Həccə maraq azalır, kvota dolmur, qiymət isə 6 min dollara qalxır - bunu necə başa düşək...
Tural İrfan: “Həccə getmək üçün təyin olunan məbləğ həddən artıq yüksək olduğu üçün ildən ilə gedənlər azalır”
Həcc ziyarətinə getmək üçün sənəd qəbulunun müddəti may ayının 10-dək uzadılıb. Bu barədə Qafqaz Müsəlmanları İdarəsinin Xarici Əlaqələr şöbəsinin müdiri, Həcc elektron sisteminin rəhbəri Vüsal Cahangiri media nümayəndələrinə açıqlamasında deyib.
O bildirib ki, hazırda kvota 96%-dən çox dolub: “Bu il kvota sayı 1200-1300 arası müəyyənləşdirilib".
Məlumat üçün bildirək ki, bir nəfər üçün ziyarət paketinin qiyməti 5950 ABŞ dolları təşkil edir.
Açıqlanan məlumatdan da bəlli olur ki, həcc kvotası dolmur, bu səbəbdən də sənəd qəbulu müddətini uzadırlar. Ekspertlər kvotanın dolmamasını insanların Həcc ziyarətinə marağının azalması və qiymətin yüksək olması ilə əlaqələndirir. Bu məntiqsiz prosesin səbəbi nə ilə bağlıdır?
Ilahiyyatçı Tural İrfan baki-xeber.com-a açıqlamasında qeyd etdi ki, Həccə getmək üçün təyin olunan məbləğ həddən artıq yüksək olduğu üçün ildən ilə gedənlər azalır: “Həm də çoxu anlayır ki, 10 min manat vermək günah və israfdır. Çünki həmin pulla yüzlərlə adama əl tutmaq, dəstək olmaq olar. Ümumiyyətlə, ibadətə alver qatışmamalıdır. Ancaq Həcc məsələsi alverə çevrilib və ibadətin bura dəxli yoxdur. Bir mövzu ki, açılanda onun mənəvi, dini tərəfi yox, pul, qiymət tərəfi müzakirə olunur, burada Allah rızasından söhbət gedə bilməz. Bu qədər pul verib Həccə getmək dini yöndən doğru deyil. Bu ağır günahdır. İsrafdır. Adamları aldadıb o qədər pulunu almaq da günahdır. Neçə illərdir adamları aldadıb pullarını alıb aparırlar. Nədir ki, kimlərsə haradasa pul qazanacaq. O qədər ehtiyacı olan adamlar, ailələr var ki, onlara maddi dəstək olmaq min Həccdən savabdır”.
Günel CƏLİLOVA
