İsrail-Türkiyə-Pakistan bucağında münasibətlər kəskinləşir - hər 3-ü Azərbaycanın dostudur...
Elşad Həsənov: “Bu məsələdə müttəfiqlərimiz arasında ölçülü siyasət yeritməliyik”
Həm İsrail – HƏMAS, həm də İsrail – Fələstin münasibətləri fonunda İsrailin Türkiyə və Pakistanla əlaqələri gərginləşməkdədir. Hər 3 ölkənin siyasətçiləri bir-birinin ünvanına qarşılıqlı ittihamlar səsləndirir.
Burada diqqəti çəkən məqam ondan ibarətdir ki, Azərbaycan hər üç ölkə ilə dostluq və müttəfiqlik münasibətindədir. Nəzərə almaq lazımdır ki, 44 günlük Vətən müharibəsində hər üç dövlət Azərbaycanı dəstəkləyib, ölkəmizin yanında olublar. Müharibədə İsrailin Azərbaycana verdiyi zərbə dronları və digər silahlar döyüşlərdə mühüm rol oynayıb.
Bütün bu deyilənlərin fonunda maraqlıdır, müttəfiqlərimiz arasındakı məlum gərginliyin ölkəmizə hər hansısa təsiri ola bilərmi? Müttəfiqlərimizin savaşı fonunda Azərbaycan hansı siyasəti yürütməlidir?
“Azərbaycan rəsmən bəyan edib ki, 1947-ci ildə BMT-nin verdiyi qərar icra olunmalıdır”
Sözügedən məsələni “Bakı-Xəbər”ə şərh edən siyasi ekspert Elşad Həsənov bütün bunlara bir neçə prizmadan yanaşdı: “Əvvəla, vəziyyət çox gərgindir. Təkcə Yaxın Şərqdə yox, bütövlükdə dünyanın hər yerində vəziyyət mürəkkəbdir. Bütün bunlar onunla əlaqədardır ki, dünyada yeni düzən qurulur. Daha konkret desək, dünyanın yenidən bölüşdürülməsi prosesi gedir. Bu mənada Azərbaycan öz siyasətində ikitərəfli münasibətlərə xüsusi üstünlük verir. Məlum olduğu kimi, Avropa İttifaqının müəyyən qurumları ilə ölkəmiz arasında müəyyən gərginlik var. Buna baxmayaraq, Azərbaycan Avropa İttifaqının 9 üzvü ilə strateji tərəfdaşlıq haqqında sənəd imzalayıb. Bu ölkələrlə ikitərəfli münasibətlər yüksək səviyyədədir. Həmin ölkələr Azərbaycanın maraqlarını orada yüksək səviyyədə qoruyurlar. O da məlumdur ki, Azərbaycan Fələstin dövlətinin yaradılmasının tərəfdarıdır. Həm də İsraillə strateji tərəfdaşlığımız var. İki ölkə arasında çox yüksək səviyyədə münasibətlər mövcuddur. Çünki İsrail hər zaman bizə dəstək olub. Xüsusən də 44 günlük Vətən müharibəsi zamanı. Türkiyə isə Azərbaycanla qardaş dövlətdir və iki ölkə arasında strateji müttəfiqlik haqqında saziş var. Pakistan da hər zaman Azərbaycanla dost münasibətlərə malik olan ölkədir. Təbii ki, biz Qəzzada baş verən əməliyyatları dəstəkləmirik. Azərbaycan istəyir ki, bu əməliyyatlar tez bir zamanda dayandırılsın. Çünki minlərlə mülki insan bunun qurbanı olub. Ancaq bu o demək deyil ki, biz İsrailin üzərinə getməliyik. Əsla belə olmamalıdır. Hər şey müəyyən çərçivə daxilində olmalıdır. Bir sıra aparıcı ərəb dövlətləri Qəzza məsələsində sanki sükuta qərq olublar. Bir-iki bəyanatdan o yana keçməyiblər. Ona görə də bu məsələdə müttəfiqlərimiz arasında ölçülü siyasət yeritməliyik. Azərbaycan da bunu edir. Ölkəmiz rəsmən bəyan edib ki, 1947-ci ildə BMT-nin verdiyi qərar icra olunmalıdır. Yəni Fələstin və İsrail dövləti yaradılmalıdır. Azərbaycan hər üç tərəflə dostluğunu saxlayır”.
Vidadi ORDAHALLI
