Vətən sevgisinə tapınan ömür...
İkinci Qarabağ müharibəsi başlananda Taleh Zaur oğlu Əlizadə Vətəni öz canından üstün tutdu. Bu da ondan irəli gəlirdi ki, 1995-ci il noyabrın 29-da Cəlilabad rayonunun Alar kəndində anadan olan Taleh həqiqi mənada doğma Azərbaycanın hər qarışına ürəkdən bağlanıb.
Vətən sevgisinə tapınan, insanların xoşbəxtliyi naminə özünü qurban verən qəhrəmanın ömür yolu qıs olsa da, lakin qərinələr boyu unudulmaz, daim gələcək nəsillərə də nümunə və örnək göstərirlər.
El-obada hörmət qazanan, xeyirxah əməlləri ilə Vətənə yararlı övlad olduğunu sübut edən Taleh Əlizadə ordu sıralarına həvəslə yola düşüb. Cəbhə bölgəsinə düşməsi lap ürəyincə olub. Vətənin xidmətində layiqincə durub, yağı düşməndən qisas almağa məqam gözləyib. Bu yandan təlimlər zamanı göstərdiyi igidliyi, cəsurluğu onu zabitlərin, əsgərlərin yanında başıuca, alnıaçıq edib. Həmişə də deyib ki, əgər biz dığaların layiqli cavabını verməsək, Cavanşirlər, Babəklər, Həcərlər yetişdirən bu torpağın çörəyi bizə halal olmaz. Əsas amalımız tezliklə mübarizliklə amansız quduz düşmənə qalib gəlib tapdaq altında qalan müqəddəs Vətən torpaqlarını azad etmək olmalıdır. Əminliklə bilirəm ki, döyüş meydanında mütləq qələbə qazanarıq.
Ürəyi daim Vətən, torpaq sevgisi ilə döyünən Azərbaycan Ordusunun əsgəri Taleh Əlizadənin arzuladığı məqam yetişir. O, 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və respublikamızın ərazi bütövlüyünün təmin olunması üçün başlanan İkinci Qarabağ müharibəsi zamanı əlində silah yağının başına od ələyib. İştirak etdiyi neçə-neçə döyüşdən rəşadət nümunəsini göstərməklə zəfərlə çıxıb. Dəfələrlə ölümlə üzləşib, amma hər dəfə odlu-alovlu müharibə meydanına girəndə yağının üstünə qartal tək şığıyıb. Bacarıqlı, səriştəli bir döyüşçü olaraq erməni dığaları onun vurduğu sarsıdıcı zərbələri qarşısında tab gətirə bilməyib. Taleh kimi qeyrətli oğlanların qəhrəmanlığı hesabına torpaqlar ard-ardına təmizlənib, bu ərazilərdə Azərbaycan dövlətinin üçrəngli qələbə bayrağı dalğalanıb.
Döyüşdən-döyüşə Taleh Əlizadənin qəlbində erməni dığalarına qarşı nifrəti daha da alovlanıb. Cəbrayıl rayonunun azadlığı uğrunda gedən haqq savaşımızda qırdığı ermənilərin sayı bilinməyib. Təəssüf ki, bu, onun son döyüşü olub. Oktyabrın 18-də vuruşmanın qızğın yerində namərd gülləsi qəhrəman Vətən oğlunu haqlayıb .
25 yaşında əbədiyyətə qovuşan Taleh Əlizadə xalq sevgisinə bələnməklə, həm də dövlət tərəfindən “İgidliyə görə", "Vətən uğrunda", Cəbrayılın, Xocavəndin, Füzulinin azadlığına görə medalları ilə təltif edilib.
Zəfər ORUCOĞLU
Azərbaycan Jurnalistlər Birliyinin üzvü
