Texniki Universitet Türkiyə-Azərbaycan Universitetinin təsis ortağı oldu...
İlqar Orucov: "Azərbaycan Texniki Universitetinin potensialı, imkanları kifayət edir ki, o, Türkiyə-Azərbaycan Universietində tərəfdaş olaraq prosesə cəlb olunsun"
Türkiyə-Azərbaycan Universitetində tədris prosesinə ilkin mərhələdə Türkiyədən Orta Doğu Teknik Universiteti, İstanbul Teknik Universiteti və Hacettepe Universiteti, Azərbaycandan isə Azərbaycan Texniki Universiteti tərəfdaş kimi cəlb olunacaq.
Bunu media nümayəndələri üçün keçirilən brifinqdə təhsil naziri Emin Əmrullayev deyib.
Nazir bildirib ki, növbəti tədris ilindən universitetdə ilk olaraq texniki, texnoloji və mühəndislik ixtisasları üzrə 100 tələbənin qəbulunun həyata keçirilməsi nəzərdə tutulur: "Əsas profil mühəndislik olmaqla, növbəti tədris ilindən kompüter elmləri, elektrik və elektronika mühəndisliyi, sənaye mühəndisliyi, proseslərin avtomatlaşdırılması mühəndisliyi, ekologiya mühəndisliyi kimi ixtisasların tədrisi nəzərdə tutulur. Gələcəkdə isə tibb təhsilinin tədrisini planlayırıq".
Tədrisin ilkin mərhələdə türk və ingilis dillərində aparılacağını deyən nazir akademik dəstəyin Türkiyə, inzibati, maliyyə dəstəyinin isə Azərbaycan tərəfindən göstəriləcəyini vurğulayıb.
"Burada həm azərbaycanlı, həm də türkiyəli müəllimlər çalışacaq. Həm Türkiyə-Azərbaycan, həm də Qarabağ Universitetində yeni tədris modelləri və ən yaxşı tələbə-müəllim kontingentinin formalaşdırılması hədəflənib", - nazir qeyd edib.
Emin Əmrullayev onu da əlavə edib ki, Qarabağ Universitetində tələbələr ilk illərdə dövlət hesabına təhsil alacaq, sosial tədbirlərlə əhatə olunacaq, əlavə təqaüdlər və ödənişsiz yataqxana ilə təmin olunacaqlar. Universitetdə çalışacaq müəllim və işçi heyəti isə yaşayış yeri ilə təmin ediləcək.
"İki dövlətin alimlərinin, universitetlərinin birgə səyi nəticəsində biz Türkiyə-Azərbaycan Universitetini müasir universitet səviyyəsində qura..."
Azərbaycan Texniki Universitetinin tərəfdaş seçilməsinin əhəmiyyətini vurğulayan Elm və Təhsil Nazirliyi yanında İctimai Şuranın üzvü, Azərbaycan Gənc Alim, Doktorant və Magistrlər Cəmiyyətinin sədri İlqar Orucov "Bakı-Xəbər"ə şərhində "Türkiyə-Azərbaycan Universitetində ilkin mərhələdə tədrisə cəlb olunacaq personalın müəyyənləşdirilməsi nəticəsində açıqlanıb ki, Türkiyədən Orta Doğu Teknik Universiteti, İstanbul Teknik Universiteti və Haccettepe Universiteti, Azərbaycandan isə Azərbaycan Texniki Universiteti tərəfdaş kimi cəlb olunacaqlar. Biz bu barədə dəfələrlə danışmışıq. Bütövlükdə, 2024-2025-ci tədris ilini universitetin fəaliyyətə başayacağı ilk il olaraq nəzərə alsaq, bura 250 tələbənin qəbul olunması planlaşdırılır. İlkin mərhələdə 250 tələbə olacaq və ixtisasların da sayı elə çox olmayacaq, yəqin ki, gələcəkdə universitetin fəaliyyəti genişlənəcək, orada fərqli ixtisaslar tədris ediləcək, o ixtisaslar ki, ölkəmiz üçün də strateji əhəmiyyət kəsb edə bilər. Təbii ki, bu ixtisasların həm də Türkiyə və Azərbaycan unuversitetində kadralara, mütəxəssislərə ehtiyac olacaq və o ixtisaslar artırılacaq. Hesab edirəm ki, artırılmalıdır da"-deyə bildirdi.
