4 "Türk dövləti" Türkiyəni təcavüzkar kimi tanıdı - siyasi rəzalət...
Zərdüşt Əlizadə: "Türk qoşunlarının Şimali Kiprdə yerləşməsinin səbəbini Avropa etiraf etmək istəmir – bu, Qərbin şərəfsizliyinin, alçaqlığının və ikiüzlülüyünün bariz nümunəsidir"
Qazaxıstan, Özbəkistan, Türkmənistan və Qırğızıstan Avropa İttifaqı (Aİ) ilə imzaladıqları və 12 milyard avro həcmində investisiya vədi aldıqları saziş çərçivəsində Şimali Kipr Türk Respublikasını tanımayacaqlarını bəyan ediblər.
Belə ki, sammitin yekununda qəbul edilən birgə bəyannamədə Kipr məsələsi birbaşa qeyd olunmasa da, dövlətlərin suverenliyi və ərazi bütövlüyü kontekstində tərəflər öz öhdəliklərini bir daha vurğulayıblar. Bəyannamədə istinad olunan sənədlər arasında BMT Təhlükəsizlik Şurasının Türkiyənin Kiprdəki hərəkətlərini pisləyən 541 (1983) və 550 (1984) saylı qətnamələri də yer alıb. Bu qətnamələrdə ŞKTR qeyri-qanuni bir qurum kimi tanınır, adada yeganə qanuni dövlət olaraq Kipr Respublikası göstərilir.
Qeyd olunub ki, bu addımlar Aİ-nin Kipr siyasətində regional müttəfiqlər qazanmaq istiqamətində strateji bir gedişat kimi şərh edilir.
Bu, açıq şəkildə Türkiyənin işğalçı dövlət kimi tanınması demək deyilmi? Türk Dövlətləri Təşkilatında birləşən dövlətlərin bu bəyanata imza atması nədən xəbər verir?
Baki-xeber.com saytının sualını cavablandıran politoloq Zərdüşt Əlizadə bildirdi ki, bu gün Türk Dövlətləri Təşkilatı (TDT) o qədər gücə malik deyil ki, ona üzvülük kimlərəsə dividend gətirsin: "Bu təşkilat hələ məşfərət məclisi səviyyəsindədir. TDT hələ beynəlxalq gücə çevrilməyib, bu, perspektivə hesablanmış bir təşkilatdır. Gələcəkdə bu təşkilatın perspektivləri ola bilər. Ona görə də bu təskilatda üzv olmaqla hansısa dövlətlərin imkanlarını məhdudlaşdırmaq, onlara hansısa qadağa qoymaq doğru yanaşma deyil.
Avropa İttifaqı isə dünya siyasətində böyük oyunçudur, iqtisadi cəhətdən nəhəng, siyasi cəhətdən "cırtdan"dır. Aİ böyük bazardır, 450 milyon əhalisi var. Böyük kapital sahibidir, avro dünyanın aparıcı valyutalarından biri sayılır.
İkincisi, Yunan Kiprində səfirlik açan ölkələr TDT və Turkiyə qarşısında belə bir hərəkətə yol verməyəcəkləri barədə heç bir öhdəliyə malik deyillər. Türkmənistan heç TDT-nin üzvu deyil. Ümumiyyətlə, TDT-də Turkiyənin Yunan Kipri istiqamətində siyasəti heç vaxt müzakirə mövzusu olmayıb. "Sən də türksən, mən də türkəm və buna görə bir-birimizə hörmət edirik" - bu nisyə söhbətdir, siyasətdə belə şey yoxdu. Siyasətdə maraq var və bu marağı belə elementlərlə maskalamaq var.
