Rusiya Ankara-İrəvan yaxınlaşmasında vasitəçiliyə can atır...
Azər Həsrət: “Moskvadan bunu kimsə xahiş edirmi ki, gəl vasitəçi ol?”
Aprelin 18-də Rusiya xarici işlər nazirinin müavini Mixail Qaluzinlə Ermənistanın Türkiyə ilə münasibətlərin normallaşdırılması üzrə xüsusi nümayəndəsi, parlament sədrinin müavini Ruben Rubinyan arasında telefon danışığı olub. Bu barədə Rusiya XİN məlumat yayıb.
Rusiya tərəfi Ermənistan-Türkiyə münasibətlərinin yaxşılaşması Cənubi Qafqazın sabitliyi və davamlı inkişafı üçün mühüm amil olduğundan, İrəvan və Ankara arasında ümumi əsasların axtarışını asanlaşdırmağa davam etməyə hazır olduğunu təsdiqləyib. Rubinyan Ermənistan və Türkiyə arasında normallaşma sahəsində son hadisələr barədə məlumat verib.
Onsuz da Türkiyə ilə Ermənistan arasında danışıqlar gedir. Hər iki ölkə bununla bağlı xüsusi nümayəndə ayırıb və ara-sıra görüşlər keçirilir. Belə olan halda Rusiyanın Türkiyə ilə Ermənistan arasında vasitəçi olmağa cəhd etməsinə nə ehtiyac var? Moskva Bakı ilə İrəvan arasında vasitəçi olmaq istəyindən əl çəkmir. Zaxarova tez-tez bunu gündəmə gətirir. İndi də bunlar Ankara və İrəvan arasında vasitəçiliyə can atırlar. Niyə?
Sözügedən məsələyə münasibət bildirən siyasi şərhçi Azər Həsrət baki-xeber.com-a açıqlamasında bununla bağlı bir sıra məqamlara toxundu: “Açığını desək Moskvanın bu davranışı təəccüb doğurmaya bilməz. Yəni bu dövlət hələ də lazımsız, gərəksiz olduğunu qəbul edə bilmir. Ermənistanla Azərbaycan, Ermənistanla Türkiyə arasında münasibətlərin normallaşdırılmasında Rusiyanın iştirakına heç bir şəkildə ehtiyac yoxdur. Bunu dəfələrlə Azərbaycan rəsmiləri də deyib. Ermənistanın özü də artıq bunu deməyə başlayıb. Elə bu günlərdə Ermənistan xarici işlər naziri Ararat Mirzoyan açıq şəkildə dedi ki, Azərbaycanla münasibətlərimizi üçüncü tərəfin iştirakı olmadan araşdırmaq daha məqsədəuyğundur. Eyni zamanda qeyd olunduğu kimi, Türkiyə ilə Ermənistan arasında xüsusi nümayəndələr təyin edilib ki, onlar məhz iki ölkə arasında münasibətlərin normallaşması ilə bağlı müzakirələr aparsınlar. Yəni Moskvadan bunu kimsə xahiş edirmi ki, gəl vasitəçi ol? Əgər iki ölkə bir-biri ilə danışa bilirsə, vasitəçilər olmadan anlaşa bilirsə, o zaman üçüncü tərəfə nə gərək var? Eləcə də Azərbaycanla Ermənistan öz aralarında danışıb anlaşa bilirlərsə, Moskvanın vasitəçiliyinə nə gərək var ki? Heç bir ehtiyac yoxdur. Deməyim odur ki, Rusiya özünü zorla bu prosesə soxmamalıdır. Ona görə ki, Rusiyadan başımız çox çəkib. Həm Azərbaycanın, həm Ermənistanın, elə Türkiyənin də. Ona görə də hesab edirəm ki, heç olmasa indiki mərhələdə Rusiya çəkilib qıraqda dursun. O zaman Azərbaycanla Ermənistan da anlaşacaq, Ankara ilə İrəvan da. Bu zaman heç bir problem olmayacaq. Bir də gördünüz ki, bu üç ölkə birlikdə hərəkət edirlər. Azərbaycan, Türkiyə və Ermənistan. Onsuz da bu günlərdə Tbilisidə Azərbaycan, Gürcüstan və Ermənistan xarici işlər nazirlərinin müavinləri bir araya gəldilər. Rusiyanın iştirakı olmadan çox konstruktiv müzakirə apardılar. Bir sözlə, Rusiya qarışmadan biz bir çox şeyi özümüz həll edə bilərik. Ona görə də hesab edirəm ki, Rusiya Türkiyə-Ermənistan münasibətlərinin normallaşmasında kənarda durmalıdır”.
Vidadi ORDAHALLI
