"Dünya liderləri gərək Prezident İlham Əliyevin dediklərinə qulaq assınlar" - Svante Kornell
Dünya liderləri gərək Prezident İlham Əliyevin dediklərinə qulaq assınlar. Bunu Trend-ə İsveçin Təhlükəsizlik siyasəti və inkişaf İnstitutunun direktoru Svante Kornell “Yeni Dünya Nizamına Doğru” mövzusunda 7-ci ADA Siyasi Forumu çərçivəsində verdiyi açıqlamada bildirib.
Svante Kornellin sözlərinə görə, Prezident İlham Əliyevin dedikləri dünya siyasəti üçün böyük əhəmiyyət kəsb edir.
“Prezident İlham Əliyev hər zaman çox səmimidir və sözünü açıq şəkildə deyir, məncə, dünya analitikləri və liderlərinin onun nə dediyinə və nə barədə danışdığına diqqət yetirməsi vacibdir: Ermənistanla sülh sazişi, İranla bağlı məsələlər, ABŞ və Avropa ilə münasibətlər", – deyə İnstitutun direktoru bildirib.
Analitik Azərbaycanla Ermənistan arasında sülh sazişinin mümkünlüyünə ümidini ifadə edib, ancaq onun bildirdiyinə görə, bunun üçün Ermənistan rəhbərliyi və erməni cəmiyyətinin yeni reallıqlarla barışması zəruridir.
“Mən belə bir dəyişikliyin tam olaraq baş verdiyinə əmin deyiləm. Ona görə hesab edirəm ki, sülh razılaşmasının əldə olunmasına vaxt tələb oluna bilər”, - deyə Kornell qeyd edib.
Ekspertin sözlərinə görə, regionda sabitliyin bərqərar olması və Ermənistanın müstəqil ölkə olaraq inkişaf etməsi üçün sülh sazişi əsas amildir.
“Əlbəttə ki, bu regionun stabilliyi, Ermənistanın isə, həqiqətən, müstəqil ölkə olaraq inkişafı yolu sülh sazişindən keçir, çünki bunsuz, Ermənistanın, həqiqətən, müstəqilliyini inkişaf etdirməsi mümkün deyil”, -deyə o vurğulayıb.
