Taksi sürücüləri Bakıda etiraza qalxır - ora 100, bura 50...
"Bir qrup taksi sürücüsü Azərbaycan Yerüstü Nəqliyyat Agentliyinin (AYNA) qərarlarına etiraz olaraq aprel ayının 2-si fəaliyyət göstərməyəcək". Bunu Taksi Sürücüləri Birliyinin rəhbəri Elşad Eldarov deyib.
O bildirib ki, taksi sürücüləri avtobus zolağında sərnişin mindirib-düşürdükdə 100 manat, avtobus zolağının yanında sərnişin mindirib-düşürdükdə isə 80 manat məbləğində cərimə olunurlar. Bu isə onları maddi zərərə salır.
Taksi sürücüləri narazılıq edərək bildirirlər ki, onlara qanuni şəkildə fəaliyyət göstərmək üçün lazım olan fərqlənmə nişanları, sertifikatlar verilsə də, iş şəraiti gündən-günə gərginləşir. Sürücülər tələb edirlər ki, yaşlı insanları, uşaqlı ailələri və ya fiziki imkanları məhdud sərnişinləri daha rahat formada daşımaq mümkün olmalıdır.
AYNA: “Avtobus zolaqları avtobusların və operativ nəqliyyat vasitələrinin hərəkətini təmin etmək üçün nəzərdə tutulub, şəxsi avtomobillərin və taksi nəqliyyat vasitələrinin ora daxil olması isə qadağandır”
Məsələ ilə bağlı Azərbaycan Yerüstü Nəqliyyat Agentliyindən (AYNA) bildirildi ki, avtobus zolaqları avtobusların və operativ nəqliyyat vasitələrinin hərəkətini təmin etmək üçün nəzərdə tutulub, şəxsi avtomobillərin və taksi nəqliyyat vasitələrinin ora daxil olması isə qadağandır: “Şəhərdə 130-dan çox taksi duracağı mövcuddur. Yeni taksi dayanacaqlarının əsasən universitetlər, ticarət mərkəzləri və nəqliyyat mübadilə məntəqələrinin yaxınlığında təşkil edilməsi nəzərdə tutulur”.
Aslan Əsədov: “Taksi sürücüləri ilə bağlı vəziyyətin bu həddə çatmasına imkan verilməməli idi”
Nəqliyyat eksperti Aslan Əsədov “Bakı-Xəbər”ə açıqlamasında bildirdi ki, taksi sürücüləri ilə bağlı vəziyyətin bu həddə çatmasına imkan verilməməli idi: “Bu problem yeni məsələlərlə, təkliflərlə həll olunmamalıdır. Bu gün nəqliyyat vasitələri sahiblərinin, sahibkarların və vətəndaşların maraqlarının qorunması üçün müəyyən işlər görülməli idi. Vətəndaşların nəqliyyat vasitəsindən düşüb-minməsi üçün imkan yaradılmalı idi. Ancaq son islahatlar düşürülmə-minmə üçün olduqca çətin sədlər yaratmışdı. Bunun həlli üçün müəyyən işlər görülməlidir. Həm nəqliyyat vasitələrini idarə edən şəxsləri düşünmək lazımdır, həm də taksidən düşən şəxsin təhlükəsizliyini fikirləşmək lazımdır. Nəzərə almaq lazımdır ki, taksi sürücüləri özlərini bu təhlükəyə atan insanlardır. Onlar həm cərimə olunur, həm də öz həyatlarını və sərnişini təhlükəyə atır. Bu məsələnin həlli üçün müəyyən işlər görülməlidir”.
Günel CƏLİLOVA
