MTK-ların daha bir dələduzluğu açılır - evi ucuz sökür, baha satırlar...
Elnur Fərzəliyev: “Qiymətləndirmə şirkətləri evlərin yerləşdiyi ərazinin bazar qiymətinə görə hesablayırlar, ancaq…”
Paytaxtda istismara yararsız və qəzalı vəziyyətdə olan binalarda yaşayan sakinlərin mənzil-məişət şəraitinin yaxşılaşdırılması, o cümlədənn şəhərin ümumi görünüşünə xələl gətirən yaşayış evlərinin sökülərək yeniləri ilə əvəz olunması prosesi aparılır. Qanunvericiliyə əsasən, mənzili sökülən şəxslərə ya kompensasiya ödənilir, ya da evi başqa bir mənzillə dəyişdirilir. Bəzən isə kompensasiya məbləği Mənzil Tikinti Kooperativləri (MTK) ilə ev sahibləri arasında narazılıq yaradır.
Məlumdur ki, mənzillər və obyektlər hər il bahalaşır, amma sökülən evlərə görə kompensasiya məbləğ artmır. Yəni standart olaraq qalır.Bu da bir çox hallarda söküntünü həyata keçirən MTK-larla sakinlər arasında narazılığa səbəb olur. Tikinti şirkətləri bəzən kv/m sahəyə görə ödənişi ərazinin bazar qiymətinə uyğun olması ilə əsaslandırırlar.
“Vətəndaşlarla şirkət sahibi arasında yaşanan narazılığın həll olunması üçün yaxşı olar ki, sakinlər inşa olunan yenitikili binaya köçürülsün, bu hal…”
Əmlak eksperti Elnur Fərzəliyev “Bakı-Xəbər”ə şərhində bildirdi ki, qiymətləndirmə şirkətləri evlərin yerləşdiyi ərazinin bazar qiymətinə görə hesablayırlar: “Vətəndaşlarla şirkət sahibi arasında yaşanan narazılığın həll olunması üçün yaxşı olar ki, sakinlər inşa olunan yenitikili binaya köçürülsün. Bu hal dövlət büdcəsini də əlavə xərclərdən azad edər və vətəndaşlar da bu vəziyyətdən daha məmnun qalarlar. Həmçinin, şəxsin əlavə tikintisi varsa bu da hesaba alınmalıdır.
Məlumat üçün deyim ki, hazırda Bakı şəhərində əraziyə görə, vətəndaşa ödənilən kompensasiya 1500-3500 manat civarında dəyişir ki, bu da real bazar qiymətinə uyğundur. Bəzən vətəndaşlar onlara verilən mənzillərdən narazı olurlar, yaxud vətəndaş daha geniş ümumisahəli mənzillər istəyir. Bununla yanaşı, torpaqların dövlət ehtiyacı üçün alınması zamanı da vətəndaşlara kompensasiya olaraq ödənilən pul onları qane etmir. Bu kimi məsələlər danışıqlar yolu ilə həll oluna bilmirsə,mənzil sahibi və yaxud qarşı tərəf bu tip mübahisəli məsələlərin həlli üçün mütləq şəkildə məhkəməyə müraciət etməlidir”.
Günel CƏLİLOVA
