Ermənistanda Avroittifaq missiyasından Azərbaycana ilk birbaşa “atəşkəsi pozma ittihamı”...
Ramil Məmmədli: “Azərbaycanı təxribatçı tərəf kimi dünyaya təqdim etmək istəyirlər”
Pasxa həftəsonu ərzində Avropa İttifaqının Ermənistandakı Monitorinq Missiyası fəaliyyət göstərdiyi ərazidə 27 gecə-gündüz patrul xidməti həyata keçirib. Patrullar Xoznavar, Xnatsax və Aravus kəndlərində aparılıb. Bu barədə Aİ missiyasının yaydığı bəyanatda deyilir.
“Xoznavarda missiya mülki infrastruktura zərər vuran, ehtimal ki, həmin sektorda Azərbaycan mövqelərindən açılan iki atəşin təsirini müşahidə edib”, missiyanın yaydığı məlumatda bildirilir.
Burda diqqəti çəkən məqam odur ki, Aİ missiyası ilk dəfədir Azərbaycanı atəşkəsi pozmaqda rəsmən ittiham edir. Bu, əslində Aİ müşahidə missiyasının Azəbaycana yönəlik birbaşa təxribat cəhdidir. Yəni onsuz da Aİ müşahidə missiyasının Ermənistanın maraqlarını təmin etməkdən ötrü ora yerləşdirilməsi bəlli idi. Çünki onlar müşahidə aparmaqdan çox Azərbaycan barədə kəşfiyyat məlumatları toplamaqla məşğuldular. Bütün bunlar azmış kimi, indi açıq şəkildə həyasız formada Azərbaycanı atəşkəsi pozmaqda ittiham edirlər.
“Məqsəd Ermənistanın silahlanmasına “haqq” qazandırmaq və buna legitim zəmin formalaşdırmaqdır”
Sözügedən məsələyə aydınlıq gətirən hərbi ekspert Ramil Məmmədli “Bakı-Xəbər”ə açıqlamasında Aİ missiyasının belə təxribatçı bəyanatla çıxış etməsini bir neçə faktorlarla əlaqələndirdi: “Birincisi, bu cür təxribatçı açıqlama ilə Azərbaycanı təxribatçı tərəf kimi dünyaya təqdim etmək istəyirlər. Guya Azərbaycan tərəfi Ermənistanla sərhəddə atəşkəsi pozur. Səbəb də odur ki, Azərbaycan guya Ermənistanla sülh sazişini imzalamaqda maraqlı deyil. Bu səbəbdən atəşkəs pozulur. İkincisi, bu cür pozucu açıqlamada məqsəd Ermənistanın silahlanmasına “haqq” qazandırmaq və buna legitim zəmin formalaşdırmaqdır. Məlum olduğu kimi, son dövrlər Ermənistan kütləvi şəkildə silahlanır. Hindistandan və digər dövlətlərdən Ermənistana silah daşınır. Əsasən də hücum silahları. Aİ missiyası belə saxta rəy yaratmağa çalışır ki, guya Azərbaycan sülhdə maraqlı olmadığı üçün, atəşkəsi pozduğu üçün Ermənistan silahlanmağa məcburdur. Onsuz da Avroittifaqın yaratdığı Sülh Fondu Ermənistana hərbi yardım məqsədi ilə vəsait ayırır. Ötən ilin aprelində bilavasitə Brüsselin təşəbbüsü ilə keçirilən üçtərəfli görüşdə Ermənistana edilən yardımların içində hərbi yardımlara da yer verilməsi bizə məlumdur. Bu baxımdan baş verənləri təsadüfü hesab etmək olmaz. Bunların arasında bir sistemli bağlılıq var. Bununla Aİ-nin müşahidə missiyası öz əsl simasını ortaya qoymuş oldu. Açıq göstərdilər ki, onlar Ermənistanın tərəfindədilər və hansısa neytral müşahidəçilikdən söhbət gedə bilməz. Bunlar Ermənistanı “sülh göyərçini”, Azərbaycanı isə sülhdə maraqlı olmayan tərəf kimi təqdim etmək istəyirlər. Bütün bu oyunlar bununla əlaqədardır”.
Vidadi ORDAHALLI
