Alimentin artırılması arvad boşamağa meylli kişiləri dayandıracaqmı...
Fatimə Hacıbəyli: “Aliment məbləğinin artırılması boşanmaların qarşısını almayacaq, əksinə…”
Maliyyə Nazirliyinin 2024-cü ilin dövlət və icmal büdcələri üzrə layihələrin təqdimatına əsasən, gələn il yanvarın 1-dən etibarən Azərbaycanda alimentin minimum miqdarı 235 manat olacaq. Aliment məbləğinin artırılması ictimaiyyət arasında narazılığa səbəb olur.
Qeyd edək ki, boşanan şəxslərin əksəri maddi çətinlik yaşayan insanlardır. Uşaq sayı 2 və ya daha çox olarsa aliment məbləği daha da yüksək olur. Belə fikirlər var ki, bəzi xanımlar aliment məbləğinin yüksək olduğunu düşünüb boşanmağa qərar verəcək.
Məlumat üçün bildirək ki, Ədliyyə Nazirliyinin rayon (şəhər) qeydiyyat şöbələri tərəfindən təkcə bu ilin yanvar-avqust aylarında 33836 nikah və 14544 boşanma halı qeydə alınıb. Ötən ilin müvafiq dövrü ilə müqayisədə əhalinin hər 1000 nəfərinə nikahların sayı azalaraq 6,0-dan 5,0-a düşüb, boşanmaların sayı isə 1,5-dən 2,2-yə qədər artıb.
Maraqlıdır, alimentin artırılması boşanmaların necə təsir edəcək?
“… bəzi xanımların boşanmaq istəyini daha da stimullaşdıracaq”
“Vəfa” Sosial İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, aliment məbləğinin artması bəzi xanımların boşanmaq istəyini daha da stimullaşdıracaq: “Danılmaz faktdır ki, bu gün qızlar sərbəst yaşamağa üstünlük verir. Adi, xırda problemi böyüdüb, kişi, qaynana, qaynata əziyyəti çəkməkdənsə, alacağı alimenti düşünüb ailəsini dağıdacaq. Beləliklə, boşanan ailələrin sayı artacaq”.
Ekspert bildirdi ki, Azərbaycanda ailə institutu ciddi şəkildə deqradasiyaya məruz qalıb. Azərbaycanda klassik ailə modeli iflasa uğrayır. Yerinə isə yeni ailə modeli qoyulmayıb: “Ailə institutundakı belə qeyri-müəyyənlik boşanmaların çoxalmasına gətirib çıxarır və çıxaracaq. Belə bir məqamda aliment məbləğinin artırılması boşanmaların qarşısını almayacaq. Əksinə, boşanmaların sayı daha da artacaq. Aliment məbləği elə təyin olunmalıdır ki, iki və daha artıq uşağı olan şəxslərə güzəşt edilsin. Təsəvvür edin, 700-800 manat əmək haqqı alan şəxs maaşının yarıdan çoxunu alimentə verir”.
Birlik sədri onu da əlavə etdi ki, boşanmaların sayı günü-gündən artır. Boşanmaların qarşısını almaq üçün Mediasiya Şurası yaradıldı. Lakin Şuranın yaradılmasına baxmayaraq boşanma sayında azalma müşahidə olunmur.
Günel CƏLİLOVA
