Közərmə lampaları niyə qadağan olunur?
Vüqar Bayramov: “Közərmə lampalarının qadağan edilməsinə səbəb yaşıl enerji prinsiplərinə uyğun olaraq normal lampalardan istifadə edilməsidir”
Məlum olduğu kimi, elektrik közərmə lampalarının idxalı, istehsalı və satışı qadağan ediləcək. Bu, Milli Məclisin ötən iclasında müzakirəyə çıxarılan “Enerji resurslarından səmərəli istifadə və enerji effektivliyi haqqında” Qanuna təklif olunan dəyişiklikdə öz əksini tapıb.
Layihəyə əsasən, 60 Vt və yuxarı gücə malik olan közərmə lampaların 2026-cı il yanvarın 1-dən, 25 Vt-dan (25 Vt daxil olmaqla) 60 Vt-a qədər gücə malik olan közərmə lampaların isə 2026-cı il iyulun 1-dən idxalı, istehsalı və satışı qadağan edilir. Bəs qanunun məqsədi nədir? Qadağan edilən lampaları nələr əvəz edə bilər?
Qeyd edək ki, İnzibati Xətalar Məcəlləsinə təklif edilən dəyişikliyə əsasən, istehsal proseslərində və əsas məqsədi işıqlandırma olmayan məhsullarda xüsusi istifadəsi nəzərdə tutulan közərmə lampaları istisna olmaqla, dəyişən cərəyan dövrəsində işıqlandırma məqsədilə istifadə edilə bilən 25 Vt və daha yuxarı gücə malik olan elektrik közərmə lampalarının idxalına, istehsalına və ya satışına görə inzibati xətanın bilavasitə obyekti olan elektrik közərmə lampaları müsadirə edilməklə, vəzifəli şəxslər min manatdan min beş yüz manatadək məbləğdə, hüquqi şəxslər üç min manatdan dörd min manatadək məbləğdə cərimə ediləcək.
Maraqlıdır, bu qanunun məqsədi nədir? Qadağan edilən lampaları nələr əvəz edə bilər?
“Müddətin müəyyən edilməsi sahibkarlara həmin məhsulun idxal və satışının həyata keçirilməsi üçün imkan verəcək”
Millət vəkili Vüqar Bayramov “Bakı-Xəbər”ə şərhində bildirdi ki, közərmə lampalarının qadağan edilməsinə səbəb yaşıl enerji prinsiplərinə uyğun olaraq normal lampalardan istifadə edilməsidir: “İstehlakla bağlı qadağa müəyyən olunub. Həmçinin, idxal, satışla bağlı qadağa qanunda qeyd edilən vaxtdan etibarən tətbiq ediləcək. Müddətin müəyyən edilməsi sahibkarlara həmin məhsulun idxal və satışının həyata keçirilməsi üçün imkan verəcək. Qanunda müəyyən edilmiş vaxt - 2026-cı il iyulun 1-dən etibarən közərmə lampaların idxalı, istehsalı və satışı həyata keçirilməyəcək. Bu qadağanın tətbiq edilməsində məqsəd yaşıl enerji prinsiplərinə uyğun olaraq qaydaların müəyyən edilməsidir”.
Günel CƏLİLOVA
