Türkün vahid ordu strategiyası reallaşır - Azərbaycanla Türkiyə öndə...
İbrahim Rüstəmli: “Türkiyə və Azərbaycanın vahid ordusunun yaradılması üzərində işlərin başlaması çox müsbət haldır”
Türkiyə və Azərbaycan vahid ordunun yaradılması üzərində işləyir. Bunu Türkiyə Böyük Millət Məclisinin (TBMM) Milli müdafiə komitəsinin sədri, sabiq müdafiə naziri Hulusi Akar Azərbaycana səfəri zamanı deyib.
Hulusi Akar qeyd edib ki, Azərbaycan Prezidenti İlham Əliyev Şimali Kipr Türk Respublikasının müstəqilliyini dəstəkləyir. “Biz artıq bir millət iki dövlət deyil, bir millət, üç dövlətik. Bir millət olmaqla yanaşı, həm də bir orduyuq. Hazırda vahid orduya doğru proses gedir. Azərbaycan və Türkiyə müdafiə sahəsində birgə fəaliyyət göstərməlidir. Bunun üçün birgə hərbi təlimlər ilkin şərtdir”, - deyə H.Akar qeyd edib.
Türkiyə və Azərbaycanın vahid ordu yaratması ideyası artıq gerçəkləşir və bu istiqamətdə konkret addımlar atılır.
“Bu, Türkiyə-Azərbaycan qardaşlığının daha da möhkəmlənməsinə xidmət edən, Azərbaycanın və Türkiyənin suverenliyi, ərazi bütövlüyü məsələlərində önəmli rol oynayan bir faktdır”
Hərbi ekspert İbrahim Rüstəmli “Bakı-Xəbər”ə şərhində ilk növbədə onu vurğuladı ki, Azərbaycan Silahlı Qüvvələrinin formalaşmasında, müdafiə qüdrətini artırmasında qardaş Türkiyə Cumhuriyyətinin önəmli rolu var. “Türkiyə bir dövlət olaraq Azərbaycanın strateji müttəfiqidir. Bu sırada onu hər hansı digər dövlətlə müqayisə etmək mümkün deyil. Azərbaycan ordusu Türkiyə Silahlı Qüvvələri ilə çoxtərəfli müqavilələr, çoxtərəfli sazişlər imzalayıb və Türkiyə-Azərbaycan müttəfiqliyinin əsas təməl sütunlarından biri həm də Silahlı Qüvvələrin müttəfiqliyidir. Yəni Azərbaycan Türkiyə ilə imzaladığı sazişə, müqavilələrə əsasən və digər rəsmi sənədlər əsasında öz hərbi qulluqçularını bu ölkəyə təcrübə mübadiləsi üçün göndərir və Türkiyə Silahlı Qüvvələr təmsilçiləri də Azərbaycana gəlir”.
İ.Rüstəmlinin fikrincə, Şuşa bəyannaməsi son illərin ən böyük sənədidir, Türkiyə və Azərbaycan dövlətlərinin dostluğunu, qardaşlığını şərtləndirən və özündə ehtiva edən mühüm sənəddir. “Əlbəttə, bu əməkdaşlıq beynəlxalq hüquq çərçivəsində həyata keçirilir. Əməkdaşlıqda məqsəd hər hansı bir dövlətin ərazisinə təcavüz etmək deyil, məqsəd Türkiyə və Azərbaycan üçün ərazi bütövlüyünün qorunması, strateji əhəmiyyət daşıyan məsələlərdə birgə fəaliyyət və sairdir. Bilirsiz ki, Azərbaycan ordusunun şəxsi heyəti sülhməramlı missiyalarda da məhz Türkiyə dövlətinin hərbi kontingentinin tərkibində və onların ümumi komandanlığı altında fəaliyyət göstərir. Ümumiyyətlə, Türkiyə dövlətinin çox ciddi ordu quruculuğu, Silahlı Qüvvələr təcrübəsi var. Bilirsiz ki, uzun müddətdir onlar kürd terrorçularına qarşı dağlıq ərazilərdə, çox çətin coğrafi şəraiti olan yerlərdə əməliyyatlar həyata keçirirlər”.
İ.Rüstəmli qeyd etdi ki, bu əməliyyatların həyata keçirilməsi təcrübə qazanmaq baxımından da çox böyük əhəmiyyət daşıyır. “Türkiyə ilə Azərbaycan arasında vahid bir ordunun yaradılması prinsipi çox mükəmməl prinsipdir. Bu çox mükəmməl bir təklifdir, ideyadır. Bunun reallaşmasını arzulayıram. Bilirsiz, son illərin uğurlarında bizim qardaş Türkiyə ilə imzalanmış müqavilələr, rəsmi sənədlər əsasında həyata keçirdiyimiz əməkdaşlığın da çox böyük rolu olub. Hazırda Azərbaycan ordusunda aparılan islahatların da əsas hissəsi, nəzərəçarpacaq dərəcədə böyük həcmi məhz Türkiyə təcrübəsinin əsasında həyata keçirilir. Türkiyənin peşəkar, bacarıqlı, təcrübəli hərbi kadrları ilə biz əməkdaşlıq edirik və onların bu sahədə bilik və bacarıqlarından bəhrələnməyə çalışırıq. Türkiyə və Azərbaycanın vahid ordusunun yarasdılması üzərində işlərin başlaması çox müsbət bir işdir. Bu, Türkiyə-Azərbaycan qardaşlığının daha da möhkəmlənməsinə xidmət edən, Azərbaycanın və Türkiyənin suverenliyi, ərazi bütövlüyü məsələlərində önəmli rol oynayan bir faktdır. Mən bunu ürəkdən alqışlayıram. Bu işlər uğurla həyata keçərsə, bu, Azərbaycanın ordu quruculuğu sahəsində irəli atdığı növbəti bir addım olacaq” - deyə İ.Rüstəmli qeyd etdi.
İradə SARIYEVA
