Kiyev ABŞ-ın təklifini rədd etdi və yeni şərt irəli sürdü - Londonda sülh danışıqları pozuldu...
Aprelin 23-də Londonda beş ölkənin xarici işlər nazirliklərinin rəhbərlərinin iştirakı ilə Ukraynada atəşkəslə bağlı danışıqlar pozulub
“Washington Post” yazır ki, ABŞ dövlət katibi Marko Rubio da daxil olmaqla yüksək rütbəli diplomatların Britaniya paytaxtına səfərini ləğv etməsindən sonra avropalı diplomatlar yüksək səviyyəli danışıqlardan çıxıblar. Danışıqların pozulması Vaşinqton və Kiyevin Ukrayna ərazilərinə nəzarətlə bağlı razılığa gəlməməsi səbəbindən baş verib.
ABŞ dövlət katibinin görüşə getməməsi rəsmi olaraq “iş qrafiki ilə əlaqələndirilib. Ancaq qeyri-rəsmi məlumatlara görə, onun səfərini ləğv etməsi Zelenskinin ABŞ-ın Krımın Rusiya ərazisi kimi tanınması təklifini rədd etməsi ilə bağlı olub.
Rubionun səfərlərini ləğv etməsinin ardından İngiltərə, Fransa, Almaniya və Ukrayna xarici işlər nazirləri tərəfindən Londonda bu gün keçirilməsi planlaşdırılan sülh danışıqları təxirə salınıb. Britaniya Xarici İşlər Nazirliyi Ukraynadakı münaqişənin həlli ilə bağlı nazirlər görüşünün keçirilməyəcəyini təsdiqləyib və daha aşağı səviyyəli - rəsmilər və ekspertlər səviyyəsində danışıqların davam etdiriləcəyini açıqlayıb.
Vəziyyətlə tanış olan rəsminin nəşrə verdiyi məlumata görə, danışıqlar Vaşinqtonun Kiyevin bəzi bölgələrə nəzarətin Rusiyaya verilməsi ilə bağlı təklifləri qəbul etmək istəməməsindən qəzəblənməsi və Kiyevin “əvvəlcə tam atəşkəs, sonra digər məsələlərdən danışaq” yanaşması səbəbindən baş tutmayıb.
Bundan əvvəl həm “The Washington Post”, həm də “The Wall Street Journal” ABŞ-ın Krımın Rusiya ərazisi kimi tanınmasını təklif etdiyini yazmışdı.
TAHİR
