Fransa tarixində hələ belə hökumət olmamışdı - 1 tərkibdə 2 erməni...
Hüseyn İbrahimov: “Bu, Makronun aşırı ermənipərəst mövqedən çıxış etməsinin göstəricisidir”
Fransa prezidenti Emmanuel Makron tərəfindən təyin olunan baş nazir Mişel Barnier şənbə günü yeni hökumət üzvlərini açıqlayıb. Eyni vaxtda Makronun əleyhdarları isə küçələrə axışıb.
Minlərlə insan seçkilərdə qalib gələn sol ittifaqın namizədi Lyüsi Kasteni baş nazir təyin etməyən Makronun istefasını tələb edib. Makronu istefaya çağıran nümayişçilər bildiriblər ki, “əgər köhnə sistem yerində qalacaqdısa, səsvermənin nə mənası vardı?”.
Qeyd edək ki, iyulun 7-də Fransada keçirilən seçkilərin ikinci turunda birinci olan Yeni Xalq Cəbhəsi baş nazirliyə namizəd kimi Lyüsi Kasteni irəli sürüb. Lakin Makron Kastenin Milli Assambleyada səs almasının mümkün olmadığını bildirib və onu baş nazir təyin etməkdən imtina edib. Sentyabrın 5-də isə Mişel Barnieri baş nazir təyin edib.
Barnier vəzifəyə gəldikdən iki həftə sonra yeni hökuməti elan edib. Fransanın yeni hökumətinə erməni əsilli iki nazir də daxil edilib. Belə ki, Astrid Panosyan-Buve əmək və məşğulluq naziri təyin olunub. Qiyom Kasparyan isə dövlət qulluğu işləri, ictimai fəaliyyətin sadələşdirilməsi və transformasiyası naziri vəzifəsini icra edəcək.
Onu da qeyd edək ki, Makrona qədər heç bir prezidentin dövründə ermənilərə belə ehtimad göstərilməyib. Düzdür, Fransa nazirlərinin ermənilərlə xüsusi yaxın münasibətləri olub, amma erməni əsilli şəxs nazir olmayıb. Bu ilin fevralında Fransanın mənzil-tikinti naziri postuna erməni əsilli Giyom Kasparyan təyin olunub. 36 yaşlı Kasparyan bundan əvvəl Fransa parlamentinin deputatı olub. Yeni hökumətdə isə iki erməni əsilli şəxs yer alıb.
“Hesab edirəm ki, Fransada qurulan yeni hökumət uzunömürlü olmayacaq”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimov hesab edir ki, bu, Makronun aşırı ermənipərəst mövqedən çıxış etməsinin göstəricisidir: “Düzdür, Fransadakı demək olar bütün prezidentlərin ermənilərə bu və ya digər formada xüsusi münasibəti, sevgisi olub. Müxtəlif dövrlərdə erməni maraqlarından çıxış edən prezidentlər olub. Məsələn, Jak Şirakın prezidentliyi dövründə 2001-ci ildə qondarma “erməni soyqırımı” Fransada dövlət səviyyəsində tanınıb. Ancaq nə Şirakın, nə Sarkozinin, nə də Fransua Ollandın prezidentlikləri dövründə nazir postunda erməni şəxs olmayıb. O cümlədən, həmin şəxslərin prezidentlikləri dövründə Fransanın Azərbaycanla normal münasibətləri olub. Fransa kapitalı, şirkətləri Azərbaycan iqtisadiyyatının inkişafında fəal iştirak ediblər. Ancaq Makron 2017-ci ildə prezident olandan sonra Fransa-Azərbaycan əlaqələrində geriləmələr özünü göstərib. Əsasən də 2020-ci ildə baş verən 44 günlük müharibədən sonra Makron hakimiyyəti öz əsil simasını ortaya qoyaraq Azərbaycanı hədəf alıb. İndi də erməni əsilli şəxsləri nazir təyin edir. Hesab edirəm ki, Fransada qurulan yeni hökumət uzunömürlü olmayacaq. Çünki Makrona və onun təmsil olunduğu partiyaya etimad sarsılıb. Belə olmasaydı, Fransada hökumət böhranı bu qədər uzanmazdı. O üzdən, erməni nazirlər Makronu xilas edə bilməyəcəklər”.
Vidadi ORDAHALLI
