Həkimin cərrahi əməliyyatı canlı yayması hansı cinayətlərin tərkibini yaradır?..
Adil Qeybulla: “Cərrahi əməliyyat zamanı canlı yayım açılmasının həm mənəvi, həm də hüquqi məsuliyyəti var”
Son vaxtlar sosial şəbəkələrdə əməliyyat zamanı canlı yayım edən və ya əməliyyatla bağlı görüntüləri paylaşan həkimlərin sayı artır. Xüsusilə bu görüntülər “TikTok" platformasında daha geniş yayılıb. Ancaq bu hallar ictimaiyyətdə birmənalı qarşılanmır.
Bəziləri həkimlərin əməliyyat videolarını paylaşmağını peşəsinə zidd hesab edir və yaxud belə həssas görüntülərin paylaşılmasını doğru hesab etmir.
Bu günlərdə sosial şəbəkədə Bakıdakı klinikaların birində cərrahın üzgərmə əməliyyatı zamanı xəstənin dərisini əlində tutub canlı yayım açdığı haqda görüntülər yayılıb. Bu görüntü geniş müzakirəyə səbəb olub. Məsələ ilə bağlı Analitik Ekspertiza Mərkəzinin yaydığı məlumatda qeyd edilir ki, üzgərmə əməliyyatında canlı yayım açan cərrahla bağlı araşdırma aparılır.
“Xəstənin icazəsi, şəxsi razılığı olmadan onunla bağlı tibbi prosedurun ictimailəşdirilməsi qadağandır, hüquqi pozuntudur”
Əməliyyat zamanı canlı yayım açılması nə dərəcədə düzgündür?
Professor, tibbi ekspert Adil Qeybulla “Bakı-Xəbər”ə şərhində bildirdi ki, burada həm mənəvi, həm də hüquqi məsuliyyət var: “Xəstənin icazəsi, şəxsi razılığı olmadan onunla bağlı tibbi prosedurun ictimailəşdirilməsi qadağandır, hüquqi pozuntudur. Əslində bu tip paylaşımlar reklam xarekterlidir. Ancaq düzgün deyil. Ümumiyyətlə, həkim reklamları qadağan olunmalıdır.
Həkim fəaliyyətində reklam etik baxımdan düzgün deyil. Narkoz altında olan xəstələrdə şəxsiyyətin qorunması xüsusi şərtdir. Sosial şəbəkələrdə, televiziyalarda həkimləri kiminsə reklam etməsi böyük bir biabırçılıqdır. Bunlar korporativ maraqlara xidmət edir. Belə hallar təbabətin mənəvi göstəriciləri ilə ziddir. Onu da deyim ki, xarici ölkələrdə pasiyent haqqında məlumatı yayan həkimlər həbs olunur. Cərrahiyyə əməliyyatları kifayət qədər məsuliyyət, diqqət tələb edən bir işdir. Buna barmaqarası yanaşmaq, reklam alətinə çevirmək olmaz. Ümumiyyətlə, xəstənin icazəsi, şəxsi razılığı olmadan onunla bağlı tibbi prosedurun ictimailəşdirilməsi qadağandır, hüquqi pozuntudur".
Günel CƏLİLOVA
