Tramp Zelenskinin ona çağırışını efirə verən kanalın bağlanmasını istədi...
ABŞ prezidenti Tramp CBS telekanalını Ukrayna və Qrenlandiya ilə bağlı yayımladığı xəbərlərə görə sərt tənqid edərək, kanalın yayım lisenziyasının ləğv edilməsini istəyib.
Tramp “Truth Social” platformasında CBS-ni “saxta xəbərlər yaymaqda” günahlandırıb və qurumun siyasi motivli bir təşkilat olduğunu iddia edib.
Tramp bundan əvvəl CBS-ə qarşı 10 milyard dollarlıq iddia qaldırmışdı.
Qeyd edək ki, tənqid obyekti olan proqramda Ukrayna prezidenti Vladimir Zelenski Trampı “güclü ölkənin güclü lideri” kimi Ukraynanı dəstəkləməyə çağırıb və onu Ukraynaya səfərə dəvət edib.
Zelenski bildirib ki, hazırda Rusiya ilə danışıqlar aparmaq mümkün deyil. “Rusiyanın Ukraynaya hücumları bir daha göstərdi ki, Moskvaya etibar etmək olmaz” deyən Zelenski Trampa da çağırış edərək, ona danışıqlar planı qurmazdan əvvəl Ukraynaya səfər etməyi təklif edib. Ukrayna lideri bildirib ki, hazırda Moskvanın informasiya siyasəti Amerika siyasətinə ciddi təsir edir.
TAHİR
