Qəhrəmanlıq dastanı yazan Pəncəli - FOTO
Azərbaycan hərb tarixinə qızıl hərflərlə yazılan Aprel döyüşlərindən düz 9 il ötdü. Ordumuz düşmən üzərində layiqli qələbə qazanaraq uzun illər yağı tapdağında olan Tərtərin Suqovuşan, Talış, Qazaxlar, Cəbrayılın Çocuq Mərcanlı kəndləri, Lələ təpə yüksəkliyi, Goranboyun bir kəndi, ümumilikdə 2000 hektarlıq ərazi işğaldan azad olundu.
Xalqımızı 44 günlük zəfərə aparan haqq savaşımızda minlərlə Vətənin qeyrətli övladlar kimi 1981-ci il mart ayının 24-də Astara rayonunun uca dağlar qoynunda yerləşən Əzərüd kəndində dünyaya göz acan, Xüsusi Təyinatlı Qüvvələrin giziri Pəncəli Nurməmməd oğlu Teymurov da son damla qanına qədər erməni faşistləri ilə vuruşaraq şəhidlik zirvəsinə ucalıb. Ölümsüzlüyə qovuşan qəhrəman Talış yüksəkliyin alınmasında xüsusi şücaət göstərib. Aprelin 3-də əbədiyyətə qovuşan Pəncəli həmin ayın 11-də doğma kəndində sevdalandığı torpağın sinəsinə baş qoyub. Ölümündən sonra dövlət tərəfindən “Vətən uğrunda” medalına layiq görülüb.
Həmçinin Pəncəli Teymurov qardaş Türkiyədə təlimlərdə fəal iştirak etdiyinə görə Türkiyə Cümhuriyyətinin Xüsusi Qüvvələrinin “Qızıl bayraq” medalını alıb. 2015-ci ildə işğal altında olan Kəlbəcər rayonunda xüsusi əməliyyat zamanı ermənilərin “Ural” markalı maşınını və iyirmidən çox əsgər və zabitini məhv edib. Əməliyyatı uğurla, yüksək peşəkarlıqla yerinə yetirdiyi üçün ölkə rəhbərliyinin Sərəncamı ilə “İgidliyə görə” medalla təltif olunub.
Xalq qəhrəman şəhidinin xatirəsini həmişə əziz tutur. Astara şəhərində küçələrin biri onun adını daşıyır. Doğma kəndində büstü ucaldılıb və xatirə muzeyi yaradılıb.
Bu günlər Əzərüd kəndində Aprel döyüşləri şəhidi - XTQ giziri Pəncəli Teymurovun ildönümü qeyd olunub. Mərasim iştirakçıları Milli Məclisin deputatları Rəşad Mahmudov və Vasif Qafarov, “Mənim atam qəhrəmandır” və “Mənim oğlum qəhrəmandır” layihəsinin rəhbəri Mircəlal Qurbanov, YAP Astara rayon təşkilatının sədri Həbib Cəfərov, Astara Rayon İcra Hakimiyyəti başçısının müavini Firəngiz Sadıxova, media nümayəndələri, şəhid ailələri, din xadimləri, şəhidin döyüş yoldaşları, müharibə veteranları və ictimaiyyət nümayəndələri Vətən sevdalı gizir Pəncəli Teymurovun məzarını ziyarət edib, önünə tər güllər düzüblər.
Mərasim iştirakçılar Astaranın qəhrəman oğlunun şərəfli döyüş yolundan qürurla söhbət açıb, onun barəsində unudulmayan xatirələr söyləyiblər. Axırda o da bildirilib ki, çox qısa, lakin qərinələrə bərabər olan bir ömür yaşamış Pəncəli Teymurov şərəfli ölümü ilə gələcək nəsillərə nümunə və örnək olacaq.
Zəfər ORUCOĞLU
Azərbaycan Jurnalistlər Birliyinin üzvü
