Sosial şəbəkələr gəncləri cinayət və intihara sürükləyir
Mətləb Salahov: “Əksər Avropa ölkələrində olduğu kimi, ölkəmizdə də 16 yaşa qədər yeniyetmələrin Tik toka girişi məhdudlaşdırılmalıdır”
“Son vaxtlar sosial şəbəkələrdə yeniyetmə və gənclərimizin intihar, cinayət və digər arzuolunmaz hallara sürüklənməsi, xüsusilə psixoloji gərginlik yaşamaları adi hala çevrilib. Lakin açıq-aydın görünür ki, nəzarətsiz poliqon halına gələn sosial şəbəkə seqmentində, xüsusilə Tik tok səhifəsində bir sıra mənfi ünsürlər gənc nəslin həyatını məhv etmək üçün sıraya düzülüblər. Bu hallar gələcəyimiz adına qorxulu prosesdir. Sosial şəbəkələrə nəzarət sistemi yaradılmasa, daha təhlükəli tendesiyalar baş qaldıracaq.”
Bu barədə “Nəcib Jurnalistlər” Təşkilatının rəhbəri, jurnalist-ekspert Mətləb Salahov bildirib. O qeyd edib ki, xüsusilə Tik tok platformasında yeniyetmə və gənclərin əyri yollara cəlb edilməsi üçün əməllicə “bazar” açılıb. “Diqqət edin, bu platformada yeniyetmələrin cinsi azlıqlara alışdırılması, əxlaq yoxsulu olan şəxslərin bilərəkdən "məşhurlaşdırılması" kimi təhlükəli siyasət aparılır. Burada "məşhurlaşan" cinsi azlıqların maddi imkanları gözə soxulur, onlara "hədiyyə" edilən maşın, mənzil və digər bahalı əşyalar gənclərin diqqətini cəlb etmək üçün xüsusi video çarxlarla reklam olunur. Bununla da yeniyetmə və gənclərin bu tiplərə pərəstiş etmələri və "rahat həyat yolunu" seçmələri üçün iyrənc siyasət həyata keçirilir. Əsas məqsədləri yeniyetmə və gəncləri azərbaycançılıq dəyərlərindən uzaqlaşdırıb məhv etməkdir.
Ən dəhşətlisi odur ki, bu cür mənfi mühitin təsirində olan gənclər cinayət və intihar kimi arzuolunmaz hallara sürüklənirlər. Təəsüf ki, cəmiyyətin ziyalı qismi nədənsə bu barədə ancaq susmağa üstünlük verir. Artıq əksər inkişaf etmiş Avropa ölkələrində 16 yaşa qədər yeniyetmələrin sosial şəbəkələrə, xüsusilə Tik tok platformasına girişi qanunla qadağan edilib. Həmin ölkələr bunu gənc nəslin mənəvi dəyərlərini qorumaq və gələcək sağlam cəmiyyət naminə etdiklərini açıqlayırlar. Halbuki bu məsələdə də biz çox gec qalmışıq. Amma bu məsələnin qanunvericiliklə tənzimlənməsi baş verməsə, o zaman biz cəmiyyət olaraq daha ağır fəsadlarla üz-üzə qalacayıq.”
Namiq Quliyev
