Hamının hücum etdiyi "Şərurlu İsfəndiyar" deputatlara düşündürücü məzmunda baxın nələr dedi...
İlqar Hüseynli:” Deyim ki, “Şərurlu İsfəndiyar”ın çıxışlarında tamamilə haqlı nüanslar, haqlı məqamlar var”
Son günlər “Şərurlu İsfəndiyar” kimi tanınan iş adamı İsfəndiyar Axundovun bir neçə müsahibəsi yayımlanıb. İş adamının “Mənim əlimdə imkanım olsa, bütün məscidləri söküb yerində məktəb tikdirərəm. Dindarlara inanmıram” fikri uzun müddət müzakirə olundu, hətta bəzi deputatlar belə onun sözlərini tənqid etdilər.
İ.Axundov bu günlərdə KİV-ə növbəti müsahibə verib və onu tənqid edən deputatların özlərini qınayıb, bildirib ki, onun bu vəziyyətə düşməsində elə onların da az günahı yoxdur.
“...Düşünürəm ki, məscid də tikə bilərəm, amma məscidin bizə nə verəcəyini bilmirəm. Amma məktəbin nə verəcəyini mən başa düşürəm. Düzdür, məscid ibadət yeridir, evdə də ibadət edə bilərlər. Amma məktəb, təhsil olmasa bizim millətin gələcəyi yoxdur. Mənim dediyim budur. Sadə adamlar mənim dediyimi başa düşür. Amma mənim xoşuma gəlməyən bəzi deputatların çıxışlarıdır”.
Övladlarının diplomu ilə bağlı bəzi deputatların iradlarına gəlincə, iş adamı bildirib ki, vaxtilə San-Marino adlı ali məktəb olub və biri keçi, biri hinduşka və sair aparıb orda oxuyub, qiymət alıb, diplom sahibi olub. O, bu məsələdə də deputatları qınayıb ki, qanunları yazmaq, məsələləri qaldırmaq əllərində ola-ola belə saxtakarlqılara göz yumublar. Bu gün təhsil sistemində dönüş olduğunu deyən iş adamı bildirib ki, bununla belə, təhsilin hazırkı səviyyəsi onu qane etmir.
“Şərurlu İsfəndiyar” eynu zamanda deyib ki, onun savadsızlığından istifadə edən şirkətinin işçiləri əlbir olub onun pullarını oğurlayıblar: “Mənim savadsızğlığımdan istifadə edib şirkətin gəlirlərinin 80 faizini oğurlayıblar. Budur savadsızlıq. Mənə milyonlarla ziyan dəyib. Hamısı savadlı adamlar olub, mən savadsız olmuşam. Bunu savadlı adamlar edib. Kompüteri bilmirəm, baxa bilməmişəm, razılaşıblar, istədikləri qədər bölüblər, yeyiblər. Özüm bunu görmüşəm, bu zülmü çəkmişəm. Özüm kimi insanlara və bəzi deputatlara demək istəyirəm ki, bunu əlinizdə şüar tutmayın.
Hər şeyi siz qəbul edirsiz, gəlin, bütün məktəbləri mədrəsə edək, mən nə deyə bilərəm. Mənim danışdığım, düşüncəm belə olub. Xahiş edirəm, mənim üstümə gəlməyin. Bilirsiz nətəhərdi? Məni bu səviyyəyə çatdıran da sizsiniz. Bəlkə də hər şey yaxşı olsaydı mən bu dərəcəyə çatmazdım, əsəblərim pozulmazdı”.
İş adamı açıq deyir ki, onu bu vəziyyətə bəzi deputatlar salıb, bu dərəcəyə onlar çatdırıb.
Ekspertlər deyir ki, iş adamının bu fikirləri həm əsaslıdır, həm də düşündürücü. Çünki deputatlar vaxtında qanunların qəbulunda cəmiyyətin, xalqın xeyrinə faydalı təkliflər versəydi təhsildə, başqa sahələrdə qanundankənar, narahatedici məsələlər olmazdı.