Türkiyənin Şimali Kipri "işğal etməsi" məsələsinə gəlincə isə, orada türk qoşunlarının olmasi bir faktdır. Amma türk qoşunlarının Şimali Kiprdə yerləşməsinin səbəbini Avropa etiraf etmək istəmir, bu, Qərbin şərəfsizliyinin, alçaqlığının və ikiüzlülüyünün bariz nümunəsidir. Türkiyə ordusu Şimali Kiprə ona görə girmişdi ki, orada yunanlar türkləri qırırdı. Türkləri yunanlardan qorumaq ücün Türkiyə ordusu Şimali Kıbrısa girməli oldu. Bunun ardınca Türkiyə barış üçün xeyli addım atdı. O vaxt Turkiyənin də dəstəklədiyi, Kofi Annanın təklifi var idi ki, birləşmək barədə referendum keçirilsin və Avropa Birliyinə vahid Kipr daxil olsun. Belə bir referendum keçirildi və Kıbrıs türkləri yunanlarla birləşməyə səs verdi. Avropanın fitnəsi və Yunanıstanın alçaq siyasəti nəticəsində Kıbrıs yunanları birləşmənin əleyhinə səs verdilər. Bu səbəbdən də Kofi Annan planı rədd edildi. Buna rəğmən Aİ növbəti alçaqlığını edərək, türklərsiz yunan Kiprini tanıdı və onu Avropa Birliyinə qəbul etdi. Yəni bu adanın bölünməsi qərarını AB verdi. Burada Türkiyəni ittiham etmək ədalətsizlik olardı. Bu, mahiyyətcə sadə, amma diplomatik oyunlarla qəlizləşdirilmiş bir məsələdir. Burada AB ondan istifadə edir ki, beynəlxalq siyasi arenada Qərbin və Amerikanin sözü daha çox keçir, nəinki müsəlmanların və türklərin... Ona görə də yanlış mövqelərini dünya dövlətlərinə, o cümlədən də müsəlman və türk dövlətlərinə sırıyırlar, düz kimi qəbul etdirirlər. Müşahidə etdiyimiz bu mənzərə də onun bariz nümunəsidir.
Bu gün daha çox haqlı olan Şimali Kıbrıs Türk Cümhuriyyətini Türkiyədən başqa heç kim tanımır. Türkiyə və Azərbaycan çalışır ki, ŞKTC beynəlxalq səhnəyə çıxsın. TDT toplantılarında onlar qonaq sifətində iştirak edirlər. Amma Türkiyədən başqa heç bir türk dövləti, o cümlədən də Azərbaycan onu bir dövlət kimi tanımır. Biz çalışırıq ki, tanınsın, amma digər tərəfdən ŞKTC-nin tanınmasını istəməyən, dünyada söz sahibi, həm də qərazli mövqeyi olan Avropa var. Özləri eyni əməli ediblər. Məsələn, Kosovonun tanınmasında beynəlxalq hüquq normalarını pozublar. Rusiyaya, Qərbə, İsrailə və ABŞ-yə beynəlxalq hüququ pozmaq olar, amma Türkiyə Cümhuriyyətinə olmaz! Hazırda ABŞ Rusiyanın işğalçı-ilhaqçı siyasətini tanıyır. Tramp İsrailin Suriyada Colan təpəliklərini və şərqi Qütsi işğal etməsini tanıyır. Türk və müsəlman dövlətləri yuxarıda sadaladığımız dövlətlərin qoyduğu qaydalara əsasən hərəkət etməyə məhkum edilib. Özləri isə müstəqil dövlətlər olan İraqa, Livana, Sudana, Suriyaya və s.-ə hücum edib onların süveren ərazilərini bömbalaya bilər. Hətta onları şərləyə də bilərlər. Məsələn, yalandan dedilər ki, Səddam Hüseyn İraqda kütləvi qırğın silahı hazırlayib. Buna görə onu asdılar da, amma kütləvi qırğın silahları tapilmadı. Amma müsəlman dövlətlərinə "İsrail Qəzzada soyqırım törədib, 50 mindən çox dinc əhalini qırıb" demək olmaz! Bunu Qərb qəbul etmir. Deyir ki, sən antisemitistsən. Beləcə, bütün dünya ikili standartlarla yaşayır və bundan da zəif dövlətlər əziyyət çəkir. Mərkəzi Asiya dövlətləri də bu haqsızlığı və ikili standartları görür, müşahidə edir və bundan özünü qorumağa çalışır. Ona gorə də belə bir mənzərə alınır".
Akif NƏSİRLİ
