Çinlə Azərbaycanın arasında misilsiz bir Sazişə hazırlıq başladı...
Fuad İbrahimov: “İki ölkə arasında azad ticarət sazişinin imzalanması üçün kifayət qədər baza var”
Azərbaycan və Çin arasında investisiya əməkdaşlığı üzrə İşçi qrup yaradılacaq. Bu barədə Pekində imzalanan "Azərbaycan Respublikası ilə Çin Xalq Respublikası arasında hərtərəfli strateji tərəfdaşlıq əlaqələrinin qurulması haqqında Birgə Bəyanat"da deyilir.
“Ticarət, investisiyalar, yaşıl enerji və rəqəmsal iqtisadiyyat sahələrində qarşılıqlı fəaliyyətin gücləndirilməsi, eləcə də ticari-iqtisadi sahədə ikitərəfli əməkdaşlığın yüksək keyfiyyətli inkişafına töhfə vermək üçün investisiya əməkdaşlığı üzrə İşçi qrupun yaradılması barədə qərar qəbul olundu. Tərəflər iki ölkənin ticarət və iqtisadiyyatının inkişafı üçün əlverişli şəraitləri birgə yaratmaqla ekoloji təmiz və yüksək keyfiyyətli kənd təsərrüfatı məhsullarının bazarlara qarşılıqlı çıxışını tədricən genişləndirmək niyyətindədirlər. Tərəflər ticarət və investisiya sahələrində əməkdaşlığın dərinləşdirilməsi üçün institusional zəmanətlərin yüksək səviyyəsinin təmin edilməsi məqsədilə azad ticarətə dair sazişlə bağlı danışıqlara başlamağa hazır olduqlarını ifadə etdilər”, - deyə Birgə Bəyənatda bildirilir.
Bütün bunlar, xüsusən də Azərbaycanla Çin arasında azad ticarət sazişinin imzalanması perspektivi baxımından nə deməkdir?
“Çünki Azərbaycanın Xəzərdə böyük ticarət donanması var, ən böyük ticarət limanı inşa edilib”
Sözügedən məsələni “Bakı-Xəbər”ə şərh edən iqtisadçı-ekspert Fuad İbrahimovun fikrincə, Çinlə azad ticarət sazişinin imzalanması ilə bağlı danışıqların aparılması çox önəmli xəbərdir: “Əvvəla, Prezident İlham Əliyevin Çin rəhbərliyi ilə apardığı yüksək səviyyəli görüş çox əhəmiyyətli hadisədir. Çünki Çin siyasi tarixinə baxsaq görərik ki, hər ölkə başçısını belə yüksək səviyyədə qarşılamırlar. Bu ondan irəli gəlir ki, Azərbaycan Çin üçün olduqca cazibədar bir məkandır. Bu da təsadüfi deyil. Çünki Çin 1991-ci ilin dekabrında Azərbaycanın müstəqilliyini tanıyan sayca dördüncü ölkə olub. 1992-ci ilin 2 aprelində Çin Azərbaycanla diplomatik münasibətlər qurub. 1993-cü ildə Çinin Azərbaycanda səfirliyi fəaliyyətə başlayıb. 1994-cü ilin martında mərhum Prezident Heydər Əliyev Çinə ilk rəsmi səfər edib. Hələ o vaxt nəqliyyat-logistika istiqamətində böyük işlərin görülməsinə start vermişdi. Hələ o vaxt gündəliyə gətirilən, elan olunan “İpək yolu”, TRASEKA layihələri bugünkü günə xidmət edirdi. Yəni Orta Dəhlizin, “bir yol bir kəmər”in reallaşmasına xidmət edirdi. Çinlə Azərbaycan arasında azad ticarət sazişinin imzalanması üçün kifayət qədər baza var. Çünki Azərbaycanın Xəzərdə böyük ticarət donanması var. Ən böyük ticarət limanı inşa edilib. Söhbət Bakı Beynəlxalq Dəniz Ticarət Limanından gedir. Bu limanın yükaşırma qabiliyyəti 25 milyon tona çatdırılacaq. Ələt Azad İqtisadi Zonasında böyük layihələr həyata keçirilir. Çin Afrikanın qərbində, şərqində ən böyük limanlara sahibdir. Belə bir ölkənin Azərbaycana maraq göstərməsi, Orta Dəhlizə önəm verməsi, logistik imkanlarımızı dəyərləndirməsi və tranzit daşımaların artması ciddi perspektivlərdən xəbər verir. Yəni Çin Azərbaycanda bir sıra sahələrə böyük sərmayələr qoya bilər. Bunun üçün də iki ölkə arasında azad ticarət sazişinin imzalanmasına ehtiyac var. Çünki bu, birbaşa Çin kapitalının Azərbaycanın qeyri-neft sektoruna yönəlməsinə təkan verəcək. Biz bu imkanlardan maksimum faydalanmalıyıq”.
Vidadi ORDAHALLI
