ABŞ Türkiyəni İranla vuruşdurmağa çalışır - yeni strategiya və erməni lobbisinin barmağı...
Xaqani Cəfərli: "İranın nüvə obyektlərinin bombalanmasında iştirak üçün Türkiyənin texniki imkanları mövcud deyil"
ABŞ Dövlət Departamentinin sözçüsü Tammy Bruce verdiyi açıqlamada bildirib ki, ABŞ dövlət katibi Marko Rubio aprelin 14-də Türkiyənin xarici işlər naziri Hakan Fidanla "İran və onun etibarlı müttəfiqləri tərəfindən regional təhlükəsizlik və sabitliyə yönəlmiş təhdidləri" müzakirə edib.
“Onlar terrorizmlə mübarizə və NATO-nun gücləndirilməsi sahəsində əməkdaşlığın vacibliyi barədə razılığa gəliblər”, - deyə məlumatda bildirilir.
Amerikanın dövlət katibinin bu bəyanatı ona hesablana bilərmi ki, ABŞ İranla mübarizədə Türkiyəni də öz tərəfinə çəksin? Bununla da Ağ Ev İranla Türkiyə arasinda ziddiyyətləri dərinləşdirməyi hədəfləyə bilərmi? Məlum olduğu kimi, Turkiyə ilə ABŞ NATO çərçivəsində müttəfiq olsa da, Ankara Vaşinqtonun Avropadakı tərəfdaşı olsa da, Türkiyənin gücünü özu istədiyi ampluada saxlamağa çalışır - bunu Amerikanın davranışlarından aydın sezmək olur. Turkiyə-İran munasibətlərindən ABŞ bu məqsədlə istifadə edə bilərmi? Tramp bu fikrə düşsə nəyə nail ola bilər?
Baki-xeber.com saytının sualını cavablandıran politoloq Xaqani Cəfərli bildirdi ki, Donald Trampın İrana yönəlik siyasətinin nədən ibarət olduğu, nə etmək istədiyi tam aydın deyil. Buna görə, İranla mübarizədə Türkiyəni də öz tərəfinə çəkmək istəyi inandırıcı görünmür. Ümumiyyətlə, Vaşinqtonun Tehrana qarşı ehtimal olunan hərbi əməliyyatında ABŞ-ın İrana qarşı yerüstü əməliyyat aparmayacağı və yalnız havadan zərbələrlə İslam Respublikasının nüvə obyetlərini məhv etməyə üstünlük verəcəyini nəzərə alanda, Türkiyənin bu işdə hansısa rol ala bilməyəcəyini görmək çətin deyil. İranın nüvə obyektlərinin bombalanmasında iştirak üçün Türkiyənin texniki imkanları mövcud deyil.
Türkiyə ilə İran arasında ziddiyətləri kənar qüvvənin, o cümlədən də ABŞ-ın dərinləşdirməsinə zərurət yoxdur. Bu iki dövlət arasında münasibətlər Suriya, İraq və kürd məsələsi ilə bağlı kifayət qədər ziddiyətlidir.
Vaşinqtonun Türkiyənin gücünü özu istədiyi ampluada saxlamağa çalışmasını iddia etmək olar, amma sübut etmək olmaz. Türkiyənin güclənməsinə imkan verməyən ən böyük problem Ankaranın yürütdüyü siyasətdir. Çağdaşlıqla və müasir iqtisadi münasibətlər sisteminə tamamilə ziddiyət təşkil edən Nas siyasətində israr edib, Türkiyə iqtisadiyyatını kökündən sarsıdan Ərdoğanın dini görüşləridir. Türkiyədə elə bir vəziyyət yaranıb ki, onu zəiflətmək və ya gücünü hansısa ampluada saxlamaq üçün kənar müdaxiləyə ehtiyac yoxdur".
Akif NƏSİRLİ
