Putin Azərbaycanın 21 nəfər dünya müharibə iştirakçısını 9 May paradına dəvət edəcək?..
Rasim Mirzəyev: “Rusiyadan belə bir dəvət olarsa, səhhətində problemi olmayanlar həmin paradda iştirak edə bilər”
“1941-45 müharibəsi”ndə Sovet ordusu sıralarına Azərbaycandan 720 min nəfərdən çox insan cəlb edildi. Onlardan 320 mindən çoxu döyüşlərdə həlak oldu. Böyük Vətən müharibəsi zamanı göstərdiyi qəhrəmanlıqlara görə 128 azərbaycanlı Sovet İttifaqı Qəhrəmanı adına layiq görüldü. Bu şərəfli ada iki dəfə layiq görülən məşhur azərbaycanlı Həzi Aslanov olub.
Sovet İttifaqı Qəhrəmanı adını alanlardan 42 nəfəri milliyyətcə azərbaycanlı idi, onlardan 14-ü ölümündən sonra bu ada layiq görülmüşdü.
Əmək və Əhalinin Sosial Müdafiəsi Nazirliyi Dövlət Sosial Müdafiə Fondunun məlumatına əsasən, Azərbaycanda yaşayan Böyük Vətən müharibəsi iştirakçılarının sayı 21 nəfərdir.
Maraqlıdır, 21 nəfərin hamısını Rusiya Moskvaya 9 May qələbə paradına dəvət edə bilərmi?
“Böyük Vətən müharibəsi iştirakçıları Rusiyada keçiriləcək paradda iştirak edə bilərlər, ancaq onların sağlamlıq vəziyyətinin həmin tədbirdə iştirak etməyə imkan verib-vermədiyi dəqiqləşdirilməlidir”
Müharibə, Əmək və Silahlı Qüvvələr Veteranları Təşkilatının əməkdaşı Rasim Mirzəyev “Bakı-Xəbər”ə şərhində bildirdi ki, Böyük Vətən müharibəsi iştirakçıları Rusiyada keçiriləcək paradda iştirak edə bilərlər. Ancaq onların sağlamlıq vəziyyətinin həmin tədbirdə iştirak etməyə imkan verib-vermədiyi dəqiqləşdirilməlidir: “Rusiyadan belə bir dəvət olarsa, səhhətində problemi olmayanlar həmin paradda iştirak edə bilər. Nəzərə almaq lazımdır ki, 21 nəfərin yaşı və sağlığı uzaq səfərlər üçün bəzən münasib olmur”.
Həmsöhbətimiz onu da əlavə etdi ki, İkinci Dünya müharibəsi dövründə iştirak edən azərbaycanlılar böyük qəhrəmanlıq göstərib, cəbhələrdə ləyaqətlə vuruşublar: “Qələbəyə Azərbaycan nefti həlledici töhfə verib. Bakı neftçiləri müharibə illərində gecə-gündüz çalışırdılar, cəbhəni fasiləsiz neftlə təmin edirdilər. İkinci Dünya müharibəsi veteranlarına dövlət tərəfindən xüsusi diqqət və hörmət bəslənilir”.
Günel CƏLİLOVA
