Azərbaycana avtomobil axını inanılmaz sürətlə artır - ölkə tıxaclardan "dağılacaq"...
Fərid Həşimov: “Avtomobillərin sayının artması yeni tıxac deməkdir, çünki...”
Bu ilin yanvar-mart aylarında Azərbaycana 22 936 minik avtomobili gətirilib. Bu barədə Dövlət Gömrük Komitəsindən məlumat verilib. Bu sayda avtomobilin idxalına ümumilikdə 400,3 milyon ABŞ dolları xərclənib.
Ötən ilin müvafiq dövrü ilə müqayisədə avtomobil idxalı kəmiyyət ifadəsində 3365 ədəd və ya 17,2%, dəyər ifadəsində isə 40,2 milyon ABŞ dolları və ya 10,9% artıb. 2024-cü ilin birinci rübündə Azərbaycana 361 milyon ABŞ dolları dəyərində 19 571 avtomobil idxal edilib.
Açıqlanan statistik rəqəmlərdən də bəlli olur ki, ölkəyə avtomobil idxalı artır. Maraqlıdır, idxalın artmasının tıxac probleminə hansı təsiri var?
“Avtomobil sayı indiki sürətlə artarsa və paralel olaraq, bölgələrin boşalması davam edərsə, bu sahədə daha ciddi problemlərlə üz-üzə qala bilərik”
Nəqliyyat eksperti Fərid Həşimov “Bakı-Xəbər”ə şərhində qeyd etdi ki, son illər ölkədə, xüsusilə də Bakıda hərəkət edən avtomobillərin sayı sürətlə artır: “Bu gün paytaxt Bakıda tıxac problemi pik həddədir. 2000-ci illərin sonlarından etibarən respublikamız avtomobilləşməyə məruz qaldı. Bu, iqtisadi inkişafla bərabər müəyyən tıxac problemini də özü ilə gətirdi. Ölkəyə gətirilən avtomobillərin sayı idxalın sayı ilə müqayisədə respublika ərazisində tərs mütənasib münasibət yaratdı. Avtomobilin sayına görə yeni yolların çəkilişi, infrastrukturun bunu qarşılaya bilməməsi müəyyən problemlər yaratdı, tarazlıq pozuldu. Nəticədə isə şəhər ciddi tıxacla üzbəüz qaldı. Bu gün də küçələr tıxacla doludur. Elə küçələr var ki, pik saatlar olmasa belə, tıxaclar olur. Avtomobillərin sayının artması isə yeni tıxac deməkdir. Çünki çoxları sıxlıq olan ictimai nəqliyyat yerinə şəxsi avtomobilə üstünlük verməyə başlayır. Bunun da nəticəsində əlavə tıxaclı küçələr yarana bilər. Avtomobil sayı indiki sürətlə artarsa və paralel olaraq, bölgələrin boşalması davam edərsə, bu sahədə daha ciddi problemlərlə üz-üzə qala bilərik”.
Ekspertin sözlərinə görə, bu gün ölkəmizdə tıxac hökm sürür, xaricdə isə mikromobillik inkişaf edir: “Məsələn, velosipeddən kütləvi şəkildə və geniş istifadə edirlər. Çalışmalıyıq ki, avtomobildən istifadə səviyyəsini aşağı salaq. Buradan da sual yaranır ki, bəs ABŞ-da niyə hər adamın adına avtomobil var? Xaricdə insanlar fərdi avtomobildən səyahət və istirahət üçün istifadə edirlər. Bunun üçün ictimai nəqliyyatı inkişaf etdirməli, şaxələndirməli, xidmət keyfiyyətini və komfortu yüksəltməliyik. Təbii ki, bu böyük şəhərlərimizə aiddir. Həmçinin, velosipedi tədricən real nəqliyyata çevirməliyik”.
Günel CƏLİLOVA
