Əliyev Avropanın maliyyə təşkilatlarını fakt qarşısında qoydu - “təsir altına düşməyin”...
Aydın Hüseynov: “Yeni texnologiyaların tam iqtisadi səmərə verməsinə gəlib çatması üçün ən azından 30 il lazımdır”
“Avropa maliyyə institutları qazıntı yanacağına qarşı meyillərin kölgəsi altına düşməməlidir”. Bunu Prezident İlham Əliyev Bakıda Cənub Qaz Dəhlizi Məşvərət Şurası çərçivəsində nazirlərin 10-cu iclası və Yaşıl Enerji Məşvərət Şurası çərçivəsində nazirlərin 2-ci iclasında deyib.
Ölkə başçısının fikrincə, qazıntı yanacağına tələbat var: “Qaza tələbat var və bizim resurslarımız var, bizim infrastrukturumuz var. Hesab edirəm ki, Avropa maliyyə institutlarından maliyyələşmə, ən azından bu layihənin maliyyələşməsi real yanaşmaya əsaslanmalıdır və ümumi hal almış qazıntı yanacağına qarşı meyillərin kölgəsi altına düşməməlidir. Biz hamımız nələrin baş verdiyini bilirik. Azərbaycan, qeyd etdiyimiz kimi yaşıl enerjiyə keçid prosesinin aktiv fazasındadır. Lakin, eyni zamanda, heç kim bu faktı dana bilməz ki, ən azından yaxın gələcəkdə qazıntı yanacağı olmadan dünya inkişaf edə bilməz”.
Məsələ ilə bağlı baki-xeber.com-a açıqlama verən millət vəkili Aydın Hüseynov hesab edir ki, dünyada qazıntı yanacağına ciddi tələbat var: “Cənab Prezident çıxışında çox vacib məqamlara toxundu. Məsələ ondadır ki, dünyada qazıntı yanacağına ciddi tələbat var. Üstəlik, hələ uzun illər buna tələbat yüksək olaraq qalacaq. İnkişaf etmiş ölkələrdə yüksək texnologiyaların olması o demək deyil ki, yaxın perspektivdə dünyada hasilat yanacağına tələbat olmayacaq. Çünki ağır və digər texnikaların mühərrikləri yanacaq olmadan hərəkət edə bilməz. Dünyada çoxsaylı istilik elektrik stansiyaları var ki, qaz və daş kömürlə işləyir. Bütün bunların qısa müddətdə ortadan qaldırılması mümkünsüzdür. Nə qədər elmi-texniki tərəqqi davam etsə də, hələ ki, onları tam əvəz edə biləcək texnika yoxdur. Yeni texnologiyaların tam iqtisadi səmərə verməsinə gəlib çatması üçün ən azından 30 il lazımdır. Ona görə də düşünürəm ki, ölkə Prezidentinin qeyd etdiyi kimi, neft və neft məhsullarına tələbat çox olcaq. Neft və qaz hələ dünya iqtisadiyyatında öncül yerə malik olacaq. O üzdən, dünyadakı maliyyə qurumları hasilat sektoruna vəsait ayrılmasını əngəlləməməlidirlər. Çünki bu sahələrə vəsait qoyulmasa, bu, iqtisadi böhrana, işsizlərin artmasına və digər problemlərin yaranmasına səbəb ola bilər. Əfsuslar olsun ki, belə meyillər var. Böyük maliyyə qurumları əsasən alternativ enerji sektorlarına vəsait ayırmağa maraq göstərirlər. Düzdür, bu sahələr də inkişaf etməlidir. Ancaq bu, qazıntı yanacağı sektoruna ögey münasibətin yaranmasına səbəb olmamalıdır”.
Vidadi ORDAHALLI