“Parlamentdəki bəzi deputatlarla əlaqədar haqlı çıxışlar edir, düzgün də deyir”
Sosial Strateji Tədqiqatlar və Analitik Arasdirmalar İctimai Birliyinin rəhbəri İlqar Hüseynli “Bakı-Xəbər”ə şərhində bildirdi ki, “Şərurlu İsfəndiyar”la bağlı müzakirələr ortaya çıxanda həmişə onda doğrunu demək istəyi olub: “Ümumiyyətlə, “Şərurlu İsfəndiyar”ı çox maraqlı bir şəxs kimi tanımağa başladım. Niyə maraqlı şəxs kimi? Əvvəla, əgər fikir vermisinizsə, Azərbaycanda biznes sektorunda kifayət qədər böyük işlər görən, layihələr icra edən, bəlkə də bir universitet bitirib savadı olan iş adamlarının mətbuata və ictimaiyyətə açıq olduğunu görməmişik. Bunu müşahidə etməmişik. O zaman iş adamları dillənir ki, onların hansısa bir məhkəmə işi olub, hansısa cinayət məsələləri ortalığa çıxıb, onda özlərini müdafiə məqsədli çıxışlar ediblər. Deyim ki, “Şərurlu İsfəndiyar”ın çıxışlarında tamamilə haqlı nüanslar, haqlı məqamlar var.
Amma bütün bunlara baxmayaraq, onun müsahibəsində həqiqət gördüm. Əvvəla, İsfəndiyar Axundov mətbuata həmişə açıq olub, öz savadına, səviyyəsinə uyğun müsahibələr verir, hər şeyi açıq danışır, Azərbaycan reallığında ictimaiyyəti narahat edən məsələləri dilinə gətirir. Baxmayaraq ki, iş adamıdır, hansısa dairələrə bağlıdır, hansısa böyük imkanlara sahibdir, amma açıq-aşkar hər şeyi deyir. Baxmayaraq ki, Isfəndiyar Axundovun tikinti șirkətləri barədə ictimaiyyətdə mənfi rəylər var. Bir mənzili bir neçə nəfərə satılması, insanların incidilməsi və məhkəmə çəkișmələri var.Bunu arașdırmaq istintaq orqanlarının ișidir. Amma savadının necə olmasına baxmayaraq özündə güc tapıb mətbuata,canlı yayımlara açıq olmasını müsbət hal kimi qəbul edirəm.
Məhkəmələrlə bağlı açıq danışır, parlamentdəki bəzi deputatlarla əlaqədar haqlı çıxışlar edir, düzgün də deyir. O ki qaldı onun məscid-məktəb məsələsindəki mövqeyinə, mənə elə gəlir, o ritorikanı düzgün seçə bilməyib, onun niyyətini düzgün başa düşmək lazımdır. Adam məscidlərin ümumiyyətlə ləğv olunmasının, bağlanmasının tərəfdarı deyil, o bunu demək istəmir, onu demək istəyir ki, biz daha çox elm, təhsil müəssisələrinin sayının artırılmasında, məktəblərin çoxaldılmasında, yaxşı təhsil verən məktəblərin marağındayıq, olmasında maraqlı olmalıyıq. Bu çox doğru yanaşmadır. Ordata səhv yanaşma yoxdur. Sadəcə olaraq, “Şərurlu İsfəndiyar” bunu ifadə edərkən bir qədər imkanlarını ortaya qoya bilməyib və bundan da bəzi deputatlar, bəzi mətbuat orqanları, bəzi jurnalistlər manipulyasiya edirlər, bundan istifidə edirlər”.
İ.Hüseynli hesab edir ki, yanaşmaya doğru izah vermək, informasiyanı doğru şəkildə cəmiyyətə çatdırmaq lazımdır. İ.Hüsenylinin sözlərinə görə, iş adamının qaldırdığı, dediyi məsələlər çox ciddi problemlərdir. “Qanunvericiliklə bağlı qəbul olunan məsələlərdə parlamentin səyinin olmaması, doğru qanunların qəbul olunmaması - bütün bunların hamısını dilə gətirməsi müsbətdir. Parlamentdə kifayət qədər savadsız insanlar var. Hətta “Şərurlu İsfəndiyar”dan da savadsız deputatların olduğunun cəmiyyət şahididir. Biz onların müsahibələrində, davranışlarında bunu görürük.”- deyə İ.Hüseynli qeyd etdi.
İradə SARIYEVA
