Astarada Milli Qəhrəman Yalçın Nəsirovun anım gününə həsr olunmuş tədbir keçirildi - FOTO
Astara rayon Heydər Əliyev Mərkəzində Azərbaycanın Milli Qəhrəmanı Yalçın Nəsirovun anım gününə həsr olunmuş tədbir keçirilib.
YAP Astara rayon təşkilatının, Astara rayon Müharibə, Əmək və Silahlı Qüvvələr Veteranlar təşkilatının əməkdaşlarının, F.Əliyarov adına şəhər 6 saylı, E.Ağayev adına Səncərədi kənd tam orta, S.Əliyev adına Rüdəkənar kənd ümumi orta məktəblərinin müəllim və şagirdlərinin qatıldığı tədbirdə əvvəlcə Ulu Öndər Heydər Əliyevin və Vətən şəhidlərinin əziz xatirəsi bir dəqiqəlik sükutla yad edilib.
Dövlət Himninin sədaları altında başlayan tədbirdə Mərkəzin direktoru Kübra Səmədova çıxışında deyib: - Azərbaycan Respublikası Prezidentinin 4 aprel 1995-ci il tarixli 307 saylı fərmanı ilə Yalçın Canhəsən oğlu Nəsirova ölümündən sonra “Azərbaycanın Milli Qəhrəmanı” adı verilib. Rayondakı Sərək kənd orta məktəbi onun adını daşıyır. Oxuduğu sinifdə Milli Qəhrəmanımızın qısa, lakin mənalı ömür yoluna həsr olunmuş guşə yaradılıb. Şagirdlər xalqımızın qəhrəman oğlunun nümunəvi ömür yolu ilə yaxından tanış olur, onunla qürur duyurlar.
Eləcə də Astara rayon Heydər Əliyev Mərkəzinin əməkdaşı Elza Kazımovanın ölməz qəhrəmanın şərəfli həyat yolu haqqında geniş məruzəsi olub.
Sonra “Nəsirov Yalçının ömür yolu” adlı qısa sənədli filmi göstərilib.
Yekunda tədbir iştirakçıları rəssamlıq dərnəyi üzvlərinin əl işlərindən ibarət sərgiyə baxış keçiriblər.
Zəfər ORUCOĞLU
Azərbaycan Jurnalistlər Birliyinin üzvü
