Bu uşaqlar hansı məbləğdə birdəfəlik müavinət alacaq...
Vüqar Bayramov: “Təxminən 2600 manat birdəfəlik müavinət ödəniləcək”
Məlum olduğu kimi, Prezident İlham Əliyev “Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” Azərbaycan Respublikasının Qanununda dəyişiklik edilməsi barədə Qanunu imzalayıb.
Sənədə əsasən, valideynlərini itirmiş və valideyn himayəsindən məhrum olmuş uşaqlar, habelə onların arasından olan şəxslər ümumi təhsil, peşə təhsili, orta ixtisas təhsili və ali təhsil müəssisələrini bitirdikləri zaman onlara müvafiq təhsil müəssisəsi tərəfindən müvafiq icra hakimiyyəti orqanının müəyyən etdiyi orqanın (qurumun) müəyyən etdiyi məbləğdə birdəfəlik müavinət ödənilir.
Qeyd etdiyimiz kimi, “Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” qanuna dəyişiklik edilib. Maraqlıdır, valideyni itirmiş uşaqlar təxminən nə qədər müavinət alacaq və bunun nə kimi sosial əhəmiyyəti var?
“Müavinətin ödənilməsində məqsəd valideynlərini itirmiş və valideyn himayəsindən məhrum olmuş uşaqların, həmçinin onların arasından olan şəxslərin sosial təminatını daha gücləndirməkdir”
Millət vəkili Vüqar Bayramov “Bakı-Xəbər”ə şərhində bildirdi ki, Azərbaycan Prezidentinin imzaladığı Fərman ilə valideynlərini itirmiş və valideyn himayəsindən məhrum olmuş uşaqlara, habelə onların arasından olan şəxslərə ümumi təhsil, peşə təhsili, orta ixtisas təhsili və ali təhsil müəssisələrini bitirdikləri zaman onlara müavinət veriləcək: “Təxminən 2600 manat birdəfəlik müavinət ödəniləcək. Məlumat üçün deyim ki, əvvəllər həmin şəxslər mövsümi paltar və ayaqqabı, habelə ölkə üzrə orta əmək haqqının 2 mislindən az olmamaqla birdəfəlik pul vəsaiti ilə təmin olunurdular. Son Fərmanla müavinət məbləğində artımlar həyata keçirilməklə yanaşı, həmçinin vəsait də dəqiqləşdirildi. Bu müavinətin ödənilməsində məqsəd valideynlərini itirmiş və valideyn himayəsindən məhrum olmuş uşaqların, həmçinin onların arasından olan şəxslərin sosial təminatını daha gücləndirməkdir. Bu addım Azərbaycanda sosial təminat sisteminin gücləndirilməsi, xüsusilə də aztəminatlı vətəndaşlarımızın sosial müdafiəsinin daha da yaxşılaşdırılması məqsədilə atılmış addımdır. Bu fərman göstərir ki, Azərbaycan Prezidenti İlham Əliyevin rəhbərliyi ilə həyata keçirilən sosial-iqtisadi siyasətin əsasında ölkə vətəndaşlarının sosial rifahının qorunması əsas xətti təşkil edir”.
Günel CƏLİLOVA
