Roma Papasının Makrondan üz çevirməsinin kökünü prezident Əliyev açdı...
Hüseyn İbrahimov: “2024 Olimpiya Oyunlarının açılışında yaşananlar sadəcə biabırçılıq idi”
“Papa Fransisk mərasimdən imtina etdi”. Bu fikirləri Prezident İlham Əliyev “Rossiya Seqodnya" Beynəlxalq İnformasiya Agentliyinin Baş direktoru Dmitri Kiselyova müsahibəsində deyib.
Daha sonra ölkə başçısı bunları qeyd edib: “Yaxşıdır ki, indi şərait artıq sabitləşməyə doğru gedir. Amma gördüyünüz kimi, yenə də Makronun qulaqları görünür. Adam öz ölkəsində otura bilmir. Mütləq Gürcüstana da əl uzatmalıdır. Biz Parisdə Məryəm Ana kilsəsindəki mərasimdə nəyin şahidi olduq? Papa Fransisk mərasimdən imtina etdi, o, əlbəttə, Makrona bu Olimpiya rüsvayçılığını bağışlamadı. Düzgün də etdi. O, Korsikaya yollandı. Necə deyərlər, sanki müəyyən bir yerindən tutaraq ağrıtmaq üçün”.
Məlumat üçün qeyd edək ki, Paris-2024 Olimpiya Oyunlarının açılışında Leonardo da Vinçinin məşhur “Sonuncu şam yeməyi” tablosunun parodiyası kimi səhnədə İsa və həvariləri LGBT fərdləri kimi təsvir olunub. Nəticədə, Vatikan başda olmaqla, xristian icması təşkilatçıları dindarlara hörmətsizlikdə ittiham edib.
“Belə bir biabırçılığın müəllifi olan Makron öz səhvlərini düzəltmək, üzr istəmək əvəzinə, xristian...”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimovun fikrincə, olimpiya rüsvayçılığından sonra əslində Makron siyasətdən getməli idi: “Ən azından ona görə ki, Paris-2024 Olimpiya Oyunlarının açılışında yaşananlar sadəcə biabırçılıq idi. Bu, nəinki xristian dəyərlərinə, bütövlükdə mənəviyyata, əxlaqi dəyərlərə bir hörmətsizlik idi. Bu səbəbdən Papa Fransisk Parisdə Məryəm Ana kilsəsinin açılışında iştirak etməkdən imtina etdi. Fransa katolik ölkəsi olaraq bunu nəzərə almalı idi. Ancaq bunun tam əksinə olaraq rüsvayçı açılışa şərait yaratdı. Katolik Kilsəsinin həssaslığını, mühafizəkar mövqedən yanaşılmasından irəli gələn gərəkən məqamları nəzərə almadı. Bu da haqlı olaraq Roma Papasının və digər dini dairələrin etirazına səbəb oldu. Belə bir biabırçılığın müəllifi olan Makron öz səhvlərini düzəltmək, üzr istəmək əvəzinə, xristian dünyasının dəyərlərinə zərər vurmaq yolunu tutub. Halbuki, bir vaxtlar Fransa özünü xristian dəyərlərinin müdafiəçisi kimi təqdim edirdi. Belə bir mənəviyyata sahib olan dövlət başçısının ali dəyərlərdən danışmağa haqqı yoxdur. Fransanın imicini yerlə bir edən bu şəxsin Cənubi Qafqazda gedən proseslərə müdaxilə etməyə siyasi baxımdan haqqı yoxdur. Ancaq əfsuslar olsun ki, Makron bütün bunlardan utanc duymaq əvəzinə, təxribatçı və pozucu mövqedən çıxış edir. Bu isə onun vaxtından əvvəl siyasi karyerasının sonu ola bilər”.
Vidadi ORDAHALLI
