Qocaman təhsil işçisi
“Mən yer üzündə müəllimdəın yüksək ad tanımıram”.
Heydər Əliyev
Həmişə müəllim haqqında gözəl sözlər deyilib, müxtəlif ifadələr səslənib. Bu səbəbdən də “müəllim” sözünü müqəddəs sayanlar çox olub.
Barəsində yazdığım insan, xeyirxah işləri ilə çoxlarına nümunə olan, qayğıkeş dost, zəhmətkeş ailə başçısı, veteran müəllim, əsl ziyalı Nurəddin Əfəndiyevdir. O, Azərbaycanın dilbər guşələrindən biri olan Balakən rayonunda doğulub, boya-başa çatmışdır. Uşaqlıq və orta məktəb illərini öz doğma kəndlərində keçirən Nurəddin, orta məktəbi bitirdikdən sonra Bakıya gəlir və bir müddət tikinti sahəsində dülgər kimi çalışır. 1964-cü ildə Azərbaycan Dövlət Universitetinin (indiki BDU) filologiya fakültəsinə qəbul olur. Ali məktəbi başa vuraraq dil-ədəbiyyat müəllimi kimi təyinatı üzrə indiki Xızı rayonunun Altıağac kəndinə göndərilir. Bir neçə il orada işlədikdən sonra yenidən Bakıya dönür və fəaliyyətini Yasamal rayonundakı 172 saylı tam orta məktəbində davam etdirir. Elə yaradıcılığa da orta məktəb illərindən başlayaraq bir neçə şeirlər yazmışdır. Müəllif “Qəlbimdən qopan duyğular” kitabını sevimli övladlarına və nəvələrinə həsr etmişdir.
Nurəddin Xalis kimi tanınan şairin ilk şeirləri müxtəlif qəzetlərdə, o cümlədən “Abşeron”, “Yeni Azərbaycan naminə”, “Söz”, “Müstəqil Respublika”, “Bakı”, “İnşaatçı” və s. dərc olunmuşdur. Onun “Qəlbimdən qopan duyğular” kitabında toplanan şeirlərinin böyük bir hissəsi satirik ruhda yazılıb. Beş kitab müəllifi olan Nurəddin Xalis Azərbaycan Jurnalistlər Birliyinin üzvüdür.
Nurəddin müəllim səmimi dost, dəyərli ziyalı və gözəl ailə başçısıdır. Onun vaxtilə dərs dediyi yetirmələri hazırda respublikamızın hər yerində yüksək vəzifələrdə çalışır və müntəzəm olaraq öz müəllimi ilə görüşürlər.
İşlədiyi bütün yerlərdə sözün əsl mənasında iz qoymuş bu bənzərsiz insan dərs dediyi, tərbiyə etdiyi hər bir şagirdin həm də yaxın dostu, yol göstərəni, ağsaqqalı olmuşdur.
Nurəddin müəllimin dostları, yoldaşları, ünsiyyətdə olduğu bütün insanlar, sanki onunla eyni iç dünyasının adamlarıdır, rəftar-davranış mədəniyyəti, geniş dünyagörüşü, yüksək ziyalılıq və düşüncə dərinliyi, qarşılıqlı səmimiyyət, düzgünlük keyfiyyətləri bu insanları birləşdirir. Nurəddin müəllim bu gün ağsaqqallıq zirvəsində qalaraq elin-obanın, qohum-qardaşın hörmətini, sevgisini öz hörməti, davranışı və xeyirxah əməlləri ilə qazanmışdır.
Çox şadam ki, belə şəxsiyyət haqqında məqalə yazmaq şansı əldə edə bilmişəm. Müəllim haqqında söz söyləmək mənə elə gəlir ki, cəsarət tələb edir. Elə bu səbəbdən əziz dostum, ağsaqqal, çox hörmətli Nurəddin müəllim, anadan olmağınızın 85 illiyi münasibətilə ürəkdən təbrik edir, uzun ömür, cansağlığı, nəvə-nəticə toyu görməyi arzulayıram.
Elşad Dağlı,
AYB-nin və AJB-nin üzvü.
