Ləğv olunmuş seçki məntəqələrinə cinayət işi açıla bilərmi?
Mərkəzi Seçki Komissiyası seçkilərin şəffaf və ədalətli keçirilməsi üçün lazım olan bütün addımları atıb. Bu sözləri Mərkəzi Seçki Komissiyası sədrinin müavini Rövzət Qasımov fevralın 11-də prezident seçkilərinin yekunları ilə bağlı keçirilən iclasda səsləndirib.
Qeyd edilib ki, daxil olmuş bütün protokollar, internet resurslarında yayımlanan bütün informasiyalar araşdırılıb. Aparılan araşdırmalar zamanı bir neçə seçki məntəqəsində seçicilərin iradəsinin müəyyən edilməsinə imkan verməyən pozuntular aşkarlanıb.
Beləliklə, 41 saylı Gəncə-Samux-Goranboy Seçki Dairəsinin 38 saylı, 61 saylı Qusar Seçki Dairəsinin 7 və 27 saylı, 65 saylı Salyan-Biləsuvar-Neftçala Seçki Dairəsinin 9 saylı, 68 saylı Sabirabad-Şirvan Seçki Dairəsinin 2 saylı, 77 saylı Lənkəran Seçki Dairəsinin 7 və 31 saylı, 92 saylı Göyçay-Ağdaş Seçki Dairəsinin 6 saylı, 99 saylı Bərdə Seçki Dairəsinin 2 saylı, 114 saylı Şəki Şəhər Seçki Dairəsinin 1 saylı, 115 saylı Şəki Kənd Seçki Dairəsinin 6 saylı seçki məntəqələrinin nəticələri ləğv edilib və həmin seçki məntəqələrinin komissiyaları buraxılıb.
O məntəqələrdəki pozuntulara görə cinayət işi açılacaq, açılmayacaq? Cinayət tərkibli pozuntu var, yoxsa yoxdur? Bu, seçicilərin maarifsizliyi üzündən baş verib, yoxsa məntəqə komissiyalarının naşılığından, yaxud səhvindən olub? Hadisələrin cinayət tərkibi varmı?
Bu və digər suallarla MSK-ya müraciət etdik.
Şahin Əsədli: “...MSK qərarını verib”
Mərkəzi Seçki Komissiyası Katibliyinin Media və kommunikasiya şöbəsinin müdiri Şahin Əsədli “Bakı-Xəbər”ə “Məsələlər araşdırılıb, MSK qərarını verib, məntəqələr ləğv olunub, komissiyalar buraxılıb. Bu, MSK-nın səlahiyyətlərinə və qərarlarına bağlı məsələdir. Komissiya da artıq bununla bağlı qərarını verib” - deyə bildirdi.
O vurğuladı ki, məntəqənin ləğv edilməsinin, komissiyanın buraxılmasının özü elə hüquqi prosedurdur.
Məhərrəm Zülfüqarlı: “Əvvəlki seçkilərdə bəzi seçki məntəqəsində qanun pozuntusu olduqda, yaxud dairə seçki komissiyasında ciddi qanun pozuntusu baş verdikdə cərimələr tətbiq olunurdu...”
Azərbaycanda Vətəndaş Cəmiyyətinin İnkişafına Yardım Assosiasiyasının Seçki Qərargahının rəhbəri Məhərrəm Zülfüqarlı “Bakı-Xəbər”ə bildirdi ki, MSK-nın qanun pozuntusu baş verən məntəqə və dairələrlə bağlı hansı tədbirlər görəcəyini bilmir, amma qanun pozuntusuna yol verənlər hansısa formada cəzalandırılmalıdır. “İlkin olaraq məntəqələrinin nəticələri ləğv edilib və həmin seçki məntəqələrinin komissiyaları buraxılıb. Hesab edirəm ki, seçki qanunvericiliyinə uyğun olaraq əlavə addımlar atılmalıdır.
Deyim ki, MSK-nın açıqladığı bu məsələ yeni və ilk deyil. Əvvəlki seçkilərdə də belə hallar olub. Amma əvvəlcədən bir şey deyim ki, bu məntəqələrdə nəticələrin ləğv olunması ümumi seçkilərin nəticələrinə təsir etmir. Yəni bir neçə seçki məntəqəsinin nəticələrinin ləğv edilməsinin seçkinin nəticələrinə təsiri olmur.
Dediyim kimi, əvvəlki seçkilərdə bəzi seçki məntəqəsində qanun pozuntusu olduqda, yaxud dairə seçki komissiyasında ciddi qanun pozuntusu baş verdikdə cərimələr tətbiq olunurdu, bu işi törədənlər qanunla cəzalandırılırdı. Yəni əvvəlki seçkilərdə də müəyyən cəzalar olub.
MSK işini nə qədər təkmilləşdirsə də, məntəqələr və dairə seçki komissiyaları üçün təlimlər keçirsə də, bəzi məntəqələrdə, bəzi dairələrdə yenə qanun pozuntuları olub. Yəni bu, insanların ya seçki təcrübəsinin az olmasını göstərir, ya da məsuliyyət hissinin az olmasından irəli gəlir. Çox güman ki, pozuntuya yol verənlər qanuna uyğun olaraq hansısa şəkildə cavab verməli olacaqlar. Əvvəlki təcrübəyə əsasən deyirəm ki, keçmiş seçkilərdə bu kimi hallar baş verəndə qanunla cərimələnmə halları olub.
Amma indiki seçkilər çox yüksək səviyyədə keçib, Prezident 92 faizdən çox səs toplayıb. Bu məntəqələrin nəticələrinin ləğv edilməsi ümumi nəticəyə heç bir təsir göstərə bilməz, onun təsiri yoxdur”-deyə M.Zülfüqarlı qeyd etdi.
Leyla QARAXANLI
