Konqresmen Frenk Pallonenin ermənipərəstliyi səngimək bilmir - yeni qərəz...
Mətin Məmmədli: “Son dedikləri də əsassız və qeyri-obyektivdir, qərəzli fikirlərdən biridir”
ABŞ konqersmenləri arasında kifayət qədər ermənipərəst olanlar var və bu səbəbdən də onlar Azərbaycana düşmən gözü ilə yanaşır. Bəziləri ölkəmizə çox aqressiv yanaşır. ABŞ Nümayəndələr Palatasının üzvü Frank Pallone belələrindəndir.
Bu adamın Azərbayana qarşı kini-kudirəti, qərəzi bitib-tükənmək bilmir. O, özünün X sosial şəbəkəsində “ABŞ-ın dəstəyi Azərbaycandan gələcək təcavüzün qarşısını almaq və Ermənistanın ərazi bütövlüyünü təmin etmək üçün vacibdir”-deyə yazıb. Əlavə edib ki, hər iki palatadan Konqres liderlərinə Ermənistanın təhlükəsizliyinə dəstək məsələsini qarşıdan gələn əlavə maliyyələşdirmə qanun layihəsinə daxil etməyə çağıran məktubu imzalayıb.
Bu adam o qədər qərəzlidir ki, gerçəyi görmək istəmir. Bir az diqqət yetirsə görər ki, Azərbaycan rəhbərliyi dəfələrlə Bakının İrəvanla müharibə istəmədiyini bəyan edib. Amma Pallone kimiləri bu bəyanatı görməzdən gəlib uydurmalarla, nağıllarla baş qatmaq istəyirlər.
“Biz Ermənistana sülh təklif edirik, amma görünən odur ki, Ermənistan və Ermənistanı himayə edən bəzi dövlətlər, dairələr...”
Beynəlxalq Münasibətlərin Təhlili Mərkəzinin aparıcı məsləhətçisi, siyasi elmlər üzrə fəlsəfə doktoru, dosent Mətin Məmmədli “Bakı-Xəbər”ə şərhində “Təəssüflər olsun ki, Frank Pallone ilk dəfə deyil belə qərəzli fikirlər səsləndirir. O, ABŞ konqresində erməni qrupunun ən fəal üzvülərindən biridir. Bugünə qədər ölkəmizə qarşı xeyli böhtan xarakterli, heç bir əsası olmayan bəyanatlar səsləndirib. Son dedikləri də əsassız və qeyri-obyektivdir, qərəzli fikirlərdən biridir”-deyə bildirdi.
M.Məmmədlinin sözlərinə görə, təkcə Frank Pallone deyil, ABŞ Konqresinin başqa nümayəndələri Azərbaycanla bağlı belə bəyanatlar səsləndirirlər ki, guya Azərbaycan Ermənistana qarşı “təcəvüzkar müharibə”yə, Ermənistan ərazilərini “işğal etməyə” hazırlaşır. “Bu ittihamların heç birinin əsası yoxdur, qərəzlidir, ilk növbədə ölkəmizə təzyiq göstərmək xarakteri daşıyır. Ölkəmizə təzyiq etmək və bununla da bölgədə öz maraqlarını təmin etməyə çalışırlar. Bu səbəbdən də belə bəyanatlar Azərbaycan siyasətinə təsir göstərə bilməz. Azərbaycanın siyasəti məlumdur. Azərbaycan bölgədə davamlı sülhdə, iki ölkə arasında beynəlxalq hüququn fundamental prinsiplərinə əsaslanıb sülh müqaviləsinin imzalanmasında maraqlıdır. Biz Ermənistana sülh təklif edirik, amma görünən odur ki, Ermənistan və Ermənistanı himayə edən bəzi dövlətlər, bəzi dairələr tamam fərqli bir mövqe tutur. Bu da nəticədə sülh prosesini, sülh müqaviləsinin imzalanmasını ləngidir. Buna baxmayaraq, özümüzün sülh gündəliyimizi davam etdiririk. Hesab edirik ki, sonda iki ölkə arasında nəhayət sülh müqaviləsini imzalamaq mümkün olacaq. Belə bəyantlara isə çox da əhəmiyyət verməyə ehtiyac yoxdur. Onlar yeni deyil” - deyə M.Məmmədli qeyd etdi. O əlavə etdi ki, belə bəyanatlar Azərbaycanın siyasətinə təsir edə bilməz.
İradə SARIYEVA
