Mədəniyyət Nazirliyi Bakıda "məmur atasının" zəbt etdiyi deyilən tarixi binaya sahib çıxmır...
Artıq bir neçə gündür ki, Bakı şəhəri, Nəsimi rayonu Həzi Aslanov küçəsi 55 ünvanında yaşayan sakin Ruzana İdrisovanın şikayəti medianın diqqət mərkəzindədir. Lakin nədənsə, aidiyyəti qurumlar problemi aradan qaldırmaq istiqamətində heç bir addım atmaq istəmir.
Belə ki, qeyd edilən ünvanda yaşayan Ruzana İdrisova ona məxsus mülkün əlindən alınmaq təhlükəsi ilə üz-üzə qaldığını deyir.
Onun sözlərinə görə, Yevlax Rayon İcra Hakimiyyətinin başçısı Anar Tağıyev və Milli Məclisin Yerli icra hakimiyyətləri ilə iş şöbəsinin müdir müavini Teymur Tağıyevin atası Aqil Tağıyevin təhdidləri ilə üz-üzədirlər: "Bizim mülkümüzün qapısı məhz Aqil Tağıyevin göstərişi ilə bağlanıb. Yaşadığımız bu bina tarixi əhəmiyyətlidir. Bina Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti tərəfindən qorunmalıdır. Bu bina 1909-cu ildə inşa edilib. Amma bu Xidmət nədənsə binanı qorumayıb və Aqil Tağıyev yüksək vəzifəli qohumlarına, ən əsası isə qudası, Bakı Şəhər İcra Hakimiyyətinin başçısı Eldar Əzizova və oğlanlarının vəzifəsinə arxalanaraq bu tarixi binanın əsas qapısını bağlayıb. Biz öz mənzilimizə pəncərədən giririk. Bizim binanın blokunda olan bütün mənzilləri Aqil Tağıyev alıb. Yalnız bizim ev qalıb. Aqil Tağıyev bizi təhdid edir ki, bu mənzili hansı yolla olursa olsun, sizin əlinizdən alacam. Aqil Tağıyev, hətta blokun qapısını dəyişib və yalnız özü və ailə üzvlərinin bildiyi kodla binaya girib-çıxırlar. Bir sözlə, mənim və ailə üzvlərimin həyatı təhlükədədir".
Maraqlıdır ki, ölkənin əksər media orqanlarında dərc edilən bu problemin həlli ilə məşğul olan bir qurum tapılmır.
Nəsimi RİH: "Aralarında problem yaşanan hər iki qonşu ilə söhbətlərimiz olub"
Baki-xeber.com-un sorğusuna cabab olaraq Bakı şəhəri Nəsimi Rayon İcra Hakimiyyətindən bildirildi ki, problemdən xəbərləri var və məsələ ilə məşğuldurlar: "Aralarında problem yaşanan hər iki qonşu ilə söhbətlərimiz olub. Söhbət əsasında problemi həll etməyə, çıxış yolu tapmağa çalışırıq. Həm mülkiyyət mütəxəssislərimiz, həm də hüquqşünasımız bu işə cəlb edilib. Qarşıdakı günlərdə problemi danışıqlar yolu ilə həll edə bilməsək, şıkayəti aidiyyəti üzrə hüquq-mühafizə orqanlarına yönəldəcəyik. Lakin hazırda vəziyyət elədir ki, bu işdə kimin günahkar olması barədə danışa bilməyəcəyik. Sizin və digər media orqanlarının informasiyadakı diğər iddialarına cavab vermək bizim səlahiyyətləriminz daxilində deyil".
Namizəd Səfərov: "Özbaşınalıq edən sakinin kimliyindən asılı olmayaraq polis məsələni saatlar ərzində həll etməlidir"
Hüquqdünas Namizəd Səfərov bakı-xeber.com-a məsələ ilə bağlı açıqlamasında dedi ki, çoxmənzilli binanın ümumi giriş qapısının bir sakin tərəfindən bu cür bağlanılması özbaşınalıqdır, qonşunun yaşamaq hüququnun pozulmasıdır: "Sakin mediaya danışmaqdansa polisə müraciət etsə daha yaxşı olar. Özbaşınalıq edən sakinin kimliyindən asılı olmayaraq polis məsələni saatlar ərzində həll etməlidir. Yəni bu elə bir problem deyil ki, onun həlli üçün günlər tələb edilsin. Polis gəlib hər iki qonşuya hüquq və vəzifələrini izah edəcək, bununla da məsələ bitəcək.
O ki qaldı mülkün Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti tərəfindən qorunub-qorunmamasına, bunun məsələyə heç bir dəxli yoxdur".
Mədəniyyət Nazirliyi: "Göstərilən ünvanda yerləşən bina qorunan mədəni abidələr və irslər siyahısında mövcud deyil"
Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən isə baki-xeber.com-un sorğusuna cavab olaraq bildirildi ki, göstərilən ünvanda yerləşən bina qorunan mədəni abidələr və arxitektur binalar siyahısında mövcud deyil. Nazirlikdən bildirildi ki, bununla bağlı mülk sahibinin tərəddüdlərı varsa, Xidmətə sorğu ilə müraciət edə bilər.
Akif NƏSİRLİ
