədbir respublikamızın antiazərbaycançı dairələr üzərində növbəti qələbəsi oldu.
COP 29-un uğurla keçirildiyini mütləq çoxluq deyir. BMT təmsilçiləri, dövlət xadimləri, siyasilər, ictimai xadimlər, QHT nümayəndələri, bir sözlə COP29-da iştirak etmiş şəxslərin hər biri bu konfransı yüksək qiymətləndirir. Onu da qeyd edək ki, COP29-un yüksək təşkilinə görə Azərbaycana rəsmi şəkildə təşəkkür edilməsi barədə qətnamə layihəsi qəbul olunub.
Məlumdur ki, Azərbaycan iri beynəlxalq tədbirləri icra etməkdə böyük təcrübəyə sahibdir. COP29-un yüksək səviyyədə təşkili COP tarixində ilk dəfədir qeydə alınır.
Azərbaycanın 44 günlük Vətən müharibəsində qələbəsi nəticəsində ölkəmizin dünyada mövqeyi daha da gücləndu. Beynəlxalq təşkilatlar, ölkəmizə gələn xarici qonaqlar dəfələrlə açıqlamalarında ən ideal təhlükəsizlik mühitinin Azərbaycanda təmin edildiyini bəyan etdilər.
Qeyd etdiyimiz kimi, COP29 tədbiri uğurla başa çatdı. Prezident İlham Əliyev öz açıqlamasında Bakıdakı COP tədbirinin ən möhtəşəm COP-lardan biri kimi tarixə düşəcəyini da bildirmişdi. Cəmiyyət də İlham Əliyevin qərar verib imza qoyduğu bütün qərar və tədbirlərin tam icrasına tərəddüdsüz dəstək verib və verir.
Onu da bildirək ki, Azərbaycan prezidenti hələ çox illər öncədən neft - qaz gəlirlərinin mühüm hissəsini bəşəriyyətin sağlam gələcəyi naminə alternativ enerji mənbələrinin yaradılmasına sərf etməyə başlayıb. Başqa sözlə. zamanı qabaqlayan siyasət aparıb. Azərbaycan külək, günəş və hidro stansiyaların qurulmasını həyata keçirəndə regionun ölkələri arasında heç kim bu işlərlə məşğul olmurdu.
"Azərbaycan COP29-a tək ev sahibliyi etmədi, eyni zamanda, ətraf mühiti qorumaq sahəsində də öz təcrübəsini dünyaya göstərdi"
Millət vəkili Aydın Mirzəzadə "Bakı-Xəbər"ə açıqlamasında qeyd etdi ki, Azərbaycan COP29-a tək ev sahibliyi etmədi, eyni zamanda, ətraf mühiti qorumaq sahəsində də öz təcrübəsini dünyaya göstərdi: "Məlumdur ki, ölkə iqtisadiyyatında enerji sektoru mühum yer tutur. Bu sektor ulu öndər Heydər Əliyevin vaxtında güclü inkişafa başlayıb, müstəqilliyimizi bərpa etdiyimiz dövrdə Azərbaycan enerji böhranı keçirməyib. Eyni zamanda, alternativ enerji obyektlərinin yaradılması enerji siyasətimizdə mühum yer tutur. Külək, günəş enerjisi, o cümlədən, hidro elektrik stansiyalarının sayı ildən-ilə artır. Torpaqlar işğaldan azad edildikdən sonra həmin ərazilərin yaşıl energitika ərazisi elan edilməsi, bu istiqamətdə ciddi işlərin görülməsi bu gün dünyanın diqqətindədir. İldən-ilə Azərbaycanın ümumi enerji istehsalında alternativ enerjinin həcmi artacaq. İki böyük günəş elektrik stansiyası tikilir. Üçüncü günəş elektrik stansiyası Cəbrayılda tikiləcək. Bu kimi faktlar Azərbaycanın ciddi perspektivindən xəbər verir. Hesab edirəm ki, Azərbaycan təcrübəsi dünyada yayılmalıdır. Eyni zamanda, iqlim dəyişikliyinə müsbət təsir edəcək faktlara diqqət edilməlidir. Gələcəkdə keçiriləcək COP konfranslarında da Azərbaycanın təcrübəsindən yararlanılacaq".
Günel CƏLİLOVA
