“Urmiya gölünü məhv etdik” - İran parlamentində ürək göynədən ittiham...
Faiq Ələkbərli: “Ümid edək ki, bu ağrılı problemin həll olunması istiqamətində Pezeşkian öz mövqeyini ortaya qoyacaq”
“Urmu gölünü məhv etdik”. Azad İran Teleğram kanalı ISNA-ya istinadən xəbər verir ki, bu barədə Urmiya şəhərinin İran parlamentindəki nümayəndəsi Şəhin Cahangiri ölkə prezidenti Məsud Pezeşkiana ünvanladığı mesajında Urmu gölünün vəziyyətinə etiraz edərək yazıb:
“Biz Urmu gölünü kənd təsərrüfatının inkişafı bəhanəsi və qeyri-peşəkar bəndlər inşa etməklə məhv etdik. Urmu gölü fəlakətindən hələ də heç bir ibrət dərsi almadıqsa, heç olmasa bu gün təbiətin, insanların səsinə qulaq asaq!”.
Şəhin Cahangiri məktubunda Urmu (Urmiya) gölünün quruması ilə bağlı məsuliyyət daşıyanları tənqid edib, eyni zamanda problemin həll yolları barədə fikirlərini yazıb.
Bildiyimiz kimi, Urmu gölünün qurudulması ilə bağlı molla rejiminin xüsusi planı olub və bu plana uyğun olaraq bu göl mərhələ-mərhələ qurudulub. Məsələ burasındadır ki, Urmu gölünün qurudulması nəinki İran, eləcə də bütün bölgə üçün, qonşu dövlətlər üçün böyük ekoloji fəlakət deməkdir. Eyni zamanda bu, yerli türk əhalinin bölgəni tərk etməsinə nail olmağa hesablanmış məkrli bir plandır. Fakt budur ki, orda faciəvi bir durum yaranıb və beynəlxalq qurumlar da susur, hökumət isə özündən əvvəlkilərin səhvini düzətməyə maraq göstərmir. İndi parlamentin deputatı İran prezidentinə səslənir ki, Urmu gölünün probleminə diqqət yetirsin.
“Bu gölün qəsdən qurudulması prosesinin günahkarı İran hakimiyyətidir”
AMEA-nın Fəlsəfə və Sosiologiya İnstitutunun şöbə müdiri, fəlsəfə doktoru, siyasi ekspert Faiq Ələkbərli “Bakı-Xəbər”ə şərhində bildirdi ki, Urmu gölü problemi daha ciddi şəkildə gündəmə gəlir. “İran prezidenti Məsud Pezeşkiana məktub ünvanlayan Şəhin Cahangiri çox düzgün ifadə edir ki, Urmu gölünü indiki molla-fars rejimi məhv edib. Bu gölün qəsdən qurudulması prosesinin günahkarı İran hakimiyyətidir. O gölə axan çayların qarşısını bəndlərlə kəsib digər istiqamətlərə yönəldilməsinin, nəticədə gölün sululuğunun artmasında problemlərin yaranmasının, onun qurudulmasının məsuliyyətini İran hökuməti daşıyır”.
Urmiya gölünün qurudulmasında əsas məqsədin ordakı Azərbaycan türklərinin o bölgədən çıxarılması olduğunu deyən F.Ələkbərli bildirdi ki, orda qeyri-türklər yerləşdirilir, kürdlərin və başqa etnik xalqların sayı çoxaldılır. “Deputat bu məsələyə çox ciddi yanaşır və haqlı fikirlər irəli sürür. Onun bu məsələ ilə bağlı İran Prezidentinə müraciət etməsinin özü də çox ciddi faktdır. Hesab edirəm ki, Pezeşkianın diqqətinin Urmu gölünün qəsdən qurudulması faktına yönəldilməsi nəticəsində problemin həlli ilə bağlı hansısa addımlar atıla bilər. Çünki bu problemi artıq deputat dilə gətirir və Urmu gölünü məqsədli şəkildə qurudanları ittiham edir, onların məsuliyyət daşıdığını vurğulayır. Ümid edək ki, bu ağrılı problemin həll olunması istiqamətində Pezeşkian öz mövqeyini ortaya qoyacaq. Bu, dövlət qarşısında ciddi bir problem şəklində qaldırıdıqdan sonra ümid etmək olar ki, Urmu gölünün tam qurudulmasının qarşısı alınacaq”.
F.Ələkbərlinin fikrincə, hökumət Urmiyadan olan deputatın, eləcə də ictimaiyyətin çağrışlarını eşidib problemin nə dərəcədə fəlakətli olduğunu dərk edəcək. Bütün hallarda, F.Ələkbərli hesab edir ki, hökumət Urmu gölünün tam qurumasının qarşısının alınması üçün hərəkətə keçməlidir, əks təqdirdə faciə qaçılmaz olacaq.
İradə SARIYEVA
