Taksi şirkətlərində saxta sürücülər peyda olub...
Eldəniz Cəfərov: “Bu məsələyə sürücünün əməkdaşlıq etdiyi, çalışdığı taksi şirkətləri cavabdehlik daşıyır”
Dövlət qeydiyyat şəhadətnaməsində göstərilən buraxılış tarixindən 15 ildən artıq müddət keçən avtomobillər taksi kimi sərnişin daşımalarında iştirak edə bilməz. Buna baxmayaraq, yenə də belə maşınların taksi kimi fəaliyyət göstərməsinə şahidlik edilir. Eləcə də taksi sifarişi zamanı gələn maşın proqramda göstərilən maşından fərqli olur.
Məlumdur ki, son vaxtlar paytaxtda müşahidə olunan yol-qəza hadisələrinin sayı artıb. Baş verən qəza hadisəsi zamanı məlum olur ki, sifariş zamanı qeyd edilən nəqliyyat vasitəsi ünvana gəlməyib, əvəzində başqa avtomobil göndərilib. Bir neçə gün əvvəl baş verən təhlükəli qəza hadisəsi zamanı bu tipli fakt ortaya çıxdı. Məlum olub ki, sürücü avtomobili başqa bir şəxsin adından qeydiyyatdan keçərək idarə edib.
Qeyd edək ki, bu cür hallara “Bolt” şirkətində tez-tez rast gəlinir. Belə ki, bir çox hallarda sərnişinlər taksi sifariş edərkən tətbiqdə göstərilən avtomobil və sürücü ilə rastlaşmırlar ki, bu da bir sıra narazılıqlara səbəb olur.
İnsanların bu cür aldadılmasının qarşısı necə alına bilər?
“Başqasının adı və yaxud da maşını ilə qeydiyyatdan keçib taksi fəaliyyəti göstərənlər bu xidmətdən uzaqlaşdırılmalıdır”
Nəqliyyat eksperti Eldəniz Cəfərov bildirdi ki, bu məsələyə sürücünün əməkdaşlıq etdiyi, çalışdığı taksi şirkətləri cavabdehlik daşıyır: “Başqasının adı və yaxud da maşını ilə qeydiyyatdan keçib taksi fəaliyyəti göstərənlər bu xidmətdən uzaqlaşdırılmalıdır. Bu doğru hal deyil, qanunsuzluqdur. Məlum qəza hadisəsindən sonra taksi şirkətinin fəaliyyəti ilə bağlı Azərbaycanda müəyyən tədbirlər görülə bilər. Həmin şirkətə qarşı sanksiyalar tətbiq edilə bilər”.
Günel CƏLİLOVA