İ.Orucovun sözlərinə görə, amma ilkin mərhələdə birinci tədris ilində, xüsusən mühəndislik və tibb ixtisasları üzrə tələbə qəbulu nəzərdə tutulur. "Türkiyə tərəfdən cəlb edilən universitetlər kifayət qədər nüfuzlu universitetlərdir. Onların eyni zamanda texniki və tibb elmləri üzrə kifayət qədər yaxşı ənənələri var. Tutalım, İstanbul Teknik Universiteti, Orta Doğu Teknik Universiteti texniki kadr hazırlığında kifayət qədər nüfuza malikdir. Əslində, dünyada çox qabaqcıl mövqe tutublar. Əlbəttə, düşünürəm ki, həmin universitetlərlə əməkdaşlıq yaxşı nəticə verə biləcək.
O ki qaldı Azərbaycan tərəfdən prosesə cəlb edilən Azərbaycan Texniki Universitetinə, bu universitetin də kifayət qədər böyük tarixi var. Eyni zamanda Texniki Universitetdə çox yaxşı işlər görülür. Beynəlxalq əməkdaşlıq müstəvisində yaxşı ənənələr yaradılıb, əlaqələr qurulub. Texniki Universitetin qeyd edilən Türkiyə universitetləri ilə yaxşı əlaqələri var. Xüsusilə də Türkiyənin Orta Doğu Teknik Universiteti və İstanbul Teknik Universiteti ilə yaxşı əlaqələri mövcuddur. Həm kadr hazırlığı, həm də birgə tədqiqat istiqamətində əməkdaşlıq davam edir. Azərbaycan Texniki Universitet oturuşmuş bir ali təhsil ocağıdır. Sovet dövründə yaradılmış olan bu universitetin öz ənənələri var. Bu universitetdə həm də son illər böyük inkişaf müşahidə olunur. Fikrimcə, Azərbaycan Texniki Universitetin potensialı, imkanları kifayət edir ki, o Türkiyə-Azərbaycan Universietində tərəfdaş olaraq prosesə cəlb olunsun. Əminəm ki, Türkiyə-Azərbaycan Universitetinin fəaliyyətə başlaması ilə həm də Azərbaycan ali təhsil mühitində kifayət qədər yenilənmə, müasirləşmə olacaq. Həmişə qeyd etmişəm, yenə də qeyd edirəm ki, Türkiyə ali təhsili son illərdə özünün yüksək inkişaf dövrünü yaşayır və Azərbaycan ali təhsilinin qardaş dövlətdən-Türkiyədən öyrənəcəyi çox şeylər var. Əlbəttə, deməzdim ki, Türkiyə tərəfininin Azərbaycan Universitetlərindən götürməli olduğu hansısa təcrübələr yoxdur. Hesab edirəm ki, ali təhsil sahəsində bu qarşılıqlı münasibətlər hər iki ölkənin ali təhsilinin inkişafında mühüm rol oynayacaq. Mən Türkiyənin ali təhsilindəki inkişafdan danışdım. Nəzərə alaq ki, bu inkişafda həm də Azərbaycan alimlərinin payı var. Bunu gizlətmək, danmaq olmaz. Xatırlayıram ki, keçən əsrin 90-cı illərində, dövlət müstəqilliyimizin ilk dövrlərində Azərbaycan elmi ictimaiyyətinin xeyli yaxşı mənada tanınmış nümayəndələri, görkəmli alimlər Türkiyəyə getdilər. Onlar Türkiyədə ali təhsilə töhfə verməyə başladılar. Çünki o zaman Azərbaycanda bu imkanlar yox idi. Hesab edirəm ki, bizim alimlərin də Türkiyə ali təhsilinin inkişafında böyük rolu, xidmətləri olub. Bu gün də bu davam edir. Düşünürəm ki, iki dövlətin alimlərinin, universitetlərinin birgə səyi nəticəsində biz Türkiyə-Azərbaycan Universitetini müasir universitet səviyyəsində qura, istədiyimiz universitet modeli olaraq bu ali məktəbi görə biləcəyik"-deyə İ.Orucov vurğuladı.
İradə SARIYEVA
